Ads by Google Ads by Google

Avea pea tupe ma fa’afitauli tuai ona fa’aleleia galuega tetele atunu’u


Le Fa’atonusili o le Ofisa o Galuega Lautele a le malo ia Faleosina Voigt ma lona sui lagolago i le taimi o le iloiloga i luma o le maota o sui i le taeao ananafi. [ata AF]

Ni isi o afioga i Faipule o le maota o sui i le taimi o le iloiloga ma le Faatonusili o le Ofisa o Galuega Lautele a le malo i le taeao ananafi. [ata AF]
ausage@samoanews.com

O le le lava o tupe fesoasoani mai le feterale o loo tuuina mai mo Amerika Samoa e fa’atupe ai galuega tetele e pei o auala ma taligalu i le atunu’u, atoa ai ma le tau fa’asoasoa o tupe fa’alotoifale a le malo o Amerika Samoa i tausaga ta’itasi, o le mafua’aga autu lea na fa’ailoa e le Fa’atonusili o le Matagaluega o Galuega Lautele a le malo i luma o le maota o sui i le taeao ananafi, o lo o fa’atuai ai le fa’atinoina o galuega i vaega eseese o le atunu’u.

 

O fa’asea, o talosaga atoa ai ma le agaga fa’afetai mai afioga i Faipule o le maota o sui, o ni isi ia o vaega sa mafai ona fa’alogoina i le iloiloga a le Komiti o Galuega Lautele a le maota o sui ma le tama’ita’i fa’atonusili ia Faleosina Voigt, i le iloiloga sa ta’ita’ia e le taitai komiti ia Vui Florence Saulo i le taeao ananafi.

 

O ni isi o galuega tetele sa tele i ai finagalo fa’aalia o ni isi o Faipule, o le fa’afitauli o loo fetaia’i ma le itumalo o Tualauta i le to’a o le suavai i luma o le malumalu o le Ekalesia Mamona i Ottoville i soo se taimi e loloto ai tafega, o le malosi o le tafe o le vai i luga o le auala i Fagaima pe a malosi tafega, o galuega mo auala i ni isi o itumalo, o auala i totonu o nu’u, fa’apea ai taligalu mo afioaga sa fa’aleagaina i le galulolo o le 2009, aemaise ai lava i le anoanoa’i o isi galuega ua tele tausaga o fuafua mai e le matagaluega.

 

Na fa’amanino e Voigt i luma o le maota o sui e fa’apea, o le vaega tupe e $4 miliona lea o loo maua mai mo le ta’i tausaga e fa’atupe ai galuega tetele i le atunu’u, ua mae’a ona fa’asoasoa mo le fa’atupeina o ni isi o galuega o auala i totonu o Tualauta fa’apea ai isi auala i le atunu’u e aofia ai le Sasa’e ma Sisifo.

 

“O le fa’afitauli numera tasi o lo o fetaia’i ma le Ofisa i le taimi nei, o le le lava lea o tupe e fa’atupe ai le fausiaina o galuega, o le vaega tupe lea e maua mai i le feterale i totonu o le ta’i 4 tausaga, ua mae’a ona fa’asoasoa mo galuega tetele ua leva ona fuafuaina, ae o le tele o isi galuega o loo fesiligia, e fuafua lava i le i ai o tupe lotoifale a le malo e fa’atino ai nei manaoga taua”, o le saunoaga lea a Voigt i luma o le komiti a le maota o sui.

 

O le galuega mo le fa’aleleia o le vaega o loo to’a ai le vai i luma o le falesa Mamona i Ottoville, ua manumalo ai le R & M Constructions, ma ua i ai le fa’amoemoe o se taimi o le masina o Aperila e tatau ona amata aloaia ai loa le galuega mo le umi e 9 masina, ae mo isi galuega o lo o fesiligia, e laiti lava nai vaega o loo moomia le fa’amae’aina ona fa’ataunu’u loa lea o le galuega, e pei o tulaga i pemita.

 

Na talosagaina e le afioga i le ali’i faipule ia Vailoata E. Amituana’i se fesoasoani mo le aoga tulaga muamua i Matafao, i le tulaga fa’aletonu o le vai e masani ona to’a ai i totonu o le lotoa a le aoga pe a oo ina loloto tafega, ma a’afia ai le soifua maloloina o fanau i le manogi leaga o loo maua mai ai.

 

Na taua e afioga i faipule ia Samuel Ioka Meleisea ma Gafatasi Afalava le faafitauli o loo tula’i mai i le aufaigaluega a le Ofisa o Galuega, i le le fa’atinoina lea o a latou galuega e fesoasoani ai i le galuega a le tama’ita’i fa’atonusili.

 

Na taua e Gafatasi i lana saunoaga e fa’apea, o ni isi o tagata e le o fa’amaoni ia latou galuega o sui fa’atonusili, ona e fiu e tulituli i ni mataupu sa talanoaina muamua e le taitai ona toe tali mai, ae na saunoa Meleisa e fa’apea, e i ai lava tagata faigaluega a le Ofisa e le o fa’atinoina a latou tiute, ma o i latou ia o loo ta’uleagaina ai le tautua a le tama’ita’i fa’atonusili.

 

I tulaga o auala, ua fautuaina le tama’ita’i fa’atonusili ina ia fesoota’i vavalalata ma Sa’o o aiga fa’apea ai pulega a afioga o loo i ai auala o loo fia fa’aleleia, ina ia foia muamua ni fa’afitauli i fanua o aiga ao lei amataina galuega a le malo.

 

Na fa’aleo e le afioga a Vui lagona mafatia o le itumalo i le tele o tausaga o fetaia’i pea ma tulaga leaga i auala, atoa ai ma le lamatia o soifua o aiga pe a loloto tafega.

 

I le fa’aiuga o le iloiloga, na taua ai e Voigt lona fiafia pea e galulue fa’atasi ma le fono faitulafono i auala e fa’aleleia atili ai atina’e o auala i totonu o le atunu’u.