Ads by Google Ads by Google

Fa’aauau pea ona pasia Fono Faitulafono tofiga a le Kovana


Le Faletua ia Evelyn Lili’o Satele, Fa’atonusili filifilia o le Ofisa o Tagata Matutua. [ata AF]

Tofa Fu’ega Saite Moliga, Fa’atonusili filifilia o le Ofisa o Auaunaga Tau Pulega a le malo. [ata AF]

Le Fa’atonusili filifilia o le Ofisa o Auaunaga Tau Pulega a le malo ma ni isi o lana aufaigaluega, faapea ai uo ma aiga ina ua mae’a lana iloiloga i le maota o sui i le taeao ananafi. [ata AF]
ausage@samoanews.com

O le lua ai lenei o vaiaso talu ona fa’aauau pea galuega a le Fono Faitulafono, mo le iloiloina lea atoa ai ma le fa’amaoniaina o tofiga a le afioga i le ali’i kovana ua mae’a ona tu’uina atu, mo i latou ua tofia e avea ma Fa’atonusili o Matagaluega ma Ofisa a le malo.

 

I le pasia ai e le maota maualuga o Faleosina Voigt e avea ma Fa’atonsili o le Ofisa o Galuega Lautele a le malo, fa’apea ai ma le susuga a Filifa’atali Michael Fuiava e avea ma Fa’atonusili o le Ofisa o Fa’atoaga, e ala i le palota fulisia e 17-0 mo i laua uma e to’alua, ua aloaia ai loa le avea o i laua ma Fa’atonusili o ia Ofisa taua a le malo, ina ua mae’a fo’i ona pasia o la suafa e le maota o sui i le vaiaso na te’a nei.

 

Ae i luma o le maota o sui i le taeao ananafi, na pasia ai le suafa o le Faletua ia Evelyn Lili’o Satele e avea ma Fa’atonusili o le Ofisa o Tagata Matutua i le atunu’u (TAOA), i le palota e 17-1, fa’atasi ai ma le suafa o le tofa a Fu’ega Saite Moliga e avea ma Fa’atonusili o le Ofisa o Auaunaga Tau Pulega a le malo, i le palota e 18-0.

 

O fa’aiuga a le maota o sui, na faia lea ina ua mae’a ona fa’ataunu’uina iloiloga e fesiligia ai agava’a o i latou ua filifilia, e avea ma sui o le kapineta mo le isi 4 tausaga o lo o lumana’i nei.

 

ILOILOGA A EVELYN SATELE

 

Na fa’afetaia e le toatele o afioga i Faipule na maua le avanoa e fesiligia ai agava’a o le faletua ia Satele, tofiga a le kovana, lea ua mafai ai ona filifilia se tasi o Tina ua loa lana tautua i totonu o le malo mo le silia i le 37 tausaga.

 

O le tele o mataupu na fesili i ai afioga i Faipule, o mataupu lava e fa’atatau i polokalame o loo agava’a ai Tina ma Tama matutua o le atunu’u.

 

Na fautuaina e le afioga i le ali’i faipule mai Manu’a ia Vesi Talalelei Fautanu Jr le molimau, ina ia silasila toto’a pea i auala e fa’aleleia atili ai le polokalame o Taumafa Vela mo tagata matutua, ona o lo o to’atele pea ni isi o tagata matutua o loo fa’asea i lea suiga, e ui o se suiga na afua mai i se fautuaga a le Ofisa o lo o auala mai ai le vaega tupe o loo fa’atupe ai le polokalame.

 

Na taua e Evelyn le i ai o ni fa’afitauli i ni isi o vaega tupe o loo faatupe ai se tasi o polokalame mo tagata matutua, e mafua mai i tulaga fa’aletonu i fa’amaumauga ma ripoti sa tu’uina atu, ae ua latou galulue fa’atasi nei ma le aufaigaluega i le tu’u fa’atasia o vaega sa afua mai ai le fa’aletonu, ma le fa’amoemoe e tatau ona vave mai se taimi e aveesea ai tulaga fa’aletonu i vaega tupe o le polokalame.

 

E silia i le 3,000 le aofa’i o tagata matutua ua mae’a ona lesitalaina i le polokalame, ma o lo o fa’aauau pea lava i le taimi nei tautua masani o loo ofoina atu mo tagata matutua o le atunu’u.

 

ILOILOGA FU’EGA SAITE MOLIGA

 

Na taua e le to’atele o afioga i Faipule o le maota o sui lo latou fa’afetaia o le ali’i kovana, ina ua mafai ona tofia le tofa Fu’ega e avea ma faatonu o le Matagaluega o Auaunaga Tau Pulega a le malo mo le isi 4 tausaga o lo o lumana’i.

 

Na taua e Fu’ega i le taimi o lana iloiloga i luma o le Komiti o le Sailiga o le Tamaoaiga o le malo, lea na taitaia e le afioga i le ali’i Faipule ia Faimealelei Anthony Fu’e Allen e faa’pea, e ui i le tele o ona agava’a eseese sa ia maua mai i tausaga e tele o lana tautua i totonu o le malo o Amerika Samoa, na pau lava le fa’amatalaga a le “nusipepa” o lo o faia faatatau ia te ia, “o ia o le uso o le ali’i Kovana”.

 

Na taua e le Fa’atonusili filifilia i luma o le Komiti a le maota o sui e fa’apea, o vaega e lua o loo ave i ai lana fa’amuamua, o le saogalemu ma le soifua maloloina o tagata faigaluega a le malo o loo galulue i le maota o le malo i Utulei, le EOB.

 

Ina ua fesiligia e Faipule le tulaga o loo i ai le maota o le malo i Utulei i le taimi nei, na taua ai e le molimau e fa’apea, e le gata e le o saogalemu le tulaga o loo i ai le fale o le malo i le taimi nei, ae le o i ai fo’i ni fuafuaga i ni auala e mafai ona sulufa’i i ai tagata faigaluega, pe afai ae tula’i mai ni fa’alavelave e pei o mu ma fa’alavelave fa’alenatura.

 

O se tasi o fa’afitauli o loo tula’i mai i le maota o le malo i le taimi nei, o le tele lea o le iniseti fa’alafua o le isumu (tulou) o loo fetolofi solo ai, peita’i na saunoa Fu’ega e fa’apea, o le fa’afitauli o loo mafua ai lea tulaga, o le ave lea e tagata faigaluega o taumafa i totonu o Ofisa i taimi o aoauli, ma faigofie ai ona lalata atu i ai isumu, ae ua i ai le konekarate o loo galulue mo le foiaina o lea fa’afitauli i le taimi nei.

 

Na taua e Gafatasi Afalava ma Vailoata E. Amituana’i le faamalieina o i laua i agava’a o le Fa’atonusili filifilia, e agava’a ai o ia mo le galuega, ae na taua e le sui fofoga fetalai ia Fetu Fetui Jr e fa’apea, e le gata i le tele o agava’a o Fu’ega i lana tautua i le malo fa’apea ai vaega ‘au a le malo tele o Amerika, ae o ia fo’i o le Ta’ita’i o le Ekalesia EFKAS i Iliili.