Ads by Google Ads by Google

E LE O OE O SE SULI MONI

Vaega 37

 

O le taimi lava na fa’atinoina ai le fa’atonuga a le Tupu e auauna ma fitafita e toe fa’afo’i atu ai le tamaloa o Meki i le fale o loo taofia ai, ae auina atu le teineititi o Ianeta i le nofoaga o loo i ai tagata pologa, na vaaia ai le amata lea ona taape ese atu tagata sa tumutumu e molimauina fa’afiafiaga ma polokalame o le aso fiafia o tagata pologa. Ua aga’i atu auauna i le potu sa fa’amautu ai le teineititi pologa o Ianeta ma aveese uma mai ona lavalava sa i ai, ma momoli atu loa o ia i le nofoaga o loo fa’amautu ai tagata pologa o le malo, ae ua momoli atu e isi fitafita le tamaloa o Meki i le nofoaga o loo taofia ai tagata pagota e sauni ai mo le taimi e fa’ataunu’uina ai a latou fa’asalaga.

 

“Aisea ua e fa’afiufiu ai i le Tupu o le malo, ua leva na tatau ona fasiotia oe, ae ua le iloa pe aisea lava ua fa’atuatuai ai ona faia e le Tupu lena fa’aiuga mo oe”, o le fa’amatalaga lea a le ali’i fitafita lea o loo ia momoliina atu le teineititi pologa i le nofoaga autu o tagata pologa. Na ona taunu’u lava o le ta’avale i luma o le faitoto’a o le nofoaga, ona oso loa lea o le fitafita i fafo ma savali atu ua tatala le faitotoa pito i tua o le ta’avale, ona ia toso lea i fafo o le teineititi o Ianeta ma ato atu ona lavalava i luga o le mutia ma fai atu i ai, “O lou lava iuga o le fai ma pologa, o le nofoaga lenei o le a e nofo ai mo aso o loo totoe o lou olaga, e te oti ai fo’i i le nofoaga lenei, ia e iloa le mea lena, e le o oe o se suli moni o le malo ma le aiga Tupu, o oe o le tagata pologa”, o le fa’amatalaga lea a le ali’i fitafita, ona ia savali lea ma toe oso i le ta’avale ma alu ese loa, ae tutu ai lava na o le teineititi pologa o Ianeta i luma o le faitoto’a e ulufale ai i le nofoaga lea o loo fa’amautu ai tagata pologa o le malo. E pei ona masani ai i tausaga uma lava pe a fa’amanatuina le aso fa’apitoa o tagata pologa i le malo, e vaiaso atoa e malolo ai tagata pologa e le faia ni galuega, ae na o le o lava e fa’afiafia tagata ma ta’ita’i o le malo i le nofoaga fa’apitoa e faia ai fa’afiafiaga i aso uma.

 

Na savali atu Ianeta ma taumafai e fa’aputu mai ona lavalava ia ua salalau solo i luga o le mutia ma le palapala, ua le mautonu lona mafaufau i se fa’aiuga sa’o o le a fai ona o lea ua ese le tulaga sa mafaufau i ai ese le mea lea ua tula’i mai. Sa i ai le manatu o le teineiteiti pologa e fesoasoani le Tupu o le malo ia te ia ma toe fa’afo’i atu o ia i lona aiga, tusa lava pe ua mae’a ona tu’u atu lana ta’utinoga e avea o ia ma pologa, peita’i o lea ua i’u lava ina avea o ia ma pologa i totonu o le malo o Aferika. Ua ao fa’atasi e Ianeta ona lavalava ona savali atu loa lea i le vaega o loo i ai fale o loo nonofo ma fa’amautu ai tagata pologa, ma ia nofonofo ai i luma tonu o le vaega o le faitoto’a e o se tasi o fale, e lei umi ae vaaia e le teineiteiti le savali mai o se tagata ia te ia, o se fafine pologa tino maualuga ma foliga saua. “O ai oe ae aisea ua e nofonofo ai iinei ae o loo fai fa’afiafiaga a tagata o le malo i le aai”, o le fesili atu lea a le fafine lea ma ona foliga saua ia Ianeta, ona tali lea o le teineititi pologa isi ona leo tau le lagona, “O lo’u taimi muamua lea i lenei nofoaga, o a’u na aumai fa’amalosi e fitafita a le tupu mai se tasi o vaai o Aferika ma aumai i le nofoaga lelei, lea la ua i’u ai loa i le faia o le fa’atonuga a le Tupu ina ia aumai loa a’u e tu’u i le nofoaga lenei o tagata pologa”, e le’i uma atu le fa’amatalaga a le teineititi o Ianeta ae aapa atu le fafine pologa foliga saua ma futi mai lona ulu ma toso fa’atata o ia i le isi itu o le malae ma fai atu i ai, “Afai la o oe o se pologa, e le tatau ona e nofo fifilemu mai faapena, ae tatau ona e amio fa’apologa”