Ads by Google Ads by Google

Atoatoa tapenaga Ofisa o Aoga mo le amataina o aoga a fanau


Afioga i Faipule i le iloiloga ma le Faatonusili o Aoga a le malo i le vaiaso nei. [ata AF]
ausage@samoanews.com

O le iloiloga sa fa’ataunu’uina i luma o le Komiti o Aoga a le maota o sui i le vaiaso nei, na fa’amanino ai e le Faatonusili o Aoga a le malo le atoatoa lea o tapenaga a le Matagaluega o aoga, mo le fa’atulagaina o itu uma lava e moomia e fanau a o le i toe amataina aoga mo lenei tausaga aoga fou 2017/2018.

 

Saunoa Dr. Ruth Matagi-Tofiga e fa’apea, o le agaga atoa o le Kovana ma le faigamalo, ia lelei nofoaga e a’oa’oina ai fanau aoga - aua afai e lelei le aoaoina o fanau ma i’u manuia o latou olaga, ona manuia atu ai fo’i lea ma aiga, le malo ma le atunu’u atoa.

 

O se mataupu na fesiligia e le Faipule mai le Itumalo o Ituau, afioga Manumaua Wayne Wilson i tulaga fa’aletonu i pasi aoga mo le aoga a le Manulele Tausala i le aso muamua na a’e ai aoga, na mafua ai loa ona valaauina e le afioga i le ta’ita’i komiti ia Vaetasi Tuumolimoli Saena Moliga le iloiloga.

 

Na taua e Manumaua e fa’apea, na avea le leai o se pasi aoga ma itu na tuai ai le to’atele o fanau i le aoga i le aso muamua na toe a’e ai aoga a le malo.

 

Na fa’amanino e Matagi-Tofiga e fa’apea, e na o le aoga lava a Manulele Tausala na tula’i mai ai le fa’aletonu i le pasi aoga, ina ua fa’afuase’i ona leaga le pasi a o aga’i atu e momoli fanau aoga. E ui i tulaga fa’aletonu i le pasi muamua, na maua lava le pasi e toe momoli ai fanau aoga ina ua tuua le aoga i le aso lava lea.

 

O se tasi o lu’itau tele o lo o fetaia’i ma le Ofisa o Aoga i le taimi nei, o le taumafai lea ina ia fa’aleleia le tomai o ali’i Inisinia latou te lipeaina vaega o pasi pe a fa’aletonu - latou te galulue fa’atasi ai ma le Matagaluega o Galuega a le malo.

 

Saunoa Matagi-Tofiga e fa’apea, o ni isi o tulaga o lo o latou taumafai e fa’amautu, o le fa’aleleia lea o aoaoga mo ali’i ave pasi, fa’ataoto se faiga fa’avae mo le lipeaina o pasi, atoa ai ma le taumafai ina ia fa’aauau pea le tulaga lelei o pasi e tautua ai fanau aoga.

 

E 14 pasi aoga o lo o tautuaina aoga uma i le atunu’u i le taimi nei. E 4 pasi aoga fou o lo o faamoemoe e taunu’u mai i le atunu’u i le masina fou o Oketopa - lea na fa’atau mai i tupe mai i Tupe o Atina’e Tetele (CIP fund). Ina ia fa’atumauina pea tulaga lelei o pasi aoga ma fa’aitiitia ai le leaga soo, ua fa’atulaga ai e le Ofisa o Aoga se suiga fou mo le fa’asoasoaina o pasi aoga.

 

O lea suiga fou e pei ona saunoa Matagi-Tofiga, o le saili mai lea o ni Van e fa’aaoga e aoga i nu’u i tua, fuafua lea i le tulaga fa’aletonu o lo o i ai auala ma le vaapiapi, ae tuu pasi aoga tetele e fa’aaoga e aoga o lo o latalata i nofoaga o lo o lelei ai auala.

 

O lea suiga ua mae’a ona faia i aoga i Manua, ma ua molimauina le lelei ma faigofie mo fanau aoga ona feoa’i i Van, e pei ona saunoa le tama’ita’i Fa’atonusili o aoga. E le i mamao atu nei na aveese mai ai le pasi aoga sa fa’aaoga i Manu’a, a o lea ua avatu i ai Van e 5. E 3 van mo Ta’u, Fitiuta ma Faleasao, ae 2 mo Ofu ma Olosega/Sili.

 

O se tala fiafia mo Faipule le tulaga o lo o i ai Faiaoga i aoga eseese i le atunu’u i le taimi nei, ona o se taimi muamua lea ua molimauina ai le atoatoa uma o le aofa’i o faiaoga e tatau ona galulue i totonu o potu aoga. Ae afai e i ai se faiaoga e fa’afuase’i ona misi mai le aoga i se tasi, ua sauni Puleaoga, Sui Pule ma Faufautua e sui tulaga i le a’oa’oina o fanau aoga.

 

Saunoa atili le Fa’atonusili e fa’apea, o i latou uma o lo o lagolago i le galuega a Faiaoga e aofia ai puleaoga, sui pule ma faufautua, sa a’oa’oina fo’i i latou i auala e a’oa’oina ai fanau aoga i totonu o potu aoga.

 

O se tasi o pine fa’amau i le taumafai e atina’e ia lelei tulaga e aoaoina ai fanau aoga, o le tatalaina lea o faleaoga fou i totonu o le atunu’u. I le 2 vaiaso talu ai e pei ona saunoa le Fa’atonusili, na tatala aloaia ai le faleaoga fou a le aoga tulaga muamua i Fagali’i i le itumalo o Alataua. O le taeao nei lea na tatala aloaia ai le faleaoga fou ma le fale taalo a le aoga i Aua. O le isi 2 vaiaso lea ua fa’amoemoe e fa’aumusa ai le faleaoga fou a le aoga maualuga a Samoana. Ae o le aso Faraile o le vaiaso fou lea ua fa’atulaga e asu ai le eleele e fa’apaia ai le amataina o le galuega mo le faleaoga fou a le aoga tulaga muamua a Pago Pago, Le Peter Coleman Elementary.

 

“O nei taumafaiga uma e pei ona outou fa’afofoga mai i ai, o le naunau lava o le afioga i le ali’i kovana ia Lolo Matalasi Moliga ma le faigamalo, ina ia atina’e ma fa’aleleia tulaga i aoaoga a le fanau. E ui i le utiuti o tupe a le malo, ae o lo o tumau pea le moemitiga a le faigamalo, ia ave pea le fa’amuamua i tulaga o aoga,” o le saunoaga lea a le tama’ita’i Fa’atonusili.

 

Na talosagaina e le afioga i le ali’i faipule ia Matagi Mauga le Fa’atonusili ina ia silasila i le tulaga fa’aletonu o lo o tula’i mai i le aoga tulaga muamua i Masefau, e tasi le faiaoga o loo ia tausia le Vasega 7 & 8, ae o vasega ia e sauni ai tamaiti mo le ulufale atu i le aoga maualuga.

 

Na taua e le afioga a Toeaina Faufano Autele e fa’apea, o le fa’afitauli o lo o tula’i mai i le aoga i Olosega, e 10 potu aoga e leai ni loka, eleele le fale’ai a tamaiti toe leai se ‘ea malulu i le vaega e teu ai taumafa a fanau, e oo lava fo’i i fale taele e fa’aaoga ie lavalava e fai ma faitoto’a