Ads by Google Ads by Google

Lapataiga mo i latou o le a avea ma tagata fai palota le tumau

Ua tuuina atu nei e le Komesina o Palota ia Soliai Tuipine Fuimaono se lapataiga, mo i latou uma o le a avea ma tagata faipalota le tumau, i le palota tele o lo o loma nei ia Novema 6.

Saunoa le afioga Soliai, soo se tasi o i latou nei e maua ane o lo o taumafai e fai ni faiga faatosina mo soo se sui tauva, o le a faamalolo.

O le palota o lo o loma nei o se tasi le o palota ua sili le taugata, ona o le toatele o sui ua faamaonia le tauva mo le tofi kovana ma le lutena kovana.

Na taua e Soliai lona faanaunauga, ia aua lava ne’i aafia fuafuaga uma mo le palota i ni faiga faapolokiki.

Sa ia taua foi e faapea, o se faiga palota sili lenei ona taua mo Amerika Samoa, ma o le tiute o ia o le Komesina o Palota na faatauto ai, ia mautinoa e tutoatasi auala uma e faatautaia ai palotaga a le atunuu, ina ia le aafia i nisi lava faiga e aofia ai tulaga faapolokiki mo isi lava gaioiga.

I tausaga palota uma lava, e faa faigaluega ai e le Ofisa o Palota tagata fai palota le tumau e galulue i le aso o le palota, i fale palota taitasi i le atunuu mo le faatinoina o tiute e tofia i latou e galulue ai.

Ma o le taimi nei, ua maea ona faafesootai i latou nei mo aoaoga e tusa ai o latou tiute o tagata fai palota le tumau mo Sasae, Sisifo, Manu’a ma le taulaga nei, e ui e lei faailoa mai e Soliai le aofai o i latou o le a galulue i nei galuega.

I le taimi o le aoaoga ua fuafuaina, o le a faamatala auiliili a i tagata o le a auai a latou tiute ma le taua o latou tiute e faatino i le aso o le palota, ina ia mafai ai ona sologa lelei le aso o le palota.

O le a faailoa atu ai foi aafiaga o faiga faatosina ma gaioiga faapolokiki pe afai e aafia ai i latou i le taimi o le palota.

“Soo se tasi lava e maua o lo o aafia i ni faiga faatosina i le taimi a’o lumana’i le palota poo le taimi fo’i ua mae’a ai ona faa faigaluegaina o ia o se tagata fai palota le tumau, o le a faamalolo loa ma ona tiute,” o le saunoaga lea a Soliai i se faatalatalanoaga ma le Samoa News i luga o le telefoni.

“O le uiga o lea tala, afai matou te maua ni faamatalaga o lo o tumau pea ona e aafia i faiga faatosina mo se sui tauva, ae ua maea ona avea oe o se tagata fai palota le tumau, o le a faamalolo oe mai lea tofiga.”

Saunoa Soliai, e manaomia lava le usitaia o aiaiga uma lava mo le puipuia o faiga palota i taimi uma.

Sa ia taua foi e faapea, afai o i ai se tagata ua faamoemoe e fia galue o se tagata fai palota le tumau e lo o manatu e le maua o ia pe afai e aafia i faiga nei, o le taimi lenei e tatau ai ona toe mafaufau. Fai mai lana saunoaga, e le tau faia sana faaiuga mai le faamalolo o se tasi e maua o aafia i faiga nei.

O nisi o tagata e masani ona avea ma tagata fai palota le tumau i le tele o faiga palota ua mavae atu, o pulenuu ma leoleo o nuu o loo tofia e vaavaaia fale palota taitasi ina ia saoloto mai le aafia i faiga faatosina.

E talitonu le Samoa News o pulenuu ma leoleo o nisi o aiga o lo o auai i latou i faiga faatosina mo sui tauva o lo o latou lagolagoina, ae na saunoa Soliai e faapea, poo ai lava i latou o loo aafia i tulaga nei, e le mafai ona faa faigaluegaina i latou e leoleo i nofoaga o fale palota, pe afai e maua ane o lo o aafia i faiga faatosina i le taimi o le palota.

fa’aliliu Ausage Fausia