Faamanino
le faasoasoaina o tupe mo galuega o auala
tusia: Ausage
Fausia
I le tele ai
o fesili o loo nenefu ai nisi o alii Senatoa i le tulaga o loo
faasoasoa ai tupe mai le malo tele, e faatino ai galuega mo auala
i le atunuu, e aofia ai ma talosaga mai nisi o afioaga i a latou
auvai ma tulaga o solo mai luga o mauga, na faamanino ai e sui
o le vaega e pulea galuega ma fesootaiga i luga o ala tetele,
auala o loo latou faasoasoaina mai ai vaega tupe mo galuega a
le malo o Amerika Samoa.
I le iloiloga
a le maota maualuga i le taeao ananafi, na taua ai e le susuga
ia Pat Phung, o le galuega e pei o le solo i Utulei lea e i tua
atu o le Fale Laumei, ua faamoemoe le latou ofisa ina ia taofi,
ae faasafua le tupe lea mo isi galuega e pei o le fausiaina o
auala.
O le galuega
lea, e tusa ma le $5miliona lona tau aofa'i. Mo le galuega o
le auvai a le afioaga o Pago Pago, sa taua e Phung, o le vaega
a le FEMA e faatupeina lea galuega, ae o le galuega i le solo
i Fagasa, ua maea ona tuuina atu i le kamupani a le FLETCHER
latou te faatinoina, faapea ai ma le solo i Fagatogo, lea ua
tuuina atu i le kamupani a le McConnell Dowell latou te faatinoina,
e ese mai i le latou konekarate lea o loo fausia le auala e alu
atu i Fagatogo e tau i Pago Pago i le taimi nei.
Na faamanino
e le faatonusili o le Ofisa o Galuega, afioga Taeaotui Punaofo
Tilei, o le faafitauli i tupe na fuafua e fausia ai le auvai
a Pago Pago, o loo taofi uma i lalo o vaega tupe ia na tuuina
mai e le malo tele, ona o le faaletonu e pei ona tulai mai i
vaega tupe a le vaega o le TEMCO.
Sa ia taua foi,
e le toe i ai lava se isi galuega o nei mau galuega e toe faagaioia
ona o loo taofia uma vaega tupe na fuafua e faatinoina ai, peitai
o galuega ua maea ona pasia ma ua fuafua e amataina ao lei tulai
mai lea faaletonu.
O se agaga fiafia
na faaalia e le afioga i le alii Peresetene o le Senate, tofa
Lolo Moliga i le taeao ananafi, ina ua mafai ona ausia e le tamaitai
o Faleosina Voight se tasi o faailoga taualoa i totonu o le matagaluega,
lea foi na lagolagoina e le susuga Phung lea faaeaea maualuga
ma lana talosaga, maimau pe ana i ai nisi e pei o Faleosina.
Na saunoa le
tofa Lolo, o se tulaga taua le fuafua tatau o le faagasologa
o galuega, ina ia talafeagai ma le taimi ae maise ai o tupe mai
fafo. Saunoa Tilei, mai le $16 miliona lea na tuuina mai e le
malo tele faatino ai galuega mo le fausia o alatetele i totonu
o le atunuu, ma o ia galuega na amata mai i le tausaga e 2005
ma le faamoemoe maea i le 2009.
Sa ia saunoa
foi, e le faapea o le a tapunia galuega i le 2009 ona faapea
lea o le a taofi ai ma galuega faatino.
Ae i le galuega
mo le auala i Visa i Laulii lea foi na toe fesiligia e le afioga
i le alii Senatoa ia Faitauaulava I Sauni i le taeao ananafi,
na saunoa ai Tilei, e le o aofia ai le auala lea i le $16miliona,
ona o lea sa tau saili e le ofisa o galuega se vaega tupe e
faatupe ai lea faamoemoe, peitai o lea ua pasia e le fono faitulafono
le tulafono mo le faasoasoaina o le nonogatupe e $20 miliona
mo le malo, lea o loo aofia ai i totonu i le vaega lea le $200,000
mo le auala i Visa.
O le tau atoa
o le galuega pe tusa ma le $150,000, peitai o loo faasili mo
le faamoemoe ina nei i ai nisi galuega faaopoopo.
I le tulaga o
le auala i Nuuuli e agai atu i le malae vaalele, na taua e le
tofa Lolo, ua maea ona latou feutaga'i ma sui o le 'Federal Highway'
ma o le latou faaaliga ia te ia i le latou fonotaga i Hawaii,
e leai se vaega tupe ua faatulaga e fausia ai le auala e pei
ona taua.
Faafesootai
le tusitala i le imeli ausage@samoanews.com
© Osini Faleatasi Inc. dba Samoa News reserves
all rights.
|