E LE O OE O SE SULI MONI

Vaega 63

 

O le fa’ateia tele o foma’i ma tagata mama’i i le fetauiga lea ua faia i le va o fitafita a le tupu o Eteuati ma tagata o le aiga o le teineititi pologa o Ianeta lea o lo o taofia i le falema’i, na tau fai laga uma ai loa foma’i ma tapuni i lalo faitoto’a o le falema’i, ina ia mafai ai ona fa’asaoina ola o tagata mama’i o loo taofia i totonu, ae o le tamaloa o Meki, o lana auauna fa’atasi ai ma le ali’i meauli pologa lea o loo lalafi mai i le isi itu o le auala, e lei toe i ai lava se isi mea na toe fa’alavelaveina ai a latou gaioiga, ae ua na o le atili ai ona latou osofa’i mai ma vaaia ai le tau fai fola i lalo o fitafita e to’afa a le tupu saua o Eteuati na aga’i atu e saili i latou. Na iloa mamao mai e le tamaloa o Meki le tau fai fola i lalo o fitafita a le tupu, fa’atasi ai ma ni isi o tagata savili o le aai lea e tu ai le falema’i o loo ta’atitia atu i luma tonu lava o le faitoto’a e ulufale ai i totonu o le falema’i, o lea na tu ai loa i luga le tamaloa ma tamo’e televave ane i lona fia iloa poo ai tagata ia e ta’atitia i luma o le faitoto’a o le falema’i, ae na matua fa’ateia le tamaloa o Meki ina ua taunu’u atu o le foma’i a si ona afafine o Ianeta lea o lo o ta’atia mai i luma o le faitoto’a, e foliga mai na manu’a o ia i se pulufana mai fana sa fa’aaoga e fitafita. E lei toe fa’atali Meki i le taimi lea ae ua tago atu nei ua si’i i luga le foma’i ae amo i totonu o le falema’i, ma ia valaau atu ai i foma’i o loo lalafi solo i totonu o le falema’i ina ia alu atu se isi e fesoasoani. “Faamolemole, ua mana’omia se fesoasoani i le foma’i a si o’u afafine”, o le alaga leotele lea a Meki ao ia amoina atu le foma’i ma fa’ataoto i luga o le moega, ona vaaia ai loa le tau fai pisi atu o isi foma’i ma tausima’i i le tau togafitiina o le foma’i ua manu’a.

 

Na ona tu’u lava e Meki i lalo o le foma’i sa manu’a, faliu loa ma toe savali atu i le potu o loo taofia ai si ona afafine meauli o Ianeta, i lona fia iloa poo a mai o ia, ae na fa’ateia le tamaloa ina ua ia tatalaina atu le faitoto’a, o loo tootuli mai le teineititi o Ianeta i luga o lona moega o loo tatalo ma ona loimata, ina ua ia fa’alogoina le tau fai pa pa mai o fana i fafo o le falema’i. O se vaaiga na matua fa’ateia ai le tamaloa o Meki ina ua ia iloa ma mautinoa, ua toe manuia si ona afafine mai le ma’i tigaina na a’afia ai o ia. E lei gagana Meki i se upu i le taimi lea, ae sa na o lona tu fa’agatasi ma le faitoto’a ma fa’atau pupula atu i le to’otuli mai o le teineititi o Ianeta i luga o le moega. O le taimi lava na amene ai le tatalo a le teineititi, na tepa atu ai i le faitoto’a ma ia iloa atu ai le tamaloa loto alofa o Meki lea ua avea nei ma ona Tama, ma atili ai lava ona maligi loimata o le teineititi, ona fa’apea atu lea o lana tama i si ona leo tau le lagona, “Papa, fa’afetai i lou alofa ua mafua ai ona ou toe ola”. Na savali atu Meki ma fusi mai Ianeta ma fa’apipi’i mai i lona fatafata, ae o le taimi lea ua le matu ai loimata o le tamaloa i lona fiafia tele ina ua ia toe vaaia le teineititi e sili ona alofa i ai lona toalua ua toe manuia lona ma’i. “Ianeta si o’u afafine pele, fa’afetai fo’i i lou loto tele ma lou finau ina ia fa’asa’olotoina a’u mai totonu o le falepuipui na loka ai a’u e le tupu saua o Eteuati, o au taumafaiga na mafua ai ona fa’aosofia le loto alofa i le ali’i meauli pologa na alu atu ma tatala le loka o le faitoto’a ae fa’asa’oloto mai a’u, lea ua mafua ai ona ta toe fevaaia’i”, o le talanoa atu lea a le tamaloa o Meki isi ona afafine, ae o le teineititi i lea taimi, ua na o le tilotilo solo i totonu o le potu o loo taofia ai o ia ona ua fou lava vaai. “Vaai oe Ianeta, aua e te toe popole i se mea e tasi, o loo pisi lou Tina o Lucy i le tau togafitiina o lau foma’i sa lavea i se osofaiga a fitafita i se taimi e lei mamao atu, a mae’a, ona sau lea e asi mai oe, ae o a’u, o le a ou alu atu e saili poo i ai ni isi fitafita o aga’i mai e osofa’i i tatou, ina nei tatou le iloaina atu le aga’i fa’alilolilo mai i se taimi.

Comment Here