O le taumafai ina ia fa’asoa i le atunu’u auala eseese ma metotia e mafai ai ona tausia le soifua maloloina, aemaise lava le taumafai e tete’e atu i le gasegase o le ma’i suka, o le autu lea o se aoaoga o lo o fa’agasolo i le nofoaga autu a le Matagaluega o le Soifua Maloloina i Fagaalu mo le umi e 6 vaiaso.

O lenei aoaoga o lo o fa’atautaia lea e le Vaega o le “Diabetes Control & Health Prevention Programs” a le Soifua Maloloina, i lalo o le ta’ita’iga a le faletua ia Iutita Sataua, o ia lea o lo o fa’auluulu i ai le Polokalame.

I se fa’atalatalanoaga ma le Samoa News i le aso ananafi, na fa’amanino ai e le faletua ia Sataua le taua tele o aoaoga o lo o fa’agasolo, ina ia mafai ai ona fa’asoa atu le feau i soo se tasi o le atunu’u e aofia ai tagata matutua o lo o a’afia i le gasegase o le ma’i suka, ina ia mata’ala i soo se auala e fa’agaioi ai le tino ina ia mafai ai ona tete’e atu i lenei fa’ama’i le pipisi mo i latou e le’i a’afia ai, poo le fa’atumauina fo’i o auala e fesoasoani ai e taofiofi le fa’atupulaia o le gasegase mo i latou ua a’afia ai.

O le vaiaso na te’a nei na amata ai le ulua’i aoaoga mo le umi e 6 vaiaso, lea ua muamua fa’amanuiaina ai le Vaega o Tama ma Tina o loo galulue i le Vaega o le Toe Afua Mai Matua (TAMM), o se lala lea o le faalapotopotoga o Tagata Matutua, ma le fa’amoemoe a mae’a lenei aoaoga, ona fa’agasolo fo’i lea o le aoaoga lona lua.

“O le taua o aoaoga nei, e le gata e si’itia ai le tomai o sui e to’alua o le Soifua Maloloina ina ia maua ai a laua tusi pasi ma avea ai i latoua ma Faiaoga Faapitoa mo mataupu o le soifua maloloina, ae o se avanoa lelei fo’i lea e fa’asoa atu ai le feau i tagata uma o le atunu’u ina ia tausisi i le ola soifua maloloina”, o le saunoaga lea a Sataua.

O le a’oa’oga o loo fa’agasolo mo le TAMM, e na o le aso Lulu lava e fa’atinoina ai aoaoga, ma le fa’amoemoe o isi aso o le vaiaso e tatau ona fo’i atu ai i latou sa auai i le aoaoga e fa’atino gaioiga ma auala e fa’amalosi tino ai i tua i aiga, ina ia maua se aoga o le aoaoga ao le’i toe foi mai ai i le aso Lulu o le isi vaiaso e sosoo ai mo le toe fa’aauauina o le aoaoga.

O se tasi o auala na taua e le faletua ia Sataua o lo o taumafai malosi ai le latou Vaega e fa’ailoa i le atunu’u, o le tatau lea ona vave vaai le foma’i i soo se taimi ina ia mautinoa ai, e le o i ai se fa’aletonu i le tino.

“O le tele o tagata i le taimi nei, fa’atoa o lava e vaai le foma’i i le taimi e ma’i ai, ae oo atu i le taimi lea, ua tuai se fofo mo le gasegase ua a’afia ai, ae o le fautuaga malosi i le atunu’u, tusa lava pe e te le gasegase, alu pea e vaai le foma’i ina ia mautinoa o lo o malosi pea le tino ma maua le soifua maloloina lelei”, o le fautuaga lea a Sataua.

O le tatala aloaia ai o le ulua’i aoaoga lea o lo o fa’agasolo i le taimi nei i le vaiaso na te’a nei, na tauaao aloaia atu ai e sui o le Vaega e Puipuiga Gasegase le Pipisi i Amerika ni fa’ailoga taualoa i le Faatonusili o le Matagaluega o le Soifua Maloloina ia Motusa Tuileama Nua, fa’apea ai ma lona sui lagolago ia Fara Utu i se sauniga fa’apitoa.

Saunoa Sataua e faapea, o fa’ailoga taualoa na tauaao atu ia Motusa ma Utu, sa fa’atinoina e fa’ailoa ai le fa’afetaia o le galuega o lo o fa’atinoina e le Soifua Maloloina a Amerika Samoa, o le fa’alauiloaina lea o lapataiga ma ta’iala i le atunu’u i auala eseese e puipuia ai i latou mai le a’afia i le tele o fa’ama’i le pipisi.