Sui faataunuuga
o tauofoga mo taumafa a aoga
faaliliu;
A. Tuna
Ona o suiga fou
i le pulega ua faafoeina nei le polokalama mo taumafa a aoga,
o lea ua tatalaina ai le avanoa i so'o se pisinisi e faauluina
ni a latou tauofoga mo le konakarate o susu ma vaiinu mo le tausaga
aoga fou.
I tausaga ua
tuana'i atu, o kamupani sa masani ona tauva mo nei konakarate,
sa na'o le Island's Choice - lea na mauaina le konakarate e $1.06
miliona mo le kilivaina o le susu, ma le G.H.C. Reid Inc., lea
sa mauaina le konakarate e $823,000 mo le kilivaina o le vaiinu.
Ae peitai, i
lenei tausaga, ua iai se suiga i tulaga o tauofoga mo nei konakarate,
ona o lea ua faafoeina le polokalama o taumafa a aoga,e se kamupani
mai i fafo, o le Sodexho. O le kamupani foi lea o lo'o faafoeina
foi polokalama meaai mo aoga i Hawaii ma le Iunaite Setete.
I le aso 29 o
Aperila, sa faasalalauina ai e le Ofisa o le Procurement ia se
fa'aaliga mo so'o se kamupani e fia faaooina atu sa latou ofo
mo le kilivaina o taumafa atoa ai ma susu ma vai inu, mo aoga,
mo le tausaga aoga o le 2008 ma le 2009. O le aso 2 i le aoauli
o le aso 29 o Me e faagata ai ona faaulu nei tauofoga.
I tausaga ua
tuana'i atu, sa masani ona tuu eseese ia tauofoga mo susu, vai
inu faapea mea taumafa.
E tusa ai ma
se ripoti mai i le malo, ua fai sina suiga i tulaga o kiliva
mo susu ma vai inu i lenei tausaga. O lea ua talosagaina kamupani
ina ia faaoo atu totogi mo le kilivaina o susu ma vai inu i le
fale teuoloa a le SLP i Tafuna, ae le o aoga, e pei ona sa masani
ai i tausaga ua mavae.
Ua mafua lenei
suiga fou, ina ia mafai ona tu'uina atu le avanoa i isi kamupani,
e ese mai i le Islands' Choice ma le GHC Reid, e auai i nei tauofoga.
I tulaga o taumafa,
o le a faapea ona eseese tauofoga e faataunuu ai, mo se faataitaiga,
e ese tauofoga mo taumafa tu'u aisa, o taumafa tu'u apa, ma tulaga
faapena.
O tulaga na iai
tauofoga i tausaga ua mavae mo taumafa, sa maua e le kamupani
e pito sili ona maualalo lana ofo, mo taumafa eseese e 80 na
faasalalau.
O le 10 i le
taeao nei, ua faamoemoe e faataunuu ai se fonotaga e talanoaina
ai nei mataupu uma ma ua fa'ailoa mai e le pulega a le Procurement,
ona o le taua tele o lenei fonotaga, ua u'unaia ai kamupani po
o pisinisi uma o lo'o fia auai i nei tauofoga, ina ia auai atu.
Faafesootai
le tusitala i le imeli evaga@samoanews.com.
© Osini Faleatasi Inc. dba Samoa News reserves
all rights.
|