Tala 'oto'oto o le Fono Faitulafono tusia: Fili Sagapolutele PASI AOGA Ua tusi atu le tofa ia Lolo M. Moliga, peresitene o le Senate, i le afioga i le Kovana Sili Togiola Tulafono e faailoa atu ai ua sauni le Senate e lagolagoina ni fuafuaga a le Faigamalo e fesoasoani i le le lava o pasi aoga a le malo. I lea tusi a Lolo o loo ia taua ai faapea ua oo atu i le Senate nisi o faasea mai matua ona o le le lava o pasi ma sa amata ai loa ni suesuega a le Senate i lenei mataupu. O le faaiuga o lea sailiiliga e iloa ai e na o le 10 pasi aoga o loo malu puipuia e feavea'i ai fanau aoga. Ua ia fautuaina ai foi le ofisa o le kovana e toe tagai i le faaaogaina o pasi tua e fesoasoani i le la'uina o fanau aoga i lenei vaitau a'o tau saili se isi fofo mo lenei faafitauli. Saunoa Lolo o tausaga ua fano sa faaaogaina ai e le malo pasi tua e lau au le fanau aoga. O le vaiaso ua te'a sa faailoa mai ai e le Matagaluega o Aoga faapea o loo faatalia e i latou totoga o pasi e le'i taunuu mai fafo. O tele o nei totoa e le maua i totonu o le teritori. PILI PALOTA MO FAIFEAU O le taeao ananafi sa faauluina ai i le Maota o Sui se pili e mafai ai e susuga i faafeagaiga ma o latou aiga, o loo malaga i fafo i galuega tau ekalesia, ona palota mai fafo i palotaga a Amerika Samoa mo le tofi kovana/lutena kovana ma Faipule o le Maota o Sui. O lea pili sa faauluina e Fofoga Fetalai Savali Talavou Ale, Sui Fofoga Fetalai Agaoleatu Charlie Tautolo ma afioga ia faipule ia Laolagi F. Savali ma Mase Akapo. Ina ia agavaa e palota mai fafo e tatau i le susuga ia faafeagaiga ona tauaaoina atu faamaumauga e faamaonia ai o ia o se faifeau i se ekalesia maoti i Amerika Samoa. E manomia foi e faamaonia mai lea Ekalesia o lea faifeau ma lona aiga o loo malaga i fafo e aumau ai ona o galuega faalelotu mo lea ekalesia. O le taeao nei e faia ai le iloiloga a le Maota o Sui i lenei pili ma o le Komisna o Palota, Soliai Tuipine ua valaauina e molimau ai. PERESETENE FOU O LE ASCC O le aso ananafi sa tusi atu ai le tofa Lolo M. Moliga, Peresitene o le Senate, ia Uta Dr. Laloulu Tagoilelagi e faamalo atu i le komiti faafoe a le Kolisi Tuufaatasi i lo latou filifilia lea e Dr. Seth Galeai e avea ma peresitene fou o le kolisi i Mapusaga. O le Aso Lua na sei mavae atu, sa logoina ai e le komiti faafoe o le kolisi ia taitai o le Fono Faitulafono i la latou faaiuga tasi e tofia Dr. Galeai mo lenei tofi taua. I lana tusi sa faamalo ai Lolo ia Uta ae maise le komiti faafoe i lenei faaiuga ma taua ai foi e le Lolo ua nofo saunia le Senate e fesoasoani i manaoga o le kolisi. Faafesootai le tusitala i le imeli fili@samoanews.com.  © Osini Faleatasi Inc. dba Samoa News reserves all rights.