Ads by Google Ads by Google

Fa’aauau pea lapataiga a le Kovana mo lana Kapeneta

ausage@samoanews.com

I le sainia ai e le afioga i le ali’i kovana ia Lolo Matalasi Moliga o poloaiga se 2 i le amataga o le masina nei, e fa’amanatu ai ni isi o tulafono ma ta’iala e tatau ona fa’amalosia, ua atagia mai ai le fa’aauau pea lea o lapataiga a le afioga i le ali’i kovana mo lana Kapeneta, a o aga’i atu ai i tausaga mulimuli e fa o le la nofoaiga.

 

O mataupu e 2 e pei ona fa’amamafa e le ali’i kovana i lana tusi lea ua tufatufa atu i Fa’atonusili uma o Matagaluega ma Ofisa Tumaoti a le malo, e aofia ai le mataupu e fa’atatau i le fa’atulagaina o tulaga ma tagata faigaluega i Ofisa eseese a le malo, fa’apea ai ma le mataupu e fa’atatau i malaga mo fonotaga i fafo.

 

Talu mai le 4 tausaga ua mavae e pei ona taua e le ali’i kovana i lana tusi, sa taumafai ai le faigamalo e iloilo auala o loo fa’atulaga ai matagaluega ma ofisa ta’itasi a le malo.

 

Mo fa’atonusili ua toe fo’i e fa’aauau le latou tautua i ofisa sa tautua ai i le 4 tausaga talu ai, o le taimi lelei lenei e fa’amautu ai loa fuafuaga uma e pei ona fa’atulaga mai i le taimi ua mavae, ae mo Fa’atonusili fou, ua fautuaina e le kovana i latou ina ia fa’amasani ia latou Ofisa ma tagata faigaluega, ina ia mafai ai loa ona latou maua le avanoa e fa’atulaga ai le fa’atulagaina o a latou Ofisa.

 

O le aso mulimuli o le masina lenei o Fepuari ua tu’u atu e le ali’i kovana i Ofisa uma a le malo, e tauaao atu ai le lisi mo le fa’atulagaina o latou Ofisa e iloilo ma fa’amaonia. Ua ia fautuaina fo’i susuga i Faatonusili ina ia fa’aalu se taimi e iloilo ma vaavaai ai i auala uma o loo fa’atautaia ai galuega a ofisa taitasi, ina ia mautinoa o lo o ausia tulaga mautu ma talafeagai e tatau ona oo i ai le tautua a le malo.

 

O se tasi o mataupu o loo fa’aauau pea ona fautuaina ai e le ali’i kovana lana Kapeneta, o le mataupu e fa’atatau i malaga a fa’atonusili poo tagata faigaluega mo fonotaga i fafo, lea e tatau ona lava le taimi e tu’u atu ai i le Ofisa o le kovana mo le iloilo atoa ai ma le fa’amaoniaina, nai lo le fa’ananati atu i se taimi fa’afuase’i.

 

Na taua e le alii kovana i lana tusi i Fa’atonusili e fa’apea, e foliga mai o loo “fa’ataliga tutuli” lava ni isi o Faatonusili i le fa’atauaina o lenei mataupu.

 

“O lou le auai i le galuega mo le sili atu i le aso e tasi, e tatau ona fa’amaonia muamua atu le tulaga lena mai le ofisa o le ali’i kovana, aemaise lava pe afai e te le auai i le galuega ona o tulaga tau fa’alavelave fa’aleaiga, se’i vagana pe afai ua e gasegase,” o se vaega lea o le tusi a le ali’i kovana.

 

I tulaga o malaga ona o fonotaga tau i galuega, ua toe fa’amalosia le tatau lea ona vave tu’uina atu talosaga mo le fa’amaoniaina o ia malaga, ae afai e malaga ona o fa’alavelave fa’aleaiga, ua fautuaina Fa’atonusili ina ia fa’aaoga livi tausaga mo malaga ia, ae mana’omia fo’i le fa’amaonia muamua fa’atoa ave ai aso livi.

 

Na fa’aalia fo’i e le ali’i kovana i Fa’atonusili a’afiaga e tula’i mai, pe afai e le aloaia tulafono ua mae’a ona toe fa’amanatu mo malaga i fafo atoa ai ma le malolo mai le galuega ona o fa’alavelave tau i le aiga.

 

“E taua tele lou auai i le galuega ua tofia oe e te galua ai mo le manuia o la tatou faigamalo”, o se vaega lea o le tusi a le ali’i kovana.