Toe faaauau taaloga a teine o le Pago Eagles ma le Tunaula tusia: Ausage Fausia O loo faamoemoe le komiti o loo faatautaia taaloga kirikiti mo le fu'a o lenei tausaga, o se taimi o le vaiaso fou o le a faataunuuina ai le faamaeaina o le taaloga i le va o teine o le Tunaula mai Fagaitua ma le Pago Eagles mai Pago Pago, ona e lei maea le la taaloga i le Aso Lua. O se taaloga mataina lenei taaloga, ina ua ulua'i tata tamaitai o le Tunaula, ma maitauina ai le agai atu o 'ai o le taaloga i le 49 ae na o le 4 pe o le taaloga. I lea taimi, sa valaauina ai e le faiaoga a le 'au a le Eagles se 'time-out' mo lana 'au, ma toe talanoa atu ai i nisi o vaega o le taaloga e le o lelei ona faatinoina. Na maitauina le tulaga ese o le talitua'a a teine o le Aeto, ma sosoo ai a latou pe e tolu ina ua leua le olo i le faate'a faapea ai ma pe e lua na sapoia. I le tulaga o le taaloga, na taofia ina ua atoa ai e 100 a le Tunaula, ae faatoa 11 a latou pe, ona faia loa lea o le faaiuga a le komiti, o le a agai mai le Eagles e tuli ai ua i ai, ma, afai ae i ai se suiga, o le a faapea lava ona toe fetuunai. Ma o le mea moni na tupu, sa i ai le suiga i le taaloga, ina ua tulaga ese le tulai mai o teine o le Aeto ina ua latou tagolima i le pate, ma tulai mai ai a latou 'ai i le 100 ae 15 pe ma taofia ai loa le taaloga i le Aso Lua. O le a i le komiti lava le aso e faamaeaina ai lenei taaloga mataina. Ae i le taaloga i le va o le 'au a Aoa ma Fagaalu i le Aso Lulu, o se taaloga mataina foi lea ona o le tulaga i le taumafaiga a Fagaalu. Na muamua tata le 'au mai Aoa ae talituaa Fagaalu, ma sa i ai si taimi na maitauina ai le lelei o le faamalosi 'au mai o le tapuaiga a Fagaalu ina ia lelei le talituaa ma ia mataalia le faate'a. E 80 'ai o Aoa ae tuli loa e Fagaalu, ma o se taaloga na iloa ai le tulaga finau o Fagaalu, ona e ui sa maitauina lava ua siliga taliiseu la latou taumafaiga, ae sa latou finau pea seia oo ina latou mauaina 'ai e 42, ae maea loa foi ma latou pe. Na taua e se tasi o le komiti ina ua maea le taaloga, ma'imau pe ana i ai nisi pe o le taaloga e mafai ona toe faaopoopo atu i lea taimi, atonu o le a avea lea ma se avanoa lelei e maua ai e Fagaalu 'ai o Aoa, ae ui i lea, o se tala faanoanoa ona e na o le 19 pe o le taaloga, ma manumalo ai loa Aoa i le la taaloga. I le taaloga i le aso ananafi, na feiloa'i ai 'au a alii mai le vaega A mai Pago Pago ma le 'au a Sinapati mai Fagaima, Tafuna. O se taaloga na maitauina ai le tele o se taleni o loo i 'au uma nei e lua. Na vili le tupe ma tulai mai ai Sinapati i le pate ae o Pago i le faate'a. O le ulua'i te'a lava o le taaloga mai ia Pago na ta ai e le tamua a Sinapati le polo agai i le sami ma maua ai ai e lua o le taaloga, ona faaauau ai lava lea ona maua o ai o le taaloga seia oo ina maua le ulua'i pe o le taaloga, ina ua ta faatusa'o e le au a Sinapati le polo ma sapoia ai loa e Pago. Tulai mai ai loa 'ai o le taaloga i le 25 ae 1 le pe. Peitai, o se gaioiga vavave na faia e le talituaa a Pago, ina ua se'e le ta a Sinapati, ma tifa atu ai le polo i luma lava o le malae i se saoasaoaga uiga ese, peitai na pei e fafao i totonu o se ato ina ua aapa atu i ai se tasi o alii talitua'a mataalia mai Pago ma sapoia ai loa le ta, ma tulai mai ai loa pe o le taaloga i le 2, ae tumau pea ai i le 25. O loo i ai le faamoemoe o le vaiaso nei e faataunuuina ai loa le taaloga i le va o Vatia ma le au mai Faleniu, aua o au ia e lua e lei faiaina lava talu ona amata lenei taamilosaga, ae i le agai mai o le au a Pago A i le taimi nei, ua maitauina ai le i ai o se suiga ina ua malolo ai nisi o au malolosi o le taamilosaga e pei o Pava'iai. O loo i ai le faamoemoe o le komiti o le vaiaso fou i le maea ai o le taamilosaga i lenei vaiaso, o le a amata ai loa ona faatulaga au e saili ai au mo le sailiga o le siamupini o lenei tausaga, lea o loo faamoemoe e faia i le aso 16 o Aperila i le malae autu i Tafuna. O le maea ai o le sailiga o le siamupini o le fu'a, ona saili ai loa lea o au e feiloa'i ma au filifilia mai Samoa, lea ua faamoemoe e faia ia taaloga i le taimi o le taligamalo a Amerika Samoa i le Faaaliga o Tu ma Aganuu a le Pasefika i le masina o Iulai o le tausaga nei.  © Osini Faleatasi Inc. dba Samoa News reserves all rights.