Ads by Google Ads by Google

Aloaia tautua o ni ali’i na faasaoina le soifua o le ali’i Pailate ia Silila Patane


Ali’i se to’atolu sa fesoasoani i le fa’asaoina o le soifua o le ali’i Pailate ia Patane, susuga Joseph Fa’agata, Sunia Davetawalu ma Timoci Loloma i le taimi na maua ai a latou fa’ailoga taualofa mai le Matagaluega o Pulega o Uafu ma Malaeva’alele. [ata AF]

Le ali’i Pailate ia Silila Patane i le taimi na lulu aao ai ma le Kovana ia Lolo Malatasi Moliga e aloaia ai lana tautua mo le Matagaluega o Pulega o Uafu ma le Malaeva’alele mo le silia i le 50 tausaga. [ata AF]

Sui o le matagaluega o Pulega o Uafu ma Malaeva’elele i le taimi na aloaia ai la latou tautua i le taeao ananafi. [ata AF]

Taitai o le malo i le taimi na fa’ataunu’uina ai le sauniga e aloaia ai le tautua a ni isi o tagata faigaluega a le Matagaluega o Pulega o Uafu ma Malaeva’alele i le taeao ananafi. [ata AF]
ausage@samoanews.com

O se sauniga faapitoa sa fa’ataunu’uina i luga o le potu fono o le Ofisa a le afioga i le ali’i Kovana ia Lolo Matalasi Moliga i le taeao ananafi, na aloaia ai e le Matagaluega o Pulega o Uafu ma Malaeva’alele tautua a ni isi o ana tagata faigaluega e to’atolu, e mafua mai i se galuega lelei sa latou fa’atinoina e ala i lo latou fa’asaoina lea o le soifua o le ali’i Pailate ia Silila Patane ina ua pau o ia ao fa’atinoina ana galuega.

 

O le susuga i le ali’i Tiakono ia Malaki Timu na ta’ita’ia le sauniga lotu puupuu i le tatalo, ma ia fa’atauaina ai le feau mai le Tusi o Salamo e fa’atatau i soo se tagata faigaluega e fa’alagolago lona soifua i le Atua, tusa lava poo a faigata ma fa’afitauli e tutupu i le galuega, e le mafai ona tu’ulafoaina lea tagata e le Atua.

 

Na fa’amanino e le Faatonusili o le Pulega o Uafu ma Malaeva’alele ia Taimalelagi Dr. Claire Poumele i lana saunoaga e fa’apea, o se fa’alavelave na tula’i mai i le aso 13 Me a o fa’atinoina galuega a le ali’i Pailate ia Patane ma ni isi o le aufaigaluega e to’atolu, lea ua mafua ai ona manatu le Matagaluega e aloaia le galuega lelei sa fa’atinoina e ni isi o ana tagata faigaluega e to’atolu sa i ai i le taimi na tula’i mai ai le fa’alavelave.

 

O ali’i faigaluega sa maua fa’ailoga taualoa fa’apea ai ma ni meaalofa tupe mai le Matagaluega e aofia ai le susuga ia Sunia Davetawalu ma Timoci Loloma, o ni tagatanu’u ia mai le atunu’u o Fiti o lo o galulue fa’akonekarate i le Pulega o Uafu ma Malaeva’alele, faapea ai ma le susuga ia Joseph Fa’agata.

 

Na fa’amanino e Taimalelagi e fa’apea, soo se taimi e ulufale mai ai se va’a i totonu o le uafu, e mana’omia ai lava se va’a toso va’a na te fa’aulufaleina maia lea va’a tele i totonu.

 

“O le aso 13 Me na alu ai le va’a toso va’a o le Sa’ilele e fa’aofi mai se va’a tele na ulufale mai i totonu o le uafu. O faiga masani a le ali’i Pailate ia Patane ma lana aufaigaluega, soo se taimi e fa’apipi’i atu ai le Sa’ilele i le tino o le va’a tele, e fa’apau mai ai le apefa’i mai luga o le va’a tele aga’i i lalo o le Sa’ilele, ona a’e ai loa lea o le Pailate i luga ina ia fesoasoani i le Kapeteni o le va’a tele mo le fa’aofiina atu o le va’a i totonu o le taulaga”, o le saunoaga lea a Taimalelagi.

 

“A o a’e le ali’i Pailate ia Patane i luga o le apefa’i, o le taimi lea o loo tutu atu ai i lalo lana aufaigaluega e to’atolu ma vaavaai atu i ana gaioiga uma o lo o faia, ae ina ua afa le a’e a Patane i luga o le apefa’i, sa fa’afuase’i ona motu atoa mai i lalo le apefa’i ma pau mai ai loa o ia i lalo, peita’i na mafai ona sapo o ia e Sunia, Joe ma Tim, ma mafai ai ona fa’asaoina lona soifua, o le mafua’aga lena ua manatu ai le Matagaluega, e tu’uina atu ni meaalofa taualoa i latou nei e to’atolu sa fa’asaoina le soifua o le ali’i Pailate, atoa ai ma se meaalofa mo le Pailate e tusa ai o lana tautua mo le Matagaluega ma le malo ua silia i le 50 tausaga”.

 

“Ae tusa ai ma fa’amaumauga o lo o i ai i le Matagaluega, fa’atoa toe tula’i mai lava lea o se fa’alavelave fa’apenei talu mai le fa’alavelave na tula’i mai i le tausaga e 1963, lea na maliu ai se ali’i Pailate i le fa’atinoina o le galuega lava lea e tasi sa fa’atinoina e Patane”.

 

Na fa’afetaia e Lolo le fuafuaga ua faia e le Fa’atonusili ma lana matagaluega, lea ua mafai ai ona aloaia tautua a ni isi o le aufaigaluega, ma o ituaiga fuafuaga lelei ia e atagia mai ai le amanaia e le malo o ana tagata faigaluega.

 

“E le faigofie la outou galuega o lo o fa’atinoina i aso ta’itasi, e le gata o se galuega e afaina ai le soifua, ae o iina fo’i o lo o sasa’a mai ai alagaetupe o lo o fa’atupe ai le tautua a le malo”, o le saunoaga lea a le ali’i kovana.

 

Na fa’afetaia e le susuga a Patane le agalelei o le Atua ua mafai ai ona fa’asaoina o lona soifua, e ala i le galuega fesoasoani sa fa’atinoina e lana aufaigaluega.

 

“E ui o se galuega ua matou masani ai i aso ta’itasi, peita’i e i ai lava le taimi e lamatia ai le soifua o le tagata”, o le saunoaga lea a Patane.

 

Sa ia taua atili fo’i lona fiafia pea e fa’aauau lana tautua mo le malo o Amerika Samoa, i le tuana’i ai o tausaga e 50 o tautua mai pea mo le malo, e ala i le Matagaluega o Pulega o Uafu ma Malaeva’alele.