Ads by Google Ads by Google

Fagogo: Lupe o le Filifili

Vaega: 145

 

Fa’atalofa atu i lou alafa’i mai i le manuia i lenei taeao fou, malo le soifua malo fo’i le onosa’i i faiva ma tiute o lo’o feagai ai i lenei aso. E i ai pea le fa’amoemoe, o lo’o aoina le masina i le soifua laulelei o le atunu’u, ae alo maia o le a toe fa’auaua atu la tatou tala, ae ia manuia le alo faiva o le atunu’u i feau ma galuega o le a feagai ai i lenei aso.

 

Ua taunu’u nei le tama’ita’i o Vaitimaleata ma lana uo i le aiga o le tama’ita’i, fai mai ua na o le fa’ataupupula ane nei i ai o tuagane ma lo’omatutua, ae maise o le lo’omatua o Salamasina i le ali’i. O ona foliga e le iloa e i ai sona toto Samoa, ae o le Palagi mao’io’i lava.

 

O Mikaele, o lona tina o le Samoa, a’o lona tama o le Palagi, e tutusa uma lava ma le tama’ita’i o Vaitimaleata, aua e Samoa fo’i le tina o a’o lona tama o le Palagi. Na feiloa’i muamua Vaitimaleata ma Mikaele, a’o ao’oga i Amerika. Ae ina ua ma’ea a’oa’oga a Vaitimaleata, na fo’i ma ai i Samoa, ae sa fa’aauau pea a’oa’oga a Mikaele, ma o’o ai le tama i le tulaga maualuga i totonu o le Fale Pa’epa’e i Uosinitone.

 

O lea la fa’atoa taunu’u mai, ma o aso uma lava na valavala ai Vaitimaleata ma Miakele, o taimi fo’i ia sa feagai ai pea i la’ua ma faigata, ona o le maliu o le tama o Vaitimaleata, ae sa le i fa’avaivai ai le alofa o le tasi i le isi. O se lu’i fo’i mo i la’ua, aua a valavala fa’apea se faigauo ua mafana, o i tonu lava e iloa ai le tagata e alofa fa’amaoni. O lea la ua va’ai nei le aiga o Vaitimaleata, i le alofa fa’amaoni o Mikaele i a Vaitimaleata, ma ua fa’apea fo’i le teine latou. O le la mafutaga ua leva ona tapenapena pea i ai, ona o lo la manatu, e sau se aso ona fa’atasi ai lea e ala i le fa’aipoipoga ia fa’apaia ma nonofo lelei.

 

Ina ua taunu’u la le malaga a Vaitimaleata Caroline ma lana uo o Mikaele i le aiga o le tama’ita’i, o se va’aiga matagofie na iloa nei e le ali’i, ona e fai o le matagofie o le lau fanua a’o fale fo’i e nonofo ai le aiga, ua matua’i matagofie lava. Na fa’ate’a fo’i le tama latou, ona sa leai sona manatu ua o’o le aiga o Vaitimaleata i lenei tulaga, aua o aso uma lava e talatalanoa ai, e le tele tele se tala a le teine e uiga i lona aiga. A’o lea ua fa’atoa va’ai le tama i le to’atele o le aiga o Vaitimaleata Caroline.

 

Na tu a’e nei i luga le lo’omatua o Salamasina, ma feiloa’i ane i a Mikaele, na fa’ate’ia le lo’omatua i le tepa a’e, e matua’i pa’epa’e aulelei le ali’i. Ua ‘ata Mikaele ma a’apa ane ua fusi le lo’omatua, aua ua ia iloa o le tina lea o Vaitimaleata. Ua ‘ata le lo’omatua ma fa’apea ane, “E, ua pei ua ou toe va’ai i si o’u to’alua o Larry i lenei tama matua’i lalelei.” Ua ‘ata Mikaele ma u’u lima o le lo’omatua, na fa’asolosolo nei le feiloa’iga a Mikaele i le aiga o Vaitimaleata, ma ua saofafa’i ifo nei i lalo.

 

Na tau su’e lava e le teine se avanoa e nofo ai i talane o si ona tina, ua tu nei i luga Petelo ma savali mai i tua i a Susana ma Losalia, lea o lo’o tapena le suaalaisa mo le fa’afiafiag, e logo i ai, ua taunu’u malo fa’aaloalogia i lea afiafi. Na fa’ate’ia Susana ma Losalia, ae va’aia le fiafia o nai tina nei, ina ua fa’ailoa ane i ai e Petelo, o Vaitimaleata ma lana uo lea ua taunu’u ane.

 

Na toe liliu Petelo ma savali i le fale i luma, ae taunu’u ane loa ma Misi, na ona taunu’u lava o Misi, tatagi loa ma lana fa’aumu, “Auoi, ua uma upu, ei, man, u laki, u laki pipo, you, like my sista a, y lucky man.” Ua ‘ata Mikaele ma tilotilo ane i a Misi, ua fa’ailoa ane i ai e Caroline, o le isi lea ona tugane.

 

Na tali Mikaele, “Leai, laki keige oukou, gofo i a ke a’u.” Ua alu le talie a le aiga, aua ua o latou iloa lelei lava e tau le manino le fa’aSamoa a si ali’i. Na toe tali Misi, “you, sau fai umu a, ko ko kalo, vele vao ma’umaga ma’ua ma kelo.”

 

“Se Misi, se nofo ia i lalo, o fea fo’i le mea na e pele pele ai e sau, nofo  ifo i lalo, ua sau fo’i le manogi o lau fagu na inu, ua uma ona ou fai atu i a te oe e tu’u, e leai lava se mea e maua ai, a’o lea lava e fai, nofo ifo i lalo.” O a Petelo lea.

 

E faia pea…