Ads by Google Ads by Google

E LE O OE O SE SULI MONI

“Talofa si o’u to’alua pele”, o le tala muamua lava lea a Lucy ma oso atu ua fusi mai si ona to’alua o Meki, lea fo’i na tali fiafia mai i ai le tamaloa e ala i lona fusi ma feiloa’i atu isi ona to’alua. O le fesili muamua lava a Meki ina ua mae’a ona la feiloa’i ma lona to’alua, “Ua a mai le ma’i o si o’u afafine o Ianeta”, ae na tali atu i ai Lucy, “E le o toe maua mai lava se tala mai le foma’i talu mai ananafi, na pau le tulaga o lea ou te iloa, ua le toe manogi sana mea’ai talu mai ananafi, ma ua vaaia fo’i le vaivai o lona tino”. Na vaaia e Lucy le maligi o loimata o Meki ina ua ia fa’alogo i le tulaga o le ma’i o Ianeta. E lei toe fa’atali le tamaloa ae ua tago atu i lana ato o loo fa’afafa ma tatala le sipi, ae aumai ai se pepa o loo afifi ai lau o le laau lea e fai ai le vai, ma ia fa’atonuina loa lana auauna ina ia fa’ata’alise e tu’i mai le vai ae aumai sei fa’ainu ai Ianeta.  O le pisi solo o le auauna fa’apea ai ma le fafine o Lucy i le taimi lea, na mafua ai ona savali mai i fafo le ali’i foma’i i lona fia iloa o le mea ua tupu, peita’i na fa’afuase’i ona tau le vaai a le foma’i i le ta’avale a fitafita a le malo o le tupu saua o Eteuati II o lo o paka mai i luma o le auala, ma ia mate ai loa e i ai tagata ia ua latou asia le falema’i. “Lau susuga a le foma’i, o le vai lea e fa’ainu ai si a’u tama o Ianeta”, o le fa’amatalaga lea a le fafine o Lucy ma ona loimata e le matu, ae o le foma’i i le taimi lea ua oso lona fiafia ina ua ia iloa o lea ua maua mai le vai e togafiti ese ai le siama leaga lea ua a’afia ai Ianeta, ma e lei toe fa’atali foma’i ae ua amata lona a latou togafitiga, ae fa’atali atu i fafo le tapuaiga a Meki ma lona to’alua, o le la auauna faapea ai ma le ali’i meauli pologa lea sa ia aveina mai le ta’avale i fafo i le vaega e fa’atali ai tagata o aiga.

 

E malu ifo loa le afiafi o le aso lava lea ae vaaia loa e le aiga le savali mai o le foma’i a Ianeta i fafo, ma e foliga mai e i ai le tala lea ua ia sau e momoli mai i le aiga. E leai se isi na toe gase i lea taimi pe toe gagana fo’i, se’i vagana ai lo latou mata’ituina o foliga o le foma’i poo fiafia pe leai. “Malo lava le tapua’i, malo fo’i le onosa’i, o lea ua mae’a ona fa’ainu le vai a Ianeta, ma ua mana’omia fo’i la e lona tino le malolo mo lenei po, e fa’atalitali ai se suiga e maua mai i le vai lea na aumai, ae ou te talosaga atu i lo outou aiga ina ia outou onosa’i mai pea ma fa’atalitali, atonu e o o atu taeao ua maua mai se isi ripoti e tusa ai o le ma’i o Ianeta, ae o le taimi nei, na te le o toe iloaina lava se mea, e le o mafai fo’i ona toe ‘ai, se’i vagana ai lava le vai lea ua uma ona fa’ainu”, o le ripoti lea a le foma’i na matua faateia ai le tamaloa o Meki ma lona to’alua, ma ua foliga mai ua leai se fa’amoemoega o le ulugali’i. “O le a le uiga o lau tala e fa’atali sei oo taeao pe i ai se isi suiga e tula’i mai ai, e le mafai ona e ta’uina mai le tulaga sa’o ua oo i ai lo’u afafine”, o le fesili le fiafia atu lea a le tamaloa o Meki i le foma’i, peita’i sa liliu le foma’i ma alu ese e aunoa ma se isi tali na ia toe gagana mai ai.

 

Manatua fo’i le aufaitau, o lea lava o lo o fa’aauau le tuliloaina e fitafita o le malo o Meki ma le alii pologa meauli lea na sosola ese mai, ona e i ai le talitonuga a fitafita o le malo o le ali’i meauli lea na mafua ai ona sola ese mai le tamaloa o Meki mai totonu o le falepuipui sa taofia fa’apagota ai o ia. A o nonofo fa’atalitali ai lava le aiga mo se isi ripoti i le tulaga o le ma’i o Ianeta, ae fa’afuase’i ai loa ona latou vaaia ni ta’avale se 2 o lo o aga’i mamao atu i se saoasaoa uiga ese, o lea na faia ai loa le tonu a le tamaloa o Meki ma le ali’i pologa meauli e sili pe a la lalafi i le isi itu o le falema’i, e fa’atali ai ta’avale o loo aga’i sa’asaoa atu poo ta’avale a ai, ae na fa’ateia i laua ina ua latalata atu ta’avale ma la iloa ai, o ta’avale a fitafita mai le malo o Eteuati II, lea fo’i o lo o malaga atu ai fitafita i totonu.