Amata aloaia fa’amasinoga autu o se ali’i tu’uaia fualaau fa’asaina


[ata: SN]
ausage@samoanews.com

O le vaiaso nei lea na amata aloaia ai le fa’amasinoga autu o se ali’i o lo o tu’uaia e le malo i lona umia fa’asolitulafono o vaega o fualaau fa’asaina o le aisa. O loo tu’uaia e le malo ia Falaniko Stowers, poo Nicole fo’i e pei ona iloa ai o ia e le toatele, i moliaga mamafa e 2, le moliaga o le umia faasolitulafono o vaega o le pauta oona o le aisa, atoa ai ma le umia fa’asolitulafono ma le fa’amoemoe e tulei ma fa’atau atu i isi tagata.

O tu’uaiga fa’asaga ia Stowers na alia’e mai i le fa’alavelave lea na taofia ai o ia e Leoleo i le afiafi o le aso 28 Novema 2016 i Fagatogo, ae maua ai ia te ia ni straws se 6 e ta tipi tulimanu, ua uma fo’i ona utu i ai vaega o le pauta faasaina.

O le vaega iloilo iuga e to’a 4 tama’ita’i ma ali’i e to’a 2 o lo o iloiloina se fa’aiuga o le mataupu a Stowers, lea o lo o taofia pea i le toese i Tafuna ina ua le mafai ona ia totogiina le tupe e $10,000 na fa’atualga e tatala ai o ia i tua.

I le ulua’i folasaga a le malo e uiga i lenei mataupu, na taua ai e le loia a le malo ia Woodrow Pengelly e fa’apea, o le mataupu fa’asaga ia Stowers, e autu i le umia faasolitulafono o fualaau faasaina, atoa ai ma le taumafaiga e tulei ma fa’atau atu i isi tagata.

Na taua e Pengelly e faapea, o le mataupu fa’asaga i le ali’i ua molia, na tofu atu i le Ofisa o Leoleo ina ua logo e ni isi o aiga e tuai ma le ua molia i Fagatogo, lo latou vaaia o le to’atele o tagata ma ta’avale e aga’i atu i le fale a le ua molia i soo se taimi o le aso e aofia ai le aso ma le po.

Ona o lea tulaga, na masalomia ai loa e aiga tuai, o Stowers o lo o ia fa’atauina atu fualaau fa’asaina i tagata. O le silia ai i le 2 masina talu ona mataitu e Leoleo gaioiga uma a le ua molia, aemaise ai tagata e aga’i atu i lona fale i taimi o le aso ma le po, na faia ai loa se talosaga i le fa’amasinoga mo se poloaiga e sailia ai loa fale.

O le aso na sauni ai Leoleo e su’e faamalosi le fale a Stowers, na fa’afuase’i ona latou vaaia Stowers o tietie atu i se ta’avale, ma latou taofia ai loa le ta’avale ae fa’ailoa i le ua molia le latou fuafuaga o le a faia i lona fale.

I le taimi o le talanoaga a Leoleo ma Stowers, na fesiligia ai o ia poo i ai ni a’upega i lona tino, ae na faailoa atu e le ua molia, e leai ni aupega o ia te ia, sei vagana ai straw e 6 sa ia fa’aali i Leoleo. Na fesili Leoleo ia Stowers poo a ia straws, ae na tali le ua molia, o aisa.

Na taua e le loia a le malo, o molimau uma o le a latou fesiligia i lenei mataupu, o le a mafai ai ona fa’amaonia moliaga fa’asaga ia Stowers.

Ae na taua e le loia a Stowers o Douglas Fiaui e fa’apea, o tagata e to’atele ma ta’avale sa vaaia o loo aga’i atu i le fale o Stowers i Fagatogo, na o i latou e saili ni a latou galuega a Stower, ae le faapea sa fa’atau e le ua molia fualaau fa’asaina.

O se tasi o itu na osofa’i e le loia a le itu tete’e i le taimi o le latou ulua’i fa’afinauga, o le fa’amaoni o le ali’i Leoleo sa autu i ai le suesueina o lenei mataupu, susuga Det. Johnny Paselio. Na taua e Fiaui e fa’apea, o Paselio o se tasi o Leoleo ua tele faamaumauga e fa’atatau i mea sa ia faia, e pei o lona le usitaia o tulafono ma ta’iala a le Ofisa o Leoleo, atoa ai ma le tele o fa’amaumauga e fa’atatau i amioga le pulea sa a’afia ai o ia.

Na taua atili e Fiaui e fa’apea, o ituaiga amioga nei sa faia e Paselio e mafai ai ona le talitonuina ana fa’amatalaga o le a tuuina atu i luma o le vaega iloilo iuga e tusa ai o lenei mataupu.

O lo o fa’agasolo pea lava i le taimi nei le iloiloina o lenei mataupu.

Comment Here