Ads by Google Ads by Google

Gaogao fata & pusa’aisa faleoloa, tuai va’a oloa

O lo ua iloga le fa’afitauli tele ua amata ona va’aia i faleoloa ma fefa’ataua’iga, ua gaogao mai fata o faleoloa ma latou pusa’aisa i le tele o oloa e masani ona alumia i le fanauiti, fa’apea fo’i le tausiga o le soifua o le mamalu lautele.

 

Ua tau le va’aia le tutumu o fata o faleoloa e tala ai mea’ai a le fanauiti ma tina failele pe ma’itaga, ma ua ala ai ona fa’afesiligia. O le tali na aumaia, “Ua tuai mai va’a oloa lea e la’u mai ai oloa a faleoloa si’iatoa, ma e o atu matou aumai ai matou pusa oloa e fa’atau atu.”

 

O le fesiligia fo’i o kamupani oloa si’i atoa lea e faia ai latou oka, ua iloa ai, fai si tele o kamupani ua latou faia oka oloa si’i atoa mai fafo. Na vala’au i le telefoni a lea faleoloa tele, ua latou fa’ailoa mai, “Ioe o le tele o afaina o oka a faleoloa o lo’o la’u atu iinei a latou oloa, ua le to’ai taunu’u mai va’a oloa sa fa’atulaga e tatau ona ofi mai i le tatou uafu i le aso 19 Ianuari. Lea la ua tatalia pea, ae foliga mai o le taimi ua fa’ailoa mai po’o lea fo’i vaiaso, pe a le to’ai taunu’u mai i le fa’ai’uga o lenei vaiaso,” o le tala lea a se sui o le faleoloa a Kruse i Leone a talia maia le telefoni ananafi.

 

Ua vala’au fo’i i le Aveina, ae fa’ailoa mai lava, “O le tuai o le va’a oloa tele lea e sau mai Hawaii, lea ua fa’aletonu ai le sapalaia o le mamalu lautele i nei oloa e mo’omia, ma e ui lava ina le maua oloa na, ae ua taumafai fo’i nai tagata e suia latou fa’atauga i isi oloa o lo’o maua pea i luga o matou lisi o oloa  fa’atau atu.”

 

Peita’i, e le gata i na faleoloa tetele ua masani ai le atunu’u, ae fa’ailoa mai e isi fai faleoloa Korea, “O matou oloa e ‘au mai sa’o, ae leai se va’a” ua tuai mai.

 

O le tele o va’a oloa ua tuai ona taunu’u i Amerika Samoa, ona o le tulaga o feeseseaiga i le va o tagata faigaluega ma puleaga o uafu i Los Angeles/Long Beach ma San Francisco i Kalefonia, ae maise Seattle.

 

O nisi o oloa e mo’omia tele ua aofia ai, Aisikulimi, Susu, 100% juice o le tele o ituaiga e fa’atauina mo le WIC, ma ituaiga o mea’ai tu’u apa ua e le va’aia i luga o fata.