Ads by Google Ads by Google

Fa’aauau pea ona tu’uina atu fesoasoani mo le Hope House i Tafuna


Tama Matutua o lo o tausia i le Hope House i Tafuna. [ata AF]

Le taimi e asia ai Tama ma Tina matutua o lo o tausia i totonu o le Hope House e mafutaga ma Ekalesia eseese i le atunu’u. [ata AF]
ausage@samoanews.com

A o sauni atu ai le nofoaga o le Hope House a le Ekalesia Katoliko mo le fa’amanatuina o le 30 tausaga talu ona tatalaina lana tautua i Amerika Samoa i le masina fou, o lo o fa’aauau pea ona tauaao e le Komiti Fa’afoe a le Hope House fesoasoani tupe ma foa’i mai soo se vaega mai le atunu’u lautele fa’apea ai Fa’alapotopotoga ma Pisinisi Tumaoti.

 

E ese mai i le ulua’i foa’i tupe e $10,000 mai le Faletupe a Hawai’i, lea na tu’uina atu i le masina na te’a nei o se tasi o ana fesoasoani fai fai pea mo le Hope House talu mai le 14 tausaga ua mavae, o le vaiaso na te’a nei na tauaaoina ai e le Komiti Fa’afoe isi fo’i foa’i tetele mai le atunu’u.

 

E $10,000 le foa’i tupe na tu’uina atu e le Mafutaga a Tina a le Pulega Samoa Pago Pago, ae $2,500 le foa’i mai le kamupani la’uoloa a le Matson Shipping Line i totonu o le atunu’u.

 

O Ta’ita’i o le Ekalesia Katoliko fa’apea ai ma le Komiti Fa’afoe o lo o gafa ma le tapenaina o lenei fa’amoemoe, na fai ma sui o Tama ma Tina matutua faapea ai fanau o lo o tausialelei i lalo o le auaunaga a le Hope House e taliaina lenei foa’i taua.

 

I le saunoaga a le afioga ia Mosiniolo Viane Etuale, o ia fo’i lea o le Faifefau mo le Mafutaga a Tina ma sui o le Komiti Fa’afoe i le taimi na latou foa’i atu ai le siaki tupe i le Komiti Fa’afoe, sa latou taua ai lo latou naunau pea e fa’atino mea silisili e fesoasoani ai i le fa’amanatuina o le Iupeli Siliva a le Hope House i lenei tausaga.

 

Na manino i le saunoaga e fa’afetaia ai sui o le Mafutaga a Tina, e le o se taimi muamua lea ua latou tu’uina atu se fesoasoani mo le Hope House i auala e fa’aleleia ai la latou tautua i soo se itu.

 

O le Ta’ita’ifono o le Komiti Fa’afoe o tapenaga o le Iupeli Siliva ia Larry Sanitoa na fai ma sui o le Ekalesia e fa’afetaia ai le foa’i a le kamupani la’uoloa a le Matson, lea na fai ai le susuga a Lanu Penn ma le susuga a John Pereira, o le sui o le kamupani a le Molida Shipping Agency i le atunu’u la te momoliina atu le fesoasoani.

 

O le kamupani la’uoloa a le Matson na amataina lana tautua i Amerika Samoa i le tausaga e 2013, mo le fela’uina mai o oloa mai Niu Sila atoa ai ma isi atumotu o le Pasefika e aofia ai ma Amerika Samoa.

 

O le tausaga e 2016 na amata aloaia ai loa lana tautua i le la’uina sa’o mai lea o oloa mai Amerika i totonu o le teritori, e aofia ai ma le setete o Hawai’i. E pei ona taua e Sanitoa, o le kamupani la’u oloa a le Matson o se tasi lea o kamupani la’uoloa lauiloa i totonu o Amerika, ua maualuga lona tomai atoa ai ma le fa’atuatuaina i tulaga o le fela’ua’iina o oloa.

 

O le agaga fa’afetai a le Komiti Faafoe e pei ona saunoa Sanitoa, o le tulaga o lo o i ai le lagolago atu a le atunu’u, fa’alapotopotoga aemaise ai o pisinisi, i lo latou naunau lea e fesoasoani i le fa’atupeina o le fa’amoemoe a le Hope House.