Faamavae atu le Ft. Bragg i nisi o Toa o Samoa tusia; MAJ Tauapai Laupola "Ia outou malaga ma le Atua." O le agaga lea o le faamavaega sa faia ma SPC Hana Moors, CPT Fitiuta Galeai, CPT Pili Faagai ma MAJ Manu Yasuda ina o le a o latou tuua Ft Bragg. Saunoa mai CW5 Totolua "Koko" Yandall, (Leone, AS) o se alo o Samoa ua 36 tausaga o tautua i Vaega a le Ami, o le sapasapaia o alo ma fanau a Samoa e afea ia Ft Bragg ma ona tuaoi, o se tasi lea o luitau mo Samoa uma o aumau i Ft Bragg. O le agaga fo'i lea sa faamamafaina e CSM Tuileama Nua, (savali le 31 tausaga o le tautua) a'o faamavae atu o ia ia SPC Moors ina o tu'uva'a ese atu mo le tafa o taua. O le tamaita'i o SPC Hana Moors sa soifua mai i le afioaga o Pavaia'i ma sa faaiuina mai ana aoaoga i le aoga maualuga a Tafuna. Sa faapea ona malaga atu i la ua ma si ona tina o Faaliga Moors mo Long Beach, Kalefonia ma faauma ai ana aoga ma ulufale atu ai i le Ami. O lea Toa o Samoa o lo'o auai atu o ia i le tafa o taua mo le 15 masina, o se tasi o fitafita a le Delta Battery, 3rd Battalion, 4th Air Defense Regiment. Saunoa mai se tasi o ana ta'ita'i 'au: O SPC Moor o se tagata faamoemoeina tele i le latou vaega. E le gata i lona atamai i galuega a le Ami a'o le agava'a tele i soo se galuega e gafa ma ia. O ana toe upu ae e le'i malaga ese atu, 'Aua e te popole Mama, o lea ou te malosi." Ina ua taunuu i le Tafa o taua, sa ia imeli mai faapea: "A'o faatali le matou vaalele, sa ou nofonofo ma mata'i le matagofie o talanoaga a fitafita ma o latou aiga, o isi o lo'o u'u mau ia lima o i latou o le a o atu i le tafa, o isi o lo'o musu musu atu faapea, aua e te popole, o isi o lo'o feasogi ma fetagisi ua ou lagona ai lava le loto vaivai. Ae ua faate'ia a'u i le tatagi o la'u telefoni ma faapea mai ai le tagata, faatali mai o lea o le a ou taunu'u atu. E foliga mai o se tali lea i o'u lagona faanoanoa ona e leai so'u aiga o faatasi mai i lea taimi. Sa ou le mautonu po'o ai lea ae o le a fo'i le mea ua naunau mai ai e sau i le malae vaalele. Ae ina ua oulua taunu'u atu ma o tatou feiloai, sa ou lagona ai loa le moni ma le lelei o se malaga ae tapua'ia. Faafetai tele atu mai le taele o lo'u fatu ia te oulua ma CSM Nua faapea ia, SFC Alo-Steffany & Dayna ma CPT Galea'i. Ua ou lagonaina lava le moni o lo outou alolofa ia te a'u i lea lava aso, i lo outou sagisagi mai i le malae vaalele, faatasi ai ma upu faamafanafana, "ia e malaga ma le Atua; toaga e tatalo ma aua ne'i galo e telefoni mai i lou tina" Amuia a'u e le gata i talosaga, upu faalaeiau, ae sa oulua (CSM Nua & MAJ Laupola) momoli a'u i le va'alele. O lo outou alofa ua ou maua ai le malosiaga e ola tautua ai ile tafa o taua mo le 15 masina. Ou te tatalo ia faamanuia le Atua ia te outou ae maise o outou aiga. O Hana Toetu Moors." O CPT Fitiuta Galea'i, na malaga atu i Iraq ia Oketopa 2006, ae na toe taliu mai ia Mati 2008. A'o talanoa mai e uiga i lona aulagia ai i le tafa, sa lilo i manatu o le taimi mulimuli lea o le a ia toe vaai ai i si ona tama ae maise o si ona uso pele. E ui sa ia toe malaga mai i Samoa ona o le manu'a o si ona tama faapea ma si ona uso, ma'imau pe ana ou i ai pea i o la toe taimi. Sa malaga atu CPT Galea'i i Iraki o se totino o le 351st Civil Affairs Command, o le vaega o lo'o i Mountain View, Kalefonia. Ae le'i malaga ese CPT Galea'i, sa ia fa'aalia lona agaga faafetai i uso ma tuafafine o lo'o i Ft. Bragg, ae maise i latou sa mafai ona o latou fai afiafi ae le'i malaga ese: O le agaga faafetai fo'i lea sa ia faaleoina e tusa o le malaga atu i Tampa Florida e asia ia SSG (P) Sualauvi Tuimalealiifano ae maise le asiga o SFC Polu i Walter Reed, Falema'i a le Ami, Maryland. O CPT Pili Faagai o le lupe faalele a le afioaga o Futiga, sa toai taunuu i le Ft Bragg, NC i le amataga o Mati 2008 e sauni atu mo le tafa. O ia o se alo e faasino ia Pili Faagai of Futiga ma Pausea Faimeasoo o Fagaitua. Sa faauuina mai o ia i le aoga maualuga a Malisi, i le 1979. O le Aso Sa na se'i mavae atu, na ia tu'ua ai ma le vaega o le 311th Expeditionary Support Command (ESC). O lo'o ia ta'ita'ia le vaega e gafa ma telefoni, komepiuta, ma tulaga uma tau i fesootaiga. Na faaipoipo o ia ia Alana Faagai o Hawaii ma e to'alima nai o la alo. Na saunoa CPT Faagai, "Ua ou maofa i le tautua a'o le faamoopoopo mea o le au uso matutua i Ft Bragg aua lava ia alo o Samoa e afea i latou. O se lesona anoa lea ua ou mauaina mai i le au uso a o se lu'itau mo le to'atele. O 'ai ia o le fuaitau mai le Tusi Sa; "o uo mo aso uma a'o le uso mo aso vale." Sa faapea fo'i ona maua le avanoa e faasoa ai ma MAJ Manu Smith Yasuda o lea e malaga faatasi ma CPT Faagai. O MAJ Yasuda sa soifua mai o ia i Toga ia Sione Lauhaki & Nonu Mahoni, ae sa faapea ona faatamafai e Bill & Carol Smith o San Diego. I le faai'uga o le 1987 sa malaga mai ai ona matua fai i Amerika Samoa e galulue i le FAA. O lea sa aoga ai o ia i Tafuna ma faau'u ai i le 1988. Sa faaauau ana aoaoga i le ASCC ma faapea ona malaga atu i Hawaii ma aoga i le Univesite a Hawaii ma faau'u ai i le 1993 lea sa maua ai ma lona faailoga o le 2LT. O MAJ Yasuda o lo'o ta'ita'ia le sifi po a le 311th ESC. Sa faau'u mai o ia i le aoga a le Ami, o le Command and General Staff Officer College ma sa maua ai fo'i ma lona tikeri o le Master. O lo'o momoli mai ona alofaaga i ana uo uma ae maise lana aoga o Tafuna, ASCC faapea ma le UH.  © Osini Faleatasi Inc. dba Samoa News reserves all rights.