Sao o 'Ala
o Faasalalauga' mo fanau ASCC
tusia: Leua
Aiono Frost
Na atoa uma sui
na vala'aulia mai so'o se Ala o Fa'asalalauga Fa'alaua'itele
i se latou vala'aulia ina ia auai e fa'ailoa atu tautua ma ni
tomai e mafai ai ona faigaluega i latou i Nusipepa, Leitio ma
Televise.
E to'a 160 le
aofai o fanau a'oga a le Kolisi Tuufaatasi a Amerika Samoa (ASCC)
ua aofia i vasega a le ELI fa'atasi ai ma Tautua Lagolago ua
atofaina mo i latou sa mafai ona fa'atasia e fa'alogologo.
Sa matele lea
fetufaa'iga i ni ituaiga o tomai e mo'omia, fa'atasi ai ma le
maualuga o aoaoga e mafai ona e ausia e te gafatia ai ona agava'a
lelei mo ia ituaiga o galuega e maua i totonu o Nusipepa, Leitio
ma Televise.
E le gata i lea,
ae sa fesiligia fo'i e le mamalu o le fanau a'oga, se aoga ua
maua e sui tusitala, pu'eata, ma tagata faigaluega uma lava o
lo'o latou vagaia galuega fa'atino uma ina ia mafai ona tu'ufa'atasia
nusipepa i aso ta'itasi ua lomia ai ma fa'atau atu i tagata lautele.
E le gata i lea,
ae ua fa'apena fo'i ona faia mo Leitio ma Televise. O sui sa
auai mai i leitio o le tamaitai o Christina Palelei - Samana
o le KHJ 93.1, Anoano o le KSBS 92.1, Daniel Fiu o le KVZK Televise
ma Leua Aiono Frost mai i le nusipepa a le Samoa News ma Le Lali.
'O lo ua aoga
tele nei folasaga mai sui ta'itasi e tima'ia ai fo'i i matou
i tulaga tau le ituaiga o tagata e mafai ona latou sailia tala
ina ia tusia, ituaiga o fesili e ao ina fesiligia ai tagata o
lo'o mana'omia ona fa'atalanoa, taimi e ao ina fa'asalalauina
ai tala tusia, ae maise o le faiga o le galuega e le faigofie
e pei ona manatu le to'atele e fa'afaitatala lona fa'atautaiga.'
O se talanoa
mai lea a se tasi o tamaititi a'oga sa auai i lenei vasega. O
le susuga Hipa Neria sa avea ma fofoga o le aso i le fa'asologa
o avanoa mo folasaga ta'itasi ae o le tamaitai fa'atonu o le
Student Support Services o Repeka Nuusa, sa ia fa'afeiloa'ia
le mamalu o sui na vala'au mo le latou fa'amoemoe, ae maise sa
ia fa'apupula fo'i le mafuaga ua a'e ai le taofi ina ia faia
lea semina.
'O se fesosaoani
tele lea mo le fanau e una'ia ai o latou agaga ina ia tausailia
pea le atamai, aua le fa'avaivai, ae filiga e saili tomai e agava'a
ai i ni tautua e galulue ai i le lumana'i. O le aoga tele fo'i
lea o nei ituaiga taumafaiga e faia ai semina eseese e o mai
ai ituaiga o tautua eseese ina ia folasia i le fanau a'oga a
latou tautua ma ituaiga o galuega e maua ai i totonu o latou
matata.'
0 se vasega loto
faatasi le fanau a'oga o i ai, aua sa latou saunia fo'i ma se
aiga mamafa matagofie mo malo fai atu fa'atasi ai ma i latou
uma lava.
O folasaga na
pa'u i maota o finagalo i lea fo'i 2 itula na fa'atautaia ai
le semina, na maofa i latou, aua sa leai so latou na manatu,
e maualuga ni fatiga o ia fo'i ituaiga o galuega, ae lauiloa
tele i latou o tusitala, faia fa'atalanoaga, ma sailia le tele
o tala ua tusia ma ata ua fa'asalalauina.
Faafesootai
le tusitala i le imeli ausage@samoanews.com
© Osini Faleatasi Inc. dba Samoa News reserves
all rights.
|