Ads by Google Ads by Google

Faamaonia solitulafono faasaga ia Dr. Emosi Puni

O le aso Faraile na sei mavae atu nei na faamaonia ai e le faamasinoga maualuga le moliaga e tasi o le faaoolima mataga faasaga i se tasi o alii fomai iloga o le atunuu lea sa faauluulu i ai le falemai tumaoti o le MedCen i Vailima, le afioga Le Mamea Dr. Emosi Puni.

O lea iuga a le faamasinoga maualuga sa lauina e le alii faamasino o Pierre Slicer ao faatumulia le potu faamasino i sui o le aiga o le alii fomai. E leai ni lagona faaalia o le alii fomai, na ona nofo filemu lava i totonu o le vaega o le potu faamasino e nonofo ai i latou e molia, ma ia vaavaai atu i le alii faamasino. Na teena e Le Mamea lona moliaga ma sa tulai mo ia lona uso, o le sa avea muamua ma faamasino, le afioga Tagaloa Enoka Puni.

O le loia a le itu a le malo o le tamaitai loia o Rexona Titi mai le ofisa o le loia sili. Na molia le alii fomai i le 2005 ina ua faaulu le tagi a se tamaitai o lo o faasaina e le faamasinoga le faalauiloa o lona igoa, sa saili fesoasoani atu i le falemai o le MedCen i Vailima. i le lauina o lana faaiuga, sa faaalia e faamasino Pierre Slicer e faapea, ua talia e le faamasinoga o le taimi sa faia ai suesuega a le alii fomai i le tamaitai o lo o tagi, o gaioiga sa faamatala e le o lo o tagi o ni gaioiga faafeusuaiga. Na saunoa Slicer, e lei usitaia e le alii fomai ia tulagaaloaia i le vaaia o gasegase, ma e feteenai foi ana faamatalaga sa faia i le taimi o le faamasinoga ma ana faamatalaga sa faia i leoleo ina ua faatoa tulai mai lea mataupu.

Na sqaunoa le alii loia a Dr. Puni ma ia faaalia, o le a toe faaulu le apili a le alii fomai i le faamasinoga o apili faasaga i lea faaiuga. Sa faatonuina o ia e tuuina atu ona pepa malaga ma ua tatala nei o ia i tua i se tinoitupe e faatali ai le lauina o lona faasalaga i le aso 2 o Novema, 2012.