Login

Tala mai Samoa

ASO FAAPITOA O TAGATA FAIGALUEGA A LE MALO

O le aso ananafi na faia ai se sauniga faapitoa mo le uluai taimi i totonu o le malo, e faapitoa ai lea aso mo tagata faigaluega uma a le malo. O le agaaga autu o lenei faamoemoe e pei ona saunoa le alii Palemia, Susuga Tuilaepa Sailele Malielegaoi, o ia foi lea o le minisita o le Komiti e Pulea Tagata Faigaluega, o le momoli atu lea o le faafetai a le malo i ana tagata faigaluega e tusa ai o le tautua sa ofo mai mo le tele o tausaga, aemaise ai i latou sa asaina mai le fita o lenei galuega.

“Ia ma sagai ane ai o le tai, faaosofia mo galuega ma utupupuina e le Atua o lo tatou faavae lau tou tofa ma le utauta mamao aua lo outou valaauina, ina ia saga siitia maualuga ai pea Samoa i saofaiga a malo o le Pasefika. Ua tatala aloaia nei lo outou aso fiafia. O outou mama na!” o le saunoaga lea a le alii palemia. Na taualuga lea aso faapitoa na faailogaina mo le taimi muamua i le aso ananafi, i le tufatufaina o faailoga taualoa mo le aufaigaluega ua filifilia ona o le maoa’e o la latou tautua. O lea sauniga sa faataunuuina lea i le po anapo i le Maliu Mai i Fugalei ma sa tauaaoina atu ia faailoga taualoa e le alii palemia ma le taitaifono o le komisi e pulea le aufaigaluega a le malo (PSC), le susuga Tu’u’u Ieti Taulealo.

MOLIA LE FAIPULE A SATAPUALA I LE FAAMASINOGA

Ua tauaaoina nei e le alii faipule o le afioaga o Satapuala ia Toesulusulu Cedric Schuster se tusi samania mai le faamasinoga, e faailoa atu ai moliaga ua faila faasaga ia te ia, atoa ai ma le aso e tatau ona tulai ai i luma o le faamasinoga.

O moliaga ua molia ai le alii faipule e aofia ai le faia o uiga tau faamata’u i leoleo, lafo o upu masoa i le isi leoleo, faatasi ai ma lona auai i le faamaopoopooina o tagata ina ia soli le tulafono. E toa 17 isi mai Satapuala ua molia faatasi ma le faipule, ma ua faamoemoe o le aso 9 Oketopa o le a tutulai uma ai i latou nei i lum ao le faamasinoga.

FAAPAIA ROSA LEI’A AVEA MA TAUPOU SA

O le vaiaso nei na faia ai se sauniga faapitoa e faapaiaina ai le tamaitai o Rosa Lei’a e avea ma Taupou Sa o le ituaiga o Monike a le ekalesia Katoliko i Vailima.

O le tamaitai o Rosa ua 34 ona tausaga mai le afioaga o Leulumoega, ma ua ia faaalia lona fiafia i le faaiuga ua ia faia, o le ofo atu lea o lona ola e tautua ai le galuega a le Atua i lana ekalesia, ma ua faaee atu ai lona suafa fou o Sister Benekicta Marie of the Croess.

Sa molimauina e ona aiga ma uo le faataunuuina o lenei sauniga faapitoa, ao lei agai atu mo le faataunuuina o ona tiute fou.

O lana galuega mulimuli ae lei avea o ia ma Monike, o le Matagaluega o Tupe a le malo. Fai mai a ia, e ui sa lelei ana galuega ma sa ia uuina foi tupe, ae sa le faamalieina lava lona loto ona e lei atoa lona olaga, sa i ai lava le mea sa misi. O Rosa Lei’a lea ua faasuafa nei ia Sister Benedicta Marie of the Cross o se alo e faasino ia Anamaria ma Taulia Talatala. O ia o le lona lua o le fanau e toaono.

FAAULU LE TAGI A PAPALII PETONI I LE FAATE’AESEINA O IA

O le aso Lua o le vaiaso nei sa fonoa ai le afioaga o Sapapalii i le Aiga Sa Malietoa i le malae o Mataniufeagaimaleata, ma autasi ai finagalo e faate’a le susuga ia Papalii Petoni Alailima, o ia o le Sa’o o le aiga, e mafua mai ona o ni tusitusiga sa ia tali fuaitau i ai i le nusipepa o le Samoa Observer. O le taeao o le aso Tofi na sei mavae atu nei na faamautu mai ai e se tasi o matai o le aiga e faapea, o le susuga Papalii Petoni Alailima o lo o alala i Amerika ma o lenei mataupu o le a tuuina atu i luma o le faamasinoga. E lei maioio mai auiliiliga o le auina atu o lana tagi, ae pau le tulaga o lo o atagia mai ai, e talitonu lea itu o le aiga, e le o agatonu le faaiuga sa faatautaia. O lo o tamau pea la lea itu o le fuaiala o suli o Malietoa Talavou, o le isi a latou fonotaga tele o le a tauaofia ai le aiga atoa i le aso 27 o Oketopa, epei ona faailoa i le aso 25 o Aukuso ina ua feiloai suli o Malietoa Moli. Peitai o lo o feteenai pea lea aso ma se tasi foi o itu o suli o Malietoa Talavou, lea lava o lo o tamau i latou o le aso 25 o Tesema po o le aso Kerisimasi o le tausaga nei, o le aso lea o le a feiloai uma ai loa suli o Malietoa mai ituaiga e tolu, e aofia ai Malietoa Gatuitasina, Malietoa Moli ma Malietoa Talavou. Ao le faaiuga a le afioaga o Sapapalii ma le faate’aina o le susuga Papalii Petoni Alailima, ua sauni lea itu o le aiga e tuuina atu i luma o le faamasinoga.

TATALA I TUA PULE O LE K&M TRAVELS

Ua tatalaina nei i tua mai le vaavaaiga a leoleo, ia le pule o le ofisa malaga o le K&M Travels, le alii o Sanele Katie Moananu, ina ia saili mai lana loia e tulai mo ia ma tuuina atu se tali i luma o le faamasinoga, e tusa ai o moliaga e 18 o le gaoi faasaga ia te ia. Na tulai Sanele i luma o le afioga Faamasino Vaepule Alo Vaemoa Vaai i le faamasinoga faaitumalo, ma ua faailoa ane ai e le Matagaluega o Leoleo ma Falepuipui, le toe faaopopo o isi moliaga faasaga ia te ia, lea ua oo atu ai nei i le 30 moliaga o le gaoi. O Sanele Moananu po o Katie e pei ona iloa ai e le toatele, sa fai sana ofisa malaga e faaigoaina o le K&M Travels, ma o faasalalauga sa ia faia, na te tapenaina le tele o visa, tusi folau, faapea pepa faigaluega mo avanoa faavaitaimi i Aotearoa ma Ausetalia. Peitai, i le lolofi ane o le mamalu o le atunuu e totogi le faatinoga o ia auaunaga, e leai se galuega e tasi na tino mai, ma o lea tulaga ua maea tautino e Sanele i luma o le faamasinoga, lona faaaogaina o le seleni. O le aso Faraile o le vaiaso fou ua faatonuina ai e le faamasinoga Sanele e toe oo ane ai e faaulu lana tali e tusa i moliaga faasaga ia te ia, Ua taofia nei e leoleo ona pepa malaga ma e tatau ona saini o ia i le ofisa o leoleo i aso Lulu o vaiaso taitasi.

Saunia: Lilomaiava Andrew Fa’asau, Naenae Productions



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.