Vaega 96

Ua fa’aitu alalua ali’i Leoleo o lo o tiute i le faitoto’a ae ulufale atu Meki ma lona aiga i totonu o le faitoto’a o le fale’aiga tele lea ua fa’amoemoe e faia ai le talisuaga ma le aiga o Laniselota. O le pito lava i luma o le faitoto’a i le itu e ulufale atu ai tagata, o lo o fa’apipi’i mai ai i le puipui ni ata se lua, e foliga mai o se ulugali’i, ma o ni tagata e foliga taualoa i laua e ala i o la ata o lo o fa’alauiloa i le pito i luma o le puipui e ulufale atu ai tagata asiasi. Ua fa’asolo le savaliga a le aiga mo le aga’i atu i totonu o le fale. O se fale e matua tele lava toe matagofie lona teuteuina. O le faitoto’a lona lua na ulufale atu ai le aiga, na fa’ateia ai i latou ina ua latou vaaia se ata tele o lo o fa’apipi’i i le puipui, ma o latou iloa ai, o le ata lea o le ali’i o Laneselota. O le taimi lava na vaaia ai e le aiga le ata, na latou tau fai tutu fa’atasi ai ae autilo le isi i le tasi, e foliga mai ua fa’ateia uma i latou i le vaaiga lea ua latou iloaina atu. “Ta’i manaia le ata o Laneselota o lo o fa’apipi’i mai i le puipui o le fale,” o le tala musumusu atu lea a le fafine o Lucy ma tago atu ua uu mau mai le lima o Ianeta, ae o le tama’ita’i o Ianeta i le taimi lea, ua tu ma tepa i tua i le auala na latou savavali mai ai, e foliga mai ua i ai se mea ua galo. “E i ai se mea ua fa’aletonu ua fa’apena ai lau tu ma lau pupula,” o le fesili fia malie lea a Meki i lona afafine, ae na tali Ianeta, “Afai o le ata lea o Laneselota, lona uiga o ata e lua o lo o pito i luma o le puipui na o tatou ui mai ai, o ata ia a ona matua pe afai e sa’o a’u.” E leai se isi na gagana pe tali i le manatu o Ianeta, se’i vagana ai le toe fa’aauau o le latou savaliga i le itu na fa’asino mai e le ali’i Leoleo latou te aga’i i ai.

O le taimi na tatala ai e Meki le faitoto’a lona tolu o le a latou ulufale atu i le isi vaega o le fale, na latou vaaia ai se vaaiga uiga ese, i le matagofie o le teuteuina o le vaega lea o le fale’aiga, e foliga mai o le itu tonu lea o le a faia ai le talisuaga ma le aiga o Laneselota. Sa vaaia le pisi o tagata faigaluega ma o latou laei matagofie, ae fa’afuase’i loa lo latou vaaia o le aga’i ane o le ali’i o Laneselota ma ona laufofoga fiafia ma fa’afeiloa’i le aiga, ona fa’apea fo’i lea ona tali fiafia atu i ai le ulugali’i o Meki ma Lucy i le ofo alofa ane o le ali’i, seia oo atu loa ia Ianeta o lo o mulimuli atu i tua, ma ia fa’apea atu i ai, “Talofa i lau susuga a le Tama’ita’i Tusitala lauiloa i totonu o le malo.” Na ata Ianeta ma ofo alofa atu fo’i i le ali’i o Laneselota. Na vave ona manatua e Ianeta le fugalaau o lo o uu i lona lima sa ia tauina mai i le togalaau o loo i le pito lava i luma o le faitoto’a. Ona ia fa’apea atu lea ia Laneselota, “O le fugalaau matagofie lenei sa ou tauina mai i luma o le pa laau e ulufale mai ai i le nofoaga nei, sa ou molimauina lona matagofie ma lona matala manaia mai, o lea na ou tauina ai e avea o se mea alofa ou te ofo alofa atu ai ia te oe i lenei afiafi.”

E leai se mea na gata mai ai le fiafia o le ali’i o Laneselota ina ua ia vaaia ana malo fa’aaloalogia faapitoa, ma ua latou talanoa fiafia ai lava ma le ulugali’i ma Ianeta i luma o le laulau mo ni nai minute, ae fa’afuase’i loa ona fa’apea mai se leo, “O lea ua afio mai Laneselota II ma lona Faletua, tatou fa’afeiloa’i ia tei laua.” O le taimi fo’i lea na vaaia ai le aga’i mai o le ulugali’i, o matua fo’i ia o Laneselota ma feiloa’i ma Ianeta ma lona aiga, ma ua pei ai le feiloaiga a aiga e lua o se mafutaga ua leva ona masani. Ina ua oo mai le fa’asologa o le fa’afeiloa’i a le Tina o Laneselota i le tama’ita’i o Ianeta, sa ia fusi le tama’ita’i ma ia fa’apea atu i ai, “Talofa Ianeta. Ae ou te lei feiloa’i atu ia te oe, ua ou iloaina uma tala e fa’atatau ia te oe, o taimi uma ma te fa’asoa ma talanoa ai ma Laneselota III, e le mapu lona fa’asoa mai o tala eseese uma e fa’atatau ia te oulua ma le lua masaniga, o le autu atoa fo’i lena o lenei feiloaiga, se’i o tatou feiloa’i ma mafuta fa’atasi ma oe ma ou matua.”