E LE O OE O SE SULI MONI

Vaega 40

 

E lei lelei se ‘ai a le tama’ita’i o Ianeta i lona fia fa’alogo atu i le tala fiafia lea ua manatu le Tupu e fa’ailoa atu ia te ia, ua fa’agasolo le taligasua mo le aso fiafia o le Tupu, ma ua naunau lava Ianeta ua tuai tele ona laulelei le Tupu ae se’i fa’ailoa mai le tala fiafia lea ua ia manatu e fa’ailoa mai ia te ia. O le mae’a ai o le taligasua a le Tupu ma Ianeta na vaaia ai e le tama’ita’i le tula’i o le Tupu ma savali atu i lona potu o loo sosoo lava ma le potu tele o loo la i ai, ona ia toe savali mai lea ma se mea o loo uu mai i lona lima. “O le a lena mea o loo uu mai i lou aao lau afioga i le Tupu”, o le fesili fia malamalama atu lea a le tama’ita’i o Ianeta ma savali atu ua saofa’i mai i le isi nofoa o loo i le isi itu o le potu, ae o le Tupu i le taimi lea, ua savali atu ma alala mai i luga o lona nofoa, ona ia uu lea o le ata i lona lima ma fa’aali ia Ianeta m fa’apea ana upu, “O le ata lea o lo’u afafine o Ianeta i le taimi na atoa ai le 12 o ona tausaga, pei uma lava o lou matua lea ua i ai i le taimi lenei”, o le fa’amatalaga lea a le tamaloa o Eteuati II, ona motu fa’afuase’i lea ina ua maligi ona loimata i le misia o le mafutaga ma lona afafine, lea na leiloa ina ua ave fa’agaoi e tagata faomea mai le isi itu o le malo.

 

“Ianeta, e pei ona ou fai atu ia te oe, o le ma mafutaga ma lou grandfather na mafua ai ona ou manatu e fa’aigoa oe i le igoa o lo’u afafine, e fa’amanatu ai le taimi na aveesea atu ai o ia ma o’u lima. Ou te iloa e le mafai ona toe maua mai o ia, e le mafai fo’i ona ou toe fa’alogo atu i lona leo pe toe vaai atu i ona foliga, ae ua avea lava oe ma sui i lo’u afafine”. Na ese le fa’alogo a Ianeta i le talanoa ane a le Tupu ia te ia i lea aso, e foliga mai e i ai se mea o le a faia e le Tupu mo ia. Na ea i luga Ianeta ona ia fa’apea atu lea i le Tupu, “Lau afioga e Eteuati II, ua ou iloa o a’u o se tagata e le tonu i totonu o lou malo, ua ou iloa fo’i lo’u fa’atauva’a ma lo’u maualalo, ae ou te toe tatalo atu i lau afioga fa’amolemole, pe afai e tusa ai ma lou finagalo fa’a Tama, mo se avanoa e toe fa’asa’oloto atu ai le tamaloa o Meki i lona aiga, ae ua lava a’u e fai ma pologa i totonu o lou malo”, o le fa’amatalaga atu lea a le Ianeta ma le maligi o ona loimata, ae na fa’afuase’i ona fa’apea mai le fa’amatalaga a le Tupu, “Ua lelei Ianeta, sa ou nofo pea lava i le tele o aso ma mafaufau poo la a se mea ou te faia mo oe, peita’i o le aso nei lea ua i’u ai la’u filifiliga, o le a tu’u atu le aso lenei e tapena ai au mea uma sa e sau ma oe, ma e sauni o le a e toe fo’i atu i lou aiga, ou te le toe taua oe o se tagata pologa i lo’u malo, afai fo’i e te toe malaga asiasi mai, o oe o se tasi o lo’u aiga, ae o le tulaga ia Meki, o le a taoto mai se’i o’u mafaufau i ai, afai e i ai se isi suiga i le fa’aiuga e tatau ona faia mo ia, ona toe logo atu loa lea o le suiga lena ia te oe”. Na ona mae’a lava o le saunoaga a le Tupu, ona ia savali atu loa lea ma tu’u le ata a lona afafine i le luma o Ianeta ma fa’apea atu ai ana upu, “Ianeta lo’u afafine, ia manuia lou toe fo’i atu i lou aiga ma lou malo”.

 

E lei lelei se mea a laneta i lea po ona o le pisi i le tau tapenaina o lana ato mo le toe fo’i atu i lona aiga, ua mua ona alu le ulu o le tama’ita’i i le tapenaina o lana ato, ae galo ai ia te ia ona fesili i le Tupu poo fea lea o le a toe momoli i ai o ia e nofo ai, ona o lea sa aveese fa’amalosi mai o ia e le ulugali’i o Mekala ma lona to’alua sa tofia e tausia o ia. E lei malamala lelei le taeao ae ua leva ona ala i luga Ianeta ma sauni, ona nofonofo ai lava lea i totonu o le fale sa moe ai e fa’atali le taimi e tu’itu’i atu ai le auauna la te o. E sauni loa Ianeta o le a aga’i atu i totonu o le ta’avale a le auauna lea na te momolia o ia, ae logo mai loa ma le tala ua leai se Meki mai le potu sa taofia ai o ia, e le iloa fo’i poo fea ua sola aga’i i ai.

Comment Here