Avea le tupe ma fa’afitauli numera tasi i le Falema’i


Le totino o le Komiti Fa’afoe a le LBJ, le afioga i le alii faipule ia Faimealelei Anthony F. Allen i le taimi o lana iloiloga i luma o le senate i le taeao ananafi. [ata AF]

Le afioga i le alii senatoa ia Faiivae Godinet lea sa ia fesiligia fa’afitauli o loo fetaia’i ma le falema’i o le LBJ i le taimi nei atoa ai ma tausaga ua mavae. [ata AF]
ausage@samoanews.com

Na taua e le afioga i le ali’i faipule ia Faimealelei Anthony F. Allen, o ia fo’i lea o se totino o le Komiti Fa’afoe a le falema’i o le LBJ i Faga’alu, i lana molimau i luma o le Senate i le taeao ananafi ina ua fesiligia tofiga a le kovana e toe fa’aauau ai lana tautua i le Komiti Fa’afoe, o le tupe le fa’afitauli numera tasi o loo fetaia’i ma le pulega a le falema’i i Faga’aalu i le tele o taimi.

 

“Ae ui i fa’aauau pea o le fa’afitauli tau tupe mo le falema’i i le tele o  tausaga, o lo o fa’aauau pea le tautua a le pulega a le falema’i mo le atunu’u i aso ta’itasi”, o le saunoaga lea a Faimealelei i luma o le iloiloga a le Komiti o le Soifua Maloloina a le senate.

 

E pei ona taua e le kovana i sana tusi i ta’ita’i o le Fono Faitulafono, lona toe filifilia o Faimealelei e fa’aauau lana tautua i le Komiti Fa’afoe o le LBJ, atoa ai ma lona filifilia o lana faufautua ia Iulolologo Joseph Pereira e avea ma totino fou o le Komiti Fa’afoe, e sui tulaga i le susuga ia Filifa’atali Michael Fuiava lea sa avea ma ta’ita’ifono o le Komiti Fa’afoe, peita’i o lea ua tofia e avea ma Fa’atonusili o le Ofisa o Fa’atoaga a le malo.

 

E na o Faimealelei sa auai i le iloiloga i le taeao ananafi, ae o le tofa ia Iulogologo o lo o toesea i atunu’u i fafo ona o sailiga togafiti mo lona gasegase, e pei ona fa’amaonia i se tusi a le sa tauaao e le Komiti i le taeao ananafi.

 

Ina ua fesiligia e le afioga i le ali’i senatoa ia Faiivae Godinet ia Faimealelei, poo le a se fa’afitauli numera tasi o lo o fa’aauau pea ona fetaia’i ma le pulega a le falema’i, talu mai tausaga e 4 ua mavae atu sa avea ai o ia ma totino o le Komiti, na saunoa ai le molimau e fa’apea, “A i ai se fa’afitauli sa ou maitauina i totonu o le 4 tausaga talu ai, o le itu tau tupe e fa’atino ai le tautua a le falema’i mo le atunu’u”.

 

E pei ona manino i le molimau a Faimealelei e fa’apea, e ui ua mae’a ona pasia tulafono mo vaega tupe e tu’uina atu i le falema’i, ae i ai lava isi taimi e oo atu lava i le ta’i 3 masina e lei oo atu lava se fesoasoani a le malo, ae o isi fo’i taimi e mae’a ane le tausaga tupe e na o le $100,000 se vaega tupe ua tu’uina atu, e le taitai ausia le aofa’iga ua mae’a ona fa’atulafono.

 

Ina ua fesiligia e le afioga i le ali’i senatoa ia Fa’amausili Mau Mau Jr le molimau, i sona finagalo e tusa ai o le Tulafono lea ua pasia e le maota o sui, e fa’avae ai le Asosi a Tausima’i i Amerika Samoa, na saunoa ai le ali’i faipule e fa’apea, e ui o se tulafono e taua ma aoga, ae i ai fo’i ona tulaga e fa’aletonu ai.

 

O ni isi o ia mafua’aga e pei ona ia taua, ona ua atagia mai ai le lagona e fausia se isi lala e ese mai i le pulega a le falema’i e tasi a le atunu’u, ae o loo manino le tulafono na pasia e tuaa na ala ai ona fa’avae le falema’i e tasi a le atunu’u.

 

O Faimealelei le isi faipule sa palota leai ina ua faitau fa’atolu le tulafono lenei i luma o le maota o sui i le amataga o le masina lenei.

 

Ina ua fesiligia e Tuaolo M. Fruean le tulaga o le galuega o lo o fa’agasolo i le falema’i i le taimi nei, na saunoa ai Faimealelei e fa’apea, o le masina o Iuni lea o loo faamoemoe e mae’a ai le galuega, mo le toe fa’alauteleina o le tautua a le falema’i, ma suia ai fale tuai ua tele tausaga o fa’aaoga e le atunu’u.

 

O le mae’a ai o le iloiloga a le Komiti o le Soifua Maloloina a le maota maualuga, na pasia ai loa e afioga i senatoa le fautuaga ina ia fa’aagafua tulafono a le maota, ae tu’u mai loa le suafa o Iulogologo e palota e le maota e ui e lei auai o ia i le iloiloga, fa’atasi ai ma le suafa o Faimealelei lea ua mae’a ona fesiligia ma iloilo e le Komiti.

 

E lei lagolagoina e le afioga i le i le ali’i senatoa ia Satele Galu Satele le fautuaga ina ia aofia ai le suafa o Iu i le palota, ona e i ai lona talitonuga e tatau lava ona uia tulafono a le maota, e ala i le auai o le molimau i le iloiloga fa’atoa pasia ai lona suafa, ina nei fesiligia e le atunu’u fa’aiuga a le maota i se taimi o i luma.

 

Ae na fa’amanino e le afioga i le ali’i senatoa ia Tuaolo M. Fruean e fa’apea, sa tupu fo’i i le nofoaiga ua mavae atu le tulaga faapea, ina ua palota ma pasia e le maota maualuga suafa e to’alua o isi totino o le Komiti Fa’afoe o le Faletupe fou a le malo, e ui e lei auai i laua i taimi o iloiloga, ae na pasia lava ona o le taua o le manaoga sa tula’i mai i lea taimi.

 

Saunoa Tuaolo e fa’apea, e taua tele le tautua a Iulogologo i le faia o fa’aiuga a le Komiti Fa’afoe a le falema’i, o le mafua’aga lea e tatau ai ona talia e le maota le fautuaga e fa’aagafua tulafono ae palota le suafa o Iu, lea fo’i na lagolagoina e afioga i senatoa.

 

I le fa’aiuga o le palota, na pasia ai loa le suafa o Faiealelei ma Iu i le palota e 18-0 e avea ai i laua ma totino o le Komiti Fa’afoe a le falema’i.

Comment Here