138 Au Fa’au’u Leone - “Lafulafu a Tama Seugogo!”
O lenei tausaga ua mata’ina le tapula’a ua la’asia e le vasega fa’aiuaso e tusa o se lipoti na fofogaina e le pule a’oga, aua sa lu’ia lo latou soifua a’oa’oina ma taumafai ina ia ausia le 30 avanoa fa’asikolasipi i fafo e le latou faia’oga, lea na avea ma latou fofoga autu, Mrs Roxanne Sua’ava-Salave’a. O le mea sili ona taua, ua latou fa’aluaina lea aofa’iga ma e 65 sikolasipi i Iunivesite ma Kolisi i fafo. Peita’i, e na’o le tasi le latou sikolasipi mai le tatou Malo i le ASCC lea sa taua’aoina i le tamaitai na avea le togisilia, Ramona Delsey Tinae o Vailoatai.
Ua moni ma taunu’u ai toe tima’iga a le faia’oga i le vasega fa’aiuaso, “Ia lafulafu a tama seugogo!”
“Po’o le a lava le faigata, ia taula lau va’ai ma ia fa’aautu au gaoioiga uma i le autu o lou fa’amoemoe, ia maua le ‘ai na e tausinio ai. E ui ina va’aia lou pagatia ma lou palapala, ae o le seuga ia le fo’i fua mai aua o lo’o to’atele i latou i le faleva’ai, ae maise o le tapua’iga o lo’o tu’i le mulipapaga ma tatalia ou faiva i le val, pe maua se gogo, pe fo’i fua mai le tausinioga.”
Saunoa fo’i le afioga le Kovana Sili, Lolo Moliga, “O a taeao, ua avea lea mo i latou o e ua latou talitonu maumaua’i i a latou miti matagofie ma galue e fa’atino.”
Mai lea vasega atoa e to’a 138 ua togisilia ai le tama’ita’i o Ramona Tinae, ae tulaga lua ai le tama’ita’i o Olynn Ranandy Ara.
O Ramona e 17 ona tausaga, o lona GPA e 4.0 ma lana SAT e silla i le 1000+, ma e na’o i la’ua ma Chloe Tuaua sa ausia lea maualuga o le SAT, ae o lana ACT e 19. Ua sauni o ia e fa’aauau ana a’oa’oga i le University of Maine [Farmington] lea fo’i e maua ai lana sikolasipi e $32,000 ma le isi ana sikolasipi Diversity e $16,000. O lo’o ia filifili po’o fea lava o le a sili, aua e 11 lelei ona avanoa fa’asikolasipi i fafo o lo’o ua maua, ae o lo’o fa’aopoopo i ai ma le ASCC, ua atoa ai le 12.
O le tama’ita’i na tulaga lua ua ia mauaina avanoa fa’asikolasipi e lima mai Kolisi e lua ua talia mai ai ana talosaga i fafo: Fisher College ma Hilbert College. Mai le Fisher e $17,000 lana sikolasipi, ae o Hilbert e $51,000.
Marie Theodora James Ta’ai e fitu Iunivesite i fafo ua talia mai ai o ia, ma o le maualuga o le Sikolasipi ua ia maua ua ofoina mai lea e le Dominican University e $96,000. Mai le Washington College e $60,000 mai le Mason George University e $32,000 mai le Mills College e $23,000 ma isi avanoa e maua mai i American Samoa Public Health Award e $500, Hawaii Pacific University e $10,000, ma Bethany College e $14,500.
O Rami Fatialofa ua ia mauaina avanoa e tolu mai Kolisi i fafo, Dean College e $22,000 lana sikolasipi ua maua mai ai, Gustavus Adolphus College e $90,000 le Deans ae 10,000 le Paul L. Rucker sikolasipi.
Lillian Pritchard e fa ona avanoa ua maua mai i Iunivesite ma Kolisi i fafo. O le aotelega o ana sikolasipi mai le Hilbert College e $45,000. O le St Martin’s Univeristy e $48,000 ma sikolasipi ua ofoina mai Franklin Pierce College e $84,000 a’o le Deans College e $21,000.
E to’a sefulutasi le aofai o isi tamaiti fa’au’u na latou ausia fo’i avanoa fa’asikolasipi e a’oa’oga ai i fafo e aofia ai:
• Sheralyn Leota e lima Iunivesite sa maua mai ai ona avanoa i le aotelega o ana sikolasipi e $154,500.
• George Fuimaono e tolu Iunivesite ma Kolisi ua talia mai ai o ia i ana avanoa fa’asikolasipi pe a tu’ufa’atasia e $123,000.
• Sulufaleese Marantha Matai i lona avanoa mai le Dean College e $22,000.
• Joseph Aguimbag i lona avanoa i Fisher College e $17,000 e aoga ai.
• Julioray Nofoa i lona avanoa i le Fisher College e $17,000. e a’oga ai.
• Marqueritta Tanuvasa i lona avanoa mai le Saint Martins University e $60,000.
• Henry Tupua Sakila i lona avanoa o Garden City Community College i lona avanoa fa’asikolasipi mai le Football, ma lana sikolasipi mai le Malaga o Toa [CA] e $500.
• Jeannette Fa’ataualofa i lona avanoa mai le Dean’s College ma le Fisher College e tu’ufa’atasia e $39,000.
• Shania Fiu i lona avanoa mai le Fisher College e $17,000.
• Vegas Pearson mai le Independence Community College e ta’alo ma a’oga ai Sport Management Scholarship.
• O Missio-Dei Otineru i lona avanoa mai le Richard and Litia Lobendahn Foundation e $500.
• Juliano Faaniko i lana avanoa mai le University of South Carolina e ta’alo ai i le Football ma a’oga.
• Faith Loia i lona avanoa mai le JROTC Essay Winner.
Na patipatia galuega uma a le fanau fa’au’u e le vasega o latou vala’aulia fa’apitoa, ae maise o latou matua ma aiga. Fa’afetaia fo’i le galuega fa’atino a Faia’oga ma le Pulega o le Aoga Maualuga i Leone, aua sa faia lava o outou tiute e le aunoa.