Aloaia e le USCG tautua a ni isi o Leoleo i le atunu’u

ausage@samoanews.com

O le vaiaso na te’a nei na tu’u aloaia atu ai e sui o le Ofisa o le Puipuiga o le Gataifale a le malo tele (US Coast Guard) ni fa’ailoga taualoa, e taualoa ma aloaia ai le tautua sa fa’atinoina e Leoleo mai le Ofisa o Leoleo a le atunu’u, ona o se mataupu na tula’i mai i le amataga o le tausaga nei na mafai ona latou galulue fa’atasi ai.

 

O le ali’i Kapeteni ia Capt. Michael E. Long, o se ta’ita’i sinia i le ofisa a le USCG i Honolulu, na taitaia maia le latou au malaga.

 

O se sauniga puupuu sa faia i le potu fono o le Ofisa o le Komesina o Leoleo, tofa Le’i S. Thompson, na mafai ai ona tu’u aloaia atu fa’ailoga taualoa mo Leoleo e to’afa. O i latou ia e aofia ai le Komesina o Leoleo, o le Sui Komesina o Leoleo, afioga Falana’ipupu Ta’ase Sagapolutele, ma ali’i Leoleo Su’esu’e e to’alua ia Det. Sili Sea ma Det. Misi Leo.

 

Na taua e Capt. Long i lana saunoaga e fa’apea, o fa’ailoga taualoa e fa e pei ona tauaao atu i sui o le Ofisa o Leoleo a Amerika Samoa, o se fa’ailoga lea e fa’afetaia ai la latou galuega sa faia e fesoasoani ai i le USCG, i le taimi na tula’i mai ai le fa’alavelave lea na maliu ai se tagatanu’u o Amerika i luga o se va’a fagota Asia i Amerka Samoa i le masina o Fepuari o le tausaga nei.

 

Na taua atili e Capt. Long e fa’apea, o le atamai ma le vave o gaioiga a Leoleo i Amerika Samoa, na mafai ai ona maua le tele o fa’amaumauga ma mea molimau na mulimuli ane fesoasoani i le latou su’esu’ega.

 

Sa ia fa’afetaia le Komesina o Leoleo e tusa ai o le tautua a Leoleo i Amerika Samoa, ma ona moomooga ina ia fa’aauau pea lenei tautua ina ia mafai ai ona fa’alautele le malamalama i le fa’atinoina o le galuega.

 

Na fa’afetaia e le afioga i le Komesina o Leoleo sui o le USCG ona o meaalofa taualoa ua mafai ai ona aloaia le tautua a sui o le Ofisa o Leoleo a le atunu’u.

 

Sa ia taua e fa’apea, o fa’ailoga ua latou taulimaina, o se sitepu lea e unaia ai le tatau ona siitia le auaunaga i soo se taimi e fa’atino ai le tautua mo le atunu’u.

 

O le fa’alavelave e pei ona aloaia ai le tautua a Leoleo o le atunu’u, na tula’i mai i luga o le va’a fagota a le American Eagles, o se va’a fagota Asia ae galulue ai tagatanu’u eseese. O le ali’i mai Amerika na maliu, na maua lona tino i totonu o se potu o le va’a, fa’atasi ai ma ni manu’a tuga i le ua, lea e masalomia sa fa’aaoga i ai se a’upega maai.

 

O galuega sa fa’atinoina e Leoleo a le atunu’u ia ua tula’i mai lenei fa’alavelave, e aofia ai lo latou fesiligia o sui uma o le auva’a, atoa ai ma le taofia lea o le malaga ese atu o le va’a ma le atunu’u, se’i vagana ua mae’a suesuega sa faia.

 

Ina ua fesiligia e le Samoa News ia Capt. Long i le tulaga ua i ai le suesuega o lenei mataupu, sa ia taua ai le le mafai lea ona ia talanoa mai e fa’atatau i le mataupu, ona o lo o fa’aauau pea i le taimi nei suesuega a le USCG.

 

Sa ia taua fo’i le o o mai lava i le taimi nei, e leai lava se isi ua masalomia pe ua molia fo’i e tusa ai o lenei fa’alavelave.

Comment Here