Ads by Google Ads by Google

Aloaia malo tautua a Tama ma Tina matutua o le atunu’u


Le tina matua ia Hana Thompson lea na ia maua le fa’ailoga taualoa mo le tagata matua o lo o galue pea i le polokalame a le TAOA. [ata AF]

Le taimi na tauaao atu ai e le matua ia Pulu Ae Ae Jr lea meaalofa i le sui o le aiga o le tama matua ia Ioramo Ioramo, 98 tausaga le matua, o ia lea na ia maua le fa’ailoga faapitoa mai le tamaitai faipule ia Aumua Amata mo le tagata pito matua i le atunu’u. [ata AF]

Le afioga i le ali’i senatoa ia Galea’i M. Tu’ufuli lea na ia maua le faailoga faapitoa mai le kovana ia Lolo Matalasi Moliga, o le tagata faigaluega a le malo pito umi lana tautua. [ata AF]
ausage@samoanews.com

O se tasi o vaega o le polokalame mo le fa’atauaina o tagata matutua i le vaiaso na te’a nei, o le tauaaoina atu lea i ai o fa’ailoga taualoa mai vaega eseese o le malo e aloaia ai la latou tautua i totonu o le atunu’u mo le tele o tausaga.

 

E 4 fa’ailoga faapitoa sa mafai ona tapenaina mo tagata matutua, lea na saunia e vaega eseese o le malo e aofia ai le Faipule i le Konekeresi ia Aumua Amata, o le Kalapu a le Liona, o le Rotary Club, faapea ai ma le afioga i le kovana sili ia Lolo Matalasi Moliga.

 

O le Tama matua ia Ioramo Ioramo, 98 tausaga le matua na ia mauaina le fa’ailoga faapitoa o le tagata pito matua i le atunu’u, lea na saunia e le afioga i le tamaitai faipule ia Aumua Amata. O le susuga i le matua ia Pulu Ae Ae Jr na tauaaoina le fa’ailoga mo le susuga a Ioramo, lea na talia e se tasi o ona alo le mealofa fa’apea ai ma le meaalofa tupe.

 

O le fa’ailoga lona lua sa fa’apitoa mo le tagata matua o lo o fa’aauau pea ona galue i le polokalame a le Ofisa o le TAOA, lea na maua e le Tina matua ia Hanna Thompson, 91 tausaga le matua, ae na saunia e le Rotary Club.

 

O le fa’ailoga lona tolu sa faapitoa mo le tagata matua o lo o tautua pea i le atunu’u, lea na tauaaoina atu i le afioga a Pulefa’asisina Palauni Tuiasosopo, ae na saunia e le Kalapu o le Liona i Amerika Samoa.

 

O le Peresetene o le Kalapu a le Liona ia Chris King na ia tauaaoina atu lenei foa’i mo le afioga a Tuifa’asisina. Saunoa King e fa’apea, o le Kalapu o le Liona o se tasi lea o Kalapu pito to’atele ona totino i le lalolagi, lea ua silia i le 1.3 miliona le aofa’i ua i ai, ma o le latou manulauti o le tautua lea mo soo se tasi.

 

O le fa’ailoga lona fa sa faapitoa lea mo le tagata faigaluega a le malo e pito umi lana tautua, lea na saunia e le afioga i le ali’i kovana ia Lolo Matalasi Moliga, ma sa tauaaoina atu i le afioga i le ali’i Senatoa mai le itumalo o Manu’a #1, le afioga i Le na Muaiaso ia Galea’i M. Tu’ufuli.

 

O le afioga i le ali’i kovana ia Lolo na ia tauaaoina le fa’ailoga ia Galea’i, ae o lona faletua ia Cynthia Moliga na fa’aulaina le ali’i Senatoa.

 

Na taua e le tofa Fiu Saelua sa fai ma fofoga o le afioga i le ali’i kovana e fa’apea, o le tausaga e 1960 na amata mai ai le tautua a Galea’i i totonu o le malo o Amerika Samoa seia oo mai lava i le taimi nei.

 

O le 1960 na amata ai lana tautua o se Leoleo fa’atautoina a le malo i le Matagaluega o le Puipuiga o le Saogalemu Lautele, ae o le tausaga e 1966 na tofia ai loa o ia e avea ma Pule Leoleo, ina ua molimauina lona fa’amaoni atoa ai ma lona sogasoga i le fa’atinoina o lana galuega.

 

O le mae’a ai o lana tautua i le Ofisa o Leoleo na galue ai loa o ia o se Faiaoga mo le Kolisi Tu’ufa’atasi mo tausaga e 7, mai le 1976-1982, ae o le tausaga loa e 1985 na tofia ai loa o ia e le afioga i le ali’i Kovana ia Lutali e avea ma Faufautua Faapitoa mo le Ofisa o le Kovana faapea ai ma le Kovana.

 

Na si’itia pea lana tautua ma filifilia ai loa o ia e avea ma Komesina o Leoleo i le tausaga e 1985 e oo atui le tausaga e 1992, ae i le tausaga e 1993 e oo atu i le tausaga e 2001, na filifilia ai loa o ia e le Itumalo o Manu’a #1 e avea ma o latou Senatoa.

 

Ina ua mae’a lana tautua i le maota maualuga mo tausaga e 8 mo lona itumalo o Manu’a #1, na tofia ai loa o ia e lona Itumalo e avea ma o latou Kovana Itumalo mo le 4 tausaga, talu mai le 2001-2004.

 

O le mae’a ai ona galue o ia o le Kovana Itumalo mo Manu’a#1, na toe filifilia ai loa o ia e le itumalo e toe avea ma o latou Senatoa talu mai le tausaga e 2009 seia oo mai lava i le taimi nei.

 

Na fa’afetaia e le Kovana ia Lolo le tautua a Galea’i mo le malo ma le atunu’u, ina ua avea o ia o se tasi o Tama matua o lo o fa’aauau pea ona tautua mo lona aiga, itumalo, atunu’u ma le malo i le taimi nei.

 

Na fa’aalia e ni isi o Tama ma Tina matutua lo latou fa’afetaia o le malo, ona o le amanaiaina o le tautua a tagata matutua i totonu o le malo i tausaga ta’itasi.

 

“O se tasi lenei o polokalame taua o lo o fa’aauauina pea e le malo i tausaga ta’itasi, o le amanaia lea o le sao o Tama ma Tina matutua i le atunu’u. O ni isi o atunu’u o le lalolagi ua latou le toe fa’atauaina tagata matutua, ua i ai lo latou talitonuga ua le toe aoga tagata matutua i soo se galuega i le malo, ma ua ma’imau fo’i le taimi e toe amanaia ai i latou, peitai’ o Amerika Samoa, e le o fa’apena lana silasila, o loo fa’aauau pea ona manatua sa matou tautua fa’atauva’a sa ofoina atu e atina’e ai le atunu’u i tausaga ua mavae, e fa’afetaia ai ta’ita’i o le atunu’u ma le atunu’u atoa, ona o le amanaiaina o so matou leo fa’atauva’a”, o le saunoaga lea a le tama matua ia Leilua Seilala, 73 tausaga mai le afioaga o Tafuna.