Tala otooto
mai le Fono Faitulafono
tusia: Ausage
Fausia
TULAFONO MO
SE ASO FAAPITOA MO TINA
O le toe tolopo
ai o le iloiloga lea sa fuafua e faataunuu i le aoauli ananafi
a le maota o sui, e iloilo ai le tulafono taufaaofi lea o loo
taoto i le laulauafono a le maota, e avea ai le Aso Gafua lea
e sosoo ma le Aso Sa o tina i tausaga uma, o se aso malolo e
aloaia e le malo, na faaalia ai e le afioga i le tamatai faipule
ia Fiasili P Haleck lona faanoanoa ona o ia fesuiaiga.
I le taimi o
folafolaga i le maea ai o le tauaofiaga a le maota o sui i le
taeao ananafi, na faalauiloa ai e le sui Fofoga Fetalai, le tofa
Agaoleatu Charlie Tautolo, le toe tolopoina o lea iloiloga i
le taeao o le Aso Lua o le vaiaso fou, ona o loo i ai nisi molimau
o loo fia faamautu.
Sa tulai le afioga
i le Tamaitai o le Ao, ia Gaoteote Palaie Tofau ma fesiligia
pe aisea o le a tau faatulaga ai fua lea iloiloga ae le tuu mai
loa i totonu o le maota sei pasia atu e faipule.
Peitai na tulai
Fiasili ma ia faalia, "...le lagona o lo'u faanoanoa ona
e foliga mai o se mataupu e malie lenei mataupu i finagalo o
nisi o alii faipule, ae mo lo outou silafia, o se mataupu taua
lenei, ua leva foi ona ma sauni ma le afioga i le tamaitai faipule
ia Mary Lauagaia M Taufetee) e tuuina atu ni a ma molimau pe
a iloiloina lenei tulafono."
PASIA TULAFONO
FAAVAE AI TUPE ATINA'E O LE FALETUPE O ATINA'E
O le taeao ananafi
na pasia ai e le maota maualuga le tulafono taufaaofi lea na
faaulufale e le afioga i le alii Peresetene o le Senate, tofa
Lolo Moliga, e faavae ai se tupe mo le atina'e o le tamaoaiga
e fesoasoani ai i le faletupe o Atina'e a le malo o Amerika Samoa,
ina ia tini ai lo latou faamoemoe o le u'unaia o pisinisi a le
atunuu ia manuia.
Saunoa le afioga
i le alii Senatoa ia Alo Dr. P Stevenson, o se tulafono taua
tele, aemaise lava o le taumafai lea ina ia unaia le tulaga manuia
o pisinisi i le atunuu, aua o le olataga lea o le malo.
Ua faamoemoe
o le taeao nei e faitauina ai lenei tulafono i luma o le maota
o sui i lona faitauga muamua mo le faia i ai o sa latou faaiuga,
peitai o lenei tulafono taufaaofi na pasia e le Senate e aunoa
ma se latou iloiloga na valaauina.
TOTOGI O TAGI
FAASAGA I LE MALO
O le taeao ananafi
na pasia ai e le maota o sui le tulafono taufaaofi, e faatupe
ai se tagi sa faia e Leasuasu Tupuono e faasaga i le malo, ona
o le maliu o lona toalua i le maota gasegase a le LBJ i le 2001.
O lenei tulafono
e $147,230 na auala mai lea i se poloaiga mai le faamasinoga,
ina ua maua se maliliega i le va o Tupuono ma le malo, ina ia
totogi le aofai e pei ona taua.
Peitai i faamaumauga
ua maua e le maota o sui mai le paleni o le teugatupe lea o loo
faamoemoe e faatupe mai ai lenei tulafono, e na o le $113,000
le aofai o le tupe o loo totoe mai, ma le aofaiga e $200,000
o lo faatulaga mai e le tulafono, e tatau ona tuuina i totonu,
e faaagaga ai mo le totogia o tagi mo ni mea totino ua faaleagaina,
poo soifua foi o nisi ua aafia.
Ua i ai le faamoemoe
o le maota e pei ona saunoa le taitaifono o le komiti o tupe
a le maota o sui, afioga Laolagi Fonoti Savali Vaeao, o le a
pasia pea le tulafono e pei ona ulufale mai ai i le fono, ae
o le paleni o loo totoe, o le a faatupe mai i tupe e totoe mai
i le tausaga tupe e 2008 e pei ona aumai i le tino o le tulafono.
Saunoa le Loia
Sili, afioga Fepuleai Afa Ripley, o le teugatupe e pei ona faatulaga
e totogi mai ai tagi faasaga i le malo, e $200,000 le vaega na
i ai i le tausaga tupe 2008, ua maea ona tuuina atu isi vaega
tupe e totogi ai isi maliliega sa faia e le malo ma tagata, lea
e i lalo mai o le $25,000 lona aofai pe afai o se soifua na aafia,
ma lalo mai o el $5,000 pe afai o ni meatotino na aafia.
TULAFONO E
FAAVAE AI SE OFISA O TURISI
Ua pasia nei
e le maota maualuga se tulafono taufaaofi a le maota o sui, e
faavae ai se ofisa fou mo le vaega o Turisi, ina ia avea ai i
latou o se tasi o ofisa tumaoti mai le malo, ma aiaia ai a latou
galuega faatino aua le manuia o le atunuu ma lona atina'e.
I le tino o lenei
tulafono o loo taua ai, o le ofisa lenei, o le a tofia mai e
le alii Kovana se komiti faafoe latou te faatautaia, ma o i latou
o le a tofia i totonu o lenei komiti faafoe, e tatau ona ia i
so latou agavaa i galuega o le atina'e faa turisi.
Na fesiligia
e nisi o alii Senatoa le afioga i le taitaifono o le komiti o
le Faagaioiga a le malo, afioga Alo Dr. P Stevenson pe aumai
i fea le vaega tupe lea o le a faavae ai lenei ofisa, saunoa
Alo, o le tulafono lenei na aumai e le Kovana, ma o le finagalo
o le komiti ma le fono, "ia pasia le tulafono, fai lea mea
o loo finagalo ia i le Kovana, afai e i ai se tupe faavae ai
le ofisa lelei, afai foi e leai se tupe e faavae ai le ofisa,
lelei."
Faafesootai le tusitala i le imeli ausage@samoanews.com.
© Osini Faleatasi Inc. dba
Samoa News reserves all rights.
|