Na ona uma lava ona lafo mai o le tala lea a le Ta’ita’i fitafita, ona ia fa’atonu loa lea o le ave ta’avale e liliu le ta’avale ma toe fo’i i totonu o le lotoa, e aunoa ma se isi upu na toe tali ane ai ia Meki ma lana vaega, ae o le tamaloa o Meki i le taimi lea, sa na o le tu lava ma fa’atau pupula i le ali’i lea na ia lafo atu le folafolaga malosi ma le mata’utia ia te ia. Na ona lilo atu lava o le ta’avale, faliu atu loa ma Meki i ana tama fa’apitoa sa latou malaga atu ma fai atu i ai, “O le taimi lelei lenei o tatou e osofa’i ai loa le nofoaga lenei, manui o lea ua tatou fa’alogo atu i le folafolaga a le Ta’ita’i fitafita lea ua lafo mai, e le tatau fo’i ona tatou fa’atuai ina ne’i avea ma auala e tula’i mai ai se isi mea e sili atu ona matuia ia Ianeta”, o le fa’amatalaga lea a Mekima savali atu loa i totonu o lana ta’avale ua aumai ana fana e lua o lo o ta’atitia ai, ma sulu i tua o lona ofu talaloa lanu uliuli o lo o faia, ona ia valaau atu loa lea i le isi ali’i o lana vaega ina ia alu atu la te to’alua, ae o isi ali’i e to’atolu o le a latou o fa’atasi.

Na pei o le emo o le mata gaioiga a tama faapitoa a Meki i le tapenaina o a latou a’upega fa’atasi ai ma vaega o le latou toniga e tatau ona ave mo le puipuiga i taimi o osofaiga, fa’atasi ai ma le fa’afanua e fa’ailoa mai ai le ata atoa o le nofoaga lea ua latou aga’i atu nei i ai. O le tamaloa o Meki ma lona soa tau na aga’i i le itu i sasa’e o le nofoaga, ae o ana tama faapitoa e to’atolu na latou aga’i i le itu i sisifo ma le fa’amoemoe e tatau ona latou fetaui i le vaega tonu o lo o i ai le nofoaga autu. E le i atoa se itula talu ona alu le osofaiga a Meki ma lona soa tau ae o la fa’alogoina loa leo o tagata o lo o pisapisao, e foliga o se motu o tagata e to’atele o lo o pisapisao i se fa’atasiga tele o lo o faia. Na soso atu Meki ma lona soa tau i le vaega o lo o sau ai le pisapisao o tagata, ma fa’ateia ai i laua ina ua la vaaia se vaega to’atele o tagata uli o lo o nonofo fa’atasi i totonu o se malae, o lo o tufa a latou meaai mo le afiafi, ma o le taimi lava na tau atu ai le vaai a Meki i le motu o tagata uli, na fa’afuase’i ai ona maligi ona loimata ma fa’apea ane i lona lotou, “Oi se talofa ia Ianeta pe afai o loo i ai o ia i le nofoaga lenei, ta’i mataga ma leaga lenei nofoaga”.

Sei o tatou toe fo’i atu lava i le matamataga a le teineititi meauli o Ianeta ma le auaunaga lea na malaga fa’ata’amilo e maimoa i vaega eseese o le nofoaga. Na ona oso lava o le teineititi i totonu o le ta’avale, alu loa ma le ta’avale i se saoasaoa uiga ese ma le fa’amoemoe o le auauna lenei o le a ia aveina loa le teineititi pologa lenei e fasioti, ona o le fia tagata ma le fa’a fiapoto atu ia te ia ma lana galuega. O le fa’ateia o Ianeta i le ese o le maga ala lea ua ui ai le ta’avale na mafua ai ona ia e e ma fai atu i le auauna e taofi le ta’avale. “Fa’amolemole, taofi le ta’avale se’i o’u alu i fafo ou te savali i le ofisa o le Matai se’i o’u talanoa i ai e uiga i la’u talosaga sa tu’uina atu i ai. Fa’amolemole lau susga i le auauna, taofi le ta’avale”. E tiga lava ona alaga atu Ianeta ae ua atili ai le alu saoasaoa o le ta’avale mo se taimi umi, ma fa’afuase’i ai ona tu le ta’avale ina ua vaaia e le auauna le ta’avale a Fitafita o lo o aga’i sa’o mai lava i le auala lea o lo o alu atu ai le la ta’avale ma Ianeta. Na ona taunu’u mai lava o le ta’avale a Fitafita, oso loa i lalo ma le Ta’ita’i fitafita ma savali mai i le ali’i auauna o lo o ia fa’afoeina le ta’avale ma fesili i ai, “O fea a e aga’i i ai ua malu le afiafi”, na tali le ali’i fitaifta, “Na tuli mai a’u e le Matai e fa’amatamata le teineiteiti pologa o Ianeta i nofoaga eseese o le malo”, o le tali lea a le auauna na fa’afuase’i ai ona toe oso atu le fesili a le Ta’ita’ita’i fitafita i lona leo malosi, “O ai, o Ianeta, o fea la o i ai le teineititi pologa lena”, o le fesili lea a le Ta’ita’i fitafita na mafua ai loa ona faliu le auauna i tua o le nofoa o le ta’avale sa nofo ai Ianeta se’i fa’asino i le Ta’ita’i fitafita, ae na fa’ateia o ia ina ua fa’asaga atu i tua, ua leai se teineitiiti pologa sa i totonu o le ta’avale.