Tala o le
Vaifanua
SN/Le Lali
ALOAIA E LE
ASCC VAIASO MO AUFAIGALUEGA I TOTONU O A LATOU OFISA
O le vaiaso ua
mavae sa faapea ona aloaia ai e le pulega ma le aufaigaluega
a le Kolisi Tuufaatasi a Amerika Samoa (ASCC), ia le Vaiaso mo
i latou e galulue i totonu o ofisa mo le tautuaina o le mamalu
lautele, e ala lea i ni aoaoga sa faataunuuina mo aso e tolu.
O lenei vaiaso
ua faapea ona aloaia i malo i fafo, e ofisa a le malo faapea
pisinisi eseese, ae peitai, o le ulua'i taimi lenei ua mafai
ona aloaia ai e le ASCC ma e pei ona sa saunoa mai le Faatonusili
o le Ofisa o tagata faigaluega a le ASCC, ia Komiti Panama-Emmsley,
o lo'o iai sona faamoemoega o le a faapea ona faataunuuina lea
lava tulaga i tausaga uma.
Na saunoa Panama-Emmsley
i le taua tele o i latou o lo'o galulue i luma o so'o se ofisa,
i le tautuaina o mamalu lautele aua o i latou ia, e iloa ai le
ituaiga aufaigaluega o lo'o galulue i totonu o ofisa taitasi.
Na ta'ua e le
alii o Jason Hollister mai i le vaega a le GEAR-UP, lea sa mafai
ona auai i nei aoaoga, o se tulaga matagofie tele nei aoaoga
sa mafai ona ia auai ai, aua ua mafai ona faamanino mai ia te
ia se auala e mafai ai ona soofaatasi aganuu Samoa ma le aganuu
faa Europa, i totonu o le teritori.
FA'AAUAU PEA
FESOASOANI A LE FAALAPOTOPOTOGA O LE KANESA I TAGATA O AMERIKA
SAMOA
Na fa'aalia e
le susuga Iosefo Ilimaleota ia lona agaga faafetai ona o se fesoasoani
ua mafai ona mauaina mai i le Faalapotopotoga o le Kanesa a Amerika
Samoa (AS Cancer Coalition), e ala i se meaalofa tupe e $500.
Na saunoa le
susuga Ilimaleota, "O taimi o faigata, ma fesouaiga o lenei
sifuaga, o taimi ia e sili ona faagalo gata i le tagata siofua,
aemaise lava pe a alofaina." Sa ia momoli lona agaga faafetai
le Faalapotopotoga a le Kanesa aemaise o le faletua ia Faasegi
Caldwell, ona o lenei fesoasoani.
E le o se taimi
muamua lenei ua faaloloa atu ai a'ao alofa a lenei faalapotopotoga
ia i latou ua a'afia i lenei gasegase faigata, o le kanesa.
O le masina o
Iuni ua faapitoa lea mo i latou ua mafai ona toilaloina lenei
gasegase (Cancer Survivors Month) ma ua valaauina i latou uma
sa mafai ona fesoasoani atu iai le ASCCC ina ia mafai ona auai
mai i polokalama mo le faamanatuina o lenei masina taua.
LE AUAI LE
AOGA MAUALUGA A TAFUNA I LE FA'AALIGA MUSIKA A AOGA I LE ASO
TOONAI
O le Aso Toonai
a taeao, i le 10 i le taeao, o le a faataunuuina ai i le fale
ta'alo a le aoga maualuga a Samoana ia le Fa'aaliga Musika a
aoga maualuluga a le malo, e pei ona masani ai i tausaga taitasi.
O le lona valu
ai nei o tausaga o faataunuuina lenei polokalama mo fanau aoga
i aoga maualuluga, ma o se fuafuaga e matua'i nofo sauni ai aufaipese
a aoga taitasi.
Ae peitai, i
lenei tausaga, ua faalauiloa mai e le susuga John Mailo, lea
o lo'o faauluulu iai vasega musika a le aoga maualuga a Tafuna,
o le a le mafai ona auai mai le latou aufaipese i le fa'aaliga
mo lenei tausaga.
Na saunoa Mailo,
o le afa o le latou aufaipese, o le a faapea ona auai atu i le
su'eina i le suega o le SAT, lea e faataunuuina i lea lava aso.
Na ta'ua e Mailo, e faanoanoa le agaga ona o le a le mafai ona
auai mai i lenei polokalama taua, ma e faamaualalo ai i taitai
o le Ofisa o Aoga, ae peitai, e taua tele lenei suega ua sauni
atu iai fanau aoga mo le Aso Toonai.
Faafesootai
le tusitala i le imeli evaga@samoanews.com.
© Osini Faleatasi Inc. dba Samoa News reserves
all rights.
|