E ui o lea ua taoto le finagalo a le afioga i le Alo o Salamasina, le afioga i le ali’i Senatoa ia Satele Galu Satele e tofia ai le afioga i le Sa’o ia Tuiasina S. Esera na te fa’aauauina le tofi o le Kovana Itumalo mo le Falelima i Sisifo sa tauave mai e le afioga a Lualemaga E. Faoa ua tu’umalo, peita’i e foliga mai e le o maua lava se tasi o lenei mataupu i le silasila a le itumalo o Tualatai i le taimi nei.

O le taeao ananafi na faia ai se fono fa’apitoa a le afioga i le ali’i kovana ia Lolo Matalasi Moliga ma sui o le Ofisa o Mataupu Tau Samoa e uiga lava i lenei mataupu, lea e aofia ai le Failautusi o le Ofisa, le afioga i le Maoputasi ia Mauga Tasi Asuega, o le sui failautusi, le tofa i le Tootoo ia Malemo Tausaga, ma le Kovana Itumalo o le Falelima i Manu’a, le afioga i le Fa’atui ia Laolagi Fonoti Savali Vaeao mo le talanoaina lava o lenei mataupu.

O le fonotaga ma le afioga i le ali’i kovana sa faia ina ua mae’a ona fa’asavali e le Fa’alupega o le itumalo o Tualatai le pepa e saini ai sui o itumalo eseese o le Falelima i Sisifo mo le fa’amaoniaina o le tofiga mo Tuiasina, lea e na o le to’alima i latou na saini i le pepa fa’amaonia, ae o le to’atele sa latou teena le sainiga o le pepa ona o lo o fa’ateia i latou i le fa’aiuga.

Na fa’ailoa e le tofa Malemo i le Samoa News e fa’apea, ua mae’a ona tu’uina atu i le afioga i le ail’i kovana sa latou fautuaga e tusa ai o lenei mataupu. E lei finagalo Malemo e fa’ailoa poo le a lea fautuaga ina ua fesiligia e le Samoa News.

Ae ina ua toe fesiligia pe ua fa’aleaogaina la le fa’aiuga e pei ona faia e le afioga Satele e tofia ai Tuiasina na te fa’aauauina le tofi Kovana Itumalo o le Falelima i Sisifo, na saunoa Malemo e fa’apea, “E le o i ai lava se fa’aiuga e fa’apea ua fa’aleaoga le fa’aiuga e pei ona tofia ai le afioga a Tuiasina i le taimi nei, e le o i ai fo’i se fa’aiuga e fa’apea o le a toe fono le itumalo o Tualatai mo le filifilia o so latou sui i le nofoa, pau le tulaga e pei ona faia ai la matou fono ma le kovana i le taeao nei (taeao ananafi), o le tu’u atu i ai lea o sa matou fa’atuaga e tusa ai o le mataupu e pei ona matou talanoaina ma iloiloina”.

Ae ina ua toe fesiligia e le Samoa News le tofa Malemo poo le a se saunoaga a le kovana e tusa ai o lenei mataupu, na saunoa ai le sui failautusi o le Ofisa o Mataupu Tau Samoa e fa’apea, “Ua i ai le fuafuaga a le kovana o le a taoto le mataupu se’i toe taliu mai le malo mai le tatalaina o le solar system a le ASPA atoa ai ma le  Ofisa o le EOB a le malo i Ofu i Manu’a i le aso Tofi o le vaiaso fou, ona fa’atoa toe maua ai loa lea o se isi tala e uiga i lenei mataupu”.

Na taua e ni isi o sui o le itumalo o Tualatai le fa’ateia o i latou ina ua faitau atu i le tala sa lomia i le Samoa News i le aso Lua o le vaiaso nei, ua aumai ai le finagalo o Satele e tofia le afioga a Tuiasina na te fa’aauauina le nofoa o le itumalo.

“Mo le silafia e le atunu’u e lei fono le itumalo o Tualatai e filifili ai se tasi na te fa’aauauina le nofoa o le itumalo, pau le fa’aiuga sa fulisia uma i ai le fono a le Falelima i Sisifo i le aso Gafua na te’a nei, o le a taoto atu le tofi i le itumalo o Tualatai, e tusa ai o le fa’aiuga a Satele, ona gata ai lea iina, e lei faia la se fono a le itumalo o Tualatai e filifilia ai se tasi na te fa’aauauina le nofoa”, o le saunoaga lea a se tasi o sui o le itumalo o Tualatai.

O le mae’a ai o le fonotaga a le Falelima i Sisifo i le aso Gafua na te’a nei, na fa’ailoa mai ai loa e le afioga a Satele i le Samoa News, lona tofia o le afioga a Tuiasina na te fa’aauauina le tofi o le Kovana Itumalo o le Falelima i Sisifo.

E tusa ai o le Mataupu 5.0103 o le Tulafono Toe Teuteuina a Amerika Samoa, o loo taua manino mai ai le tatau lea ona tofu le Falelima ma le Kovana Itumalo, lea e filifilia e le Kovana o Amerika Samoa i le mae’a ai lea ona tauaao ma fa’autagia fautauga mai pulega a itumalo taitasi po o ai e tatau ona filifilia e fai ma sui o latou itumalo. O se tasi fo’i e filifilia i lenei nofoa, o se matai maualuga o se itumalo o lo o fa’aauau pea lana tautua i le itumalo ma nofo tumau ai i le itumalo.