Ads by Google Ads by Google

FAOGO: UA TAUASO LE ALOFA

[E toe fa’atalofa atu i paaga masani a le tatou polokalame i lenei vaiaso, malo le soifua manuia, ae o le toe soso’oina atu lea o le tatou polokalame fa’asolo, lea na gata mai i le vaiaso na te’a nei i le soifuaga i totonu o le aiga o Lafi ma lona toalua o Lesa, ma le la fanau to’atolu.]

 

O le tamaloa o Lafi, e galue o se ali’i fagota i va’a fagota a le faipule o le itumalo, a alu a latou faiva e vaiaso atoa e o ai e fagogota ona fa’atoa fo’i mai lea i le aso Faraile po o le taeao fo’i o le aso To’ona’i. O taimi uma lava la e alu ai Lafi e fagota, e mana’omia ai lava e lona atai’i matua o Koso lana uo o Keli e alu atu la te to’alua i le faiga o a la feau, e pei o le o to’alua i le talaloa, fai to’alua a faigapopo, faiga fafie, po o le o to’alua fo’i i le ma’umaga ae fa’ai’u ai loa i le malae kirkiti a le nu’u i le afiafi, o le vaisu lea a ali’i ia e to’alua.

 

“Sole Mafi, ia e iloa lelei lava le faukuaga e masagi oga kalagoa aku ai lou kama ia ke oe, aua le aumaia au uo i le fale, eke le iloa lava le mea e kula’i mai ai, o le upu a le akugu’u, e uo uo foa, kakau fo’i oga e fa’aaloalo i lou kuafafige e ko’akasi o lo o kauva uma i ai kupulaga o le gu’u i le aulelei ma le akamai i le aoga, aua la e te ola faakamala faapega”, o le ote lea a le fafine o Lesa i lana tama matua o Mafi, atoa ai ma ana upu fa’avi’ivi’i i lana tama teine o Menime, peita’i e le i manatu mamafa i ai Mafi i le ote a lona tina, aua e pele i lona loto lana uo o Keli ua leva ona la mafuta, ua pei lava fo’i o se uso ia te ia, e le gata e tutusa o la loto ae tutusa fo’i mea la te fiafia i ai.

 

“Se Mafi, ou ke vaai aku e i ai se mea o lo o mamafa i lou mafaufau, o le ituaiga makukua lea ua ka i ai i le kaimi legei o le olaga, e le maga’omia le ikuaiga olaga lega o le fa’agoagoa pe popole fo’i, pau lava le mea a kaua e fai o le fiafia ma saili le lumaga’i lelei o le kagaka, e a lega kogu”?, o le talanoa fiafia atu lea a le ali’i o Keli i lana uo o Mafi, a o la nofonofo i le malae kirikiti a le nu’u e fa’atali ai ta’aloga o le afiafi, peita’i o Mafi i le taimi lea, e le o fia talanoa i lana uo i le mea sa talanoa atu ai lona tina ia te ia, ona e alofa ia Keli ina ne’i avea ma itu e sola ai lona manatu i le la mafutaga, ma musu ai e toe alu atu i le latou fale. “Se aua eke ika si a’u uo i la’u kala o le a fai aku, ae ou ke maga’o fo’i ia e lagoga le lagoga lea ou ke lagogaiga i le kaimi gei, oga o gei lava mea o makua ma a lakou faukuaga e le kukusa ma mea o lo o i mafaufau o kakou o fagau, sa kalagoa mai lo’u kiga ia ke a’u agaleila iga ua ka fo’i mai i le kalaloa fai mai, e le kakau oga koe avakua gi a’u uo i le makou fale, oga o lo’u kuafafige o lo o i ai, ma le isi mea, o uo lava ia e gaka i le auala, ae a oo aku loa i le aiga, e ga o makua lava ma le la fagau e kakau oga vaaia i kokogu o le aiga, ae i lo’u mafaufau, ou ke kalikoguiga oe i mea uma o le ka mafukaga”.