Amata ona
talia e le Ofisa Palota talosaga mo sui tauva
tusia: Fili
Sagapolutele
Ua fa'amoemoe
le Ofisa o Palota, e amata atu i le aso 2 o Iuni, ona talia e
lo latou ofisa pepa talosaga mai i le mamalu o le atunuu e fia
tauva mo tofi o le malo i le palotaga lautele ia Novema 4.
O lenei talosaga
e palotaina ai le tofi kovana ma le lutena kovana, sui o Amerika
Samoa i le Konekeresi ma sui o le Maota o Sui o le Fono Faitulafono
a Amerika Samoa.
Ina ua fesiligia
le Ofisa Palota i le aso ananafi, na faailoa mai e le susuga
Filivaa Mageo, le sui Komesina o le Ofisa Palota, le toatele
o le mamalu o le atunuu o lo'o valaau atu pea i le latou ofisa,
i le aso e tatau ona faauluina ai pepa mai sui tauva.
O le tele o nei
talosaga, e ala mai lea i a i latou o loo fia tauva i tofi o
le Moata o Sui.
I se faatalanoaga
ma le Samoa News sa faailoa mai ai e Mageo e faapea o loo faamoemoe
le Komesina o Palotaga, le afioga Soliai Tuipine, e faia sana
faasalalauga faalauaitele i le faaiuga o le masina o Me e faailoa
atu ai i le atunuu le tatalaina o le lesitalaina o suafa o i
latou e fia tauva mo le palota lautele. O Setema 1, 2008 e faagata
ai ona lesitalaina suafa o sui tauva.
A maea ona faatumuina
pepa lesitala ona gafa lea o le Ofisa o Palota ma le galuega
o le faamaonia o agavaa o sui tauva ina ia talafeagai ma le tulafono
tau palotaga a Amerika Samoa.
O i latou uma
lava e fia tauva i tofi palota, e tatau ona vave lesitala o latou
suafa pe a tatalaina le avanoa, ae aua le faatali i le taimi
mulimuli ona e tele tulaga e tatau ona faamaonia e le Ofisa o
Palota.
O loo faamanatu
atu foi e le Ofisa o Palota i le mamalu o le au palota e manaomia
le ID palota e mafai ai ona faia lau palota i fale palota. Afai
ua leiloa lou ID, pe o loo fai maua se ID fou, e tatau ona oo
atu i le Ofisa o Palota e faia ai lea tulaga, ina ia oo atu ia
Novema ua mautu ID palota.
Mo i latou e
agava ona palota ae le'i lesitala ina o latou suafa, o loo uunai
atu pea le Ofisa o Palota ia i latou nei ina ia vave ona lesitalaina
o lou suafa. O le fautuaga foi lea ia i latou ua aveesea o latou
suafa mai le lisi palota ona e le'i palotaga i palotaga e lua
ua fano, ina ia lesitala o latou suafa.
Ua fautuaina
foi e Mageo alo o le atunuu e faauu mai i aoga maualuga ma le
Kolisi Tuufaatasi ae o loo faamoemoe e malaga i fafo e faaauau
aoaoga, ina ia lesitalaina o latou suafa, ina ia mafai ai ona
agavaa e palota mai fafo.
O le aso foi
ananafi sa faailoa mai ai e Mageo o loo solosolo lelei pea galuega
o loo faia nei i le fausia o se falefou mo le Ofisa o Palota
i Tafuna. Afai e oo atu ia Iuni pe o Iulai ua maea lea galuega,
o le a sii atu ai loa le ofisa aua le faafoeina o palotaga ia
Novema.
Ae afai e maea
lenei galuega ae ua tu lalataa i palotaga, e faatali la le Ofisa
o Palota se'i maea le palota ona faatoa sii lea i lo latou nofoaga
fou, e fogafale lua, ma o loo faatupe ina lea galuega i vaega
tupe mai le fetarale.
Faafesootai
le tusitala i le imeli fili@samoanews.com.
© Osini Faleatasi Inc. dba Samoa
News reserves all rights.
|