Ads by Google Ads by Google

E LE O OE O SE SULI MONI - XXX

E taunu’u atu le teineietiti pologa o Ianeta i le maota o le Tupu, ua leva ona alala mai le tamaloa i lona nofoa vaevaeloloa ma tapili mai lona ili lautele ua tau le iloa atu ai ona foliga. “Talofa Ianeta, ulufale mai i le maota nei”, o le talanoa fa’afeiloa’i atu lea a le Tupu i le teineititi pologa ma ona foliga fiafia, ae o Ianeta i le taimi lea, ua le mau gagana lava i le fefe poo le a se mea o le a oo ia te ia. Ua amata le talisuaga a le Tupu ma le teineititi pologa, ma ua maitauina ai e le teineititi uiga alofa ma le agamalu o le Tupu o loo fa’aali atu ia te ia, ma e foliga mai o ia o se tagata lelei ma alofa. O le mae’a ai o le taumafataga a le Tupu ma le teineititi pologa, na ia poloa’i ai loa i ana auauna ina ia tuua le maota ae aga’i ese atu i fafo, se’i maua ai se avanoa la te talanoa to’alua ai ma Ianeta, lea fo’i sa usitaia e auauna a le Tupu.

 

O le taimi lava na tapuni mai ai le faitoto’a o le maota e le auauna, na fa’afuase’i ai ona tamo’e atu le teineititi pologa o Ianeta ma fa’apalasi i luma o le Tupu, ua to’otuli ma tagi ai, ao taumafai e fa’aleo lana talosaga i si ona leo tau le lagona, “Fa’amolemole lau afioga i le Tupu o le malo, ua ou iloa lava o a’u o se teineititi pologa, ua ou iloa fo’i lo’u iuga i lenei aso, ae fa’amolemole, ao lei tu’uina mai se fa’aiuga mo a’u, pe mafai lava ona faaleo atu sa’u talosaga vaivai”, o le augani atu lea a le teineititi, ae o le Tupu i le taimi lea, ua fa’ateia o ia i le vaaiga lea ua ia vaai atu nei i ai, o lea na ia valaau mai ai i le teineititi o Ianeta, e tula’i i  luga ma savali i lona nofoa se’i o la talanoa. “Ianeta, afai e te mana’o ina ia ou lagona atu lau talosaga, tulai i luga ma fo’i i lou nofoa, o lea ou te fia talanoa atu ia te oe”.

 

Ua tulai le teineiteiti o Ianeta ma toe savali i lona nofoa ma ona foliga fefe ma le le mautonu, ae fa’aauau pea ona maligi ona loimata. “Vaai oe Ianeta, o lea lava ou te manatuaina upu mulimuli o le ta tuugatala sa faia i le taimi mulimuli na ta talanoa ai i totonu o le fale nei, lea sa e talosaga mai ai ia te a’u, mo se avanoa e te toe fo’i ai i lou aiga, ae na ou fai atu ia te ia, e te alu e te mafaufau ma matamata i le malo aemaise lava i le olaga o loo ola ai tagata pologa, ona toe maua ai lea o se isi a taua talanoaga i se taimi mulimuli, ae paga lea, ua fa’ateia a’u i le tala ua oo mai, ua i ai tagata ua o mai ma taumafai e ave faagaoi ese atu oe mai lo’u malo”. Ua uma atu le vaega muamua o le saunoaga a le Tupu ona ia tula’i lea ma savalivali solo i totonu o le maota, ona toe savali lea i lona nofoa ma toe nofo ai.

 

“Lea fo’i la ua toe maua le isi ta talanoaga, ao lea fo’i ua ou fa’alogo atu i le isi au talosaga ua folasia mai, e ui ou te le’i fa’alogo atu i ai, ae o lea e le’i maua se tonu o lau ulua’i talosaga, ae se’i fa’ailoa maia sou lagona o loo i ai e tusa ai o le mataupu o loo e fia talanoa mai ai”, o le fa’amatalaga lea a le Tupu i le teineititi pologa. Na tautala ma le fa’aeteete le teineititi o Ianeta ma lona talitonuga, o lona avanoa mulimuli lenei ua ia maua e fesoota’i ai ma le Tupu o le malo, afai loa e uma lona avanoa lea, ua le toe maua se isi avanoa mo ia. “Lau afioga i le Tupu, ua ou iloa o a’u o le tagata agasala i ou luma, ua e fa’afofoga fo’i i le tala e fa’atatau i tagata na o mai ma taumafai e avatu fa’agaoi a’u i lenei nofoaga, o la’u talosaga ma lo’u loto vaivai, ua ou malie ou te nofo iinei ma avea ai a’u ma pologa, ae ou te talosaga atu fa’amolemole, pe mafai ona tatala fa’asa’oloto i latou e to’a 5 o loo taofia fa’apagota i totonu o lou malo, ae tu’u mai ou te amoina le fa’asalaga”. E lei mafai e Ianeta ona fa’auma lana fa’amatalaga i le maligi tele o ona loimata, ae o le Tupu i le taimi lea, ua ese fo’i ona lagona i lea taimi, ma ua vaaia fo’i le punou o le tamaloa i lalo seia oo ina vaaia e Ianeta le maligi o loimata o le Tupu.