Ads by Google Ads by Google

Fa’aauau pea su’esu’ega Ofisa o Femalagaaiga mataupu i ID pepelo


Se vaaiga i le tumu tumu ai o le atunu’u i luma o le Ofisa o Femalagaiga i le ofisa o le malo i Utulei, mo le fa’ataliina o le taimi e pu’e ai ata o latou ID, i le taimi na fa’amalosia suiga i le tautua a le Ofisa o Femalagaaiga. [ata AF]
ausage@samoanews.com

O lo o fa’agasolo pea i le taimi nei su’esu’ega a le Ofisa o Femalagaaiga a le malo, fa’apea ai ma ni isi o Ofisa Faamalosi Tulafono, i le mataupu e fa’atatau i ID pepelo ia na fa’aaoga e ni tagata Saina e ulufale atu ai i totonu o Niu Sila i le ogatotonu o le tausaga nei.

 

E tusa ai o ripoti ua maua e le Samoa News, o lo o taua ai le aofa’i o ID e 33 o lo o masalomia o ID pepelo ia sa fa’aaoga e malaga ai le to’atele o tagata Asia.

 

Na taua e se molimau fa’atuatuaina i le Samoa News i le vaiaso na te’a nei e fa’apea, a o fa’agasolo ai su’esu’ega a le malo i le tau sailiina o le mafu’aaga o nei ID pepelo, e silia i le to’a 10 tagata faigaluega a le Ofisa o Femalagaaiga ua fa’amalolo mai a latou galuega, e mafua mai i le le fa’amaoni i le fa’atinoina lea o latou galuega.

 

E le o mautinoa poo ni isi o i latou ua fa’amalolo e le Pulesili o Femalagaaiga, e i ai so latou sootaga ma le mataupu e fa’atatau i ID pepelo o lo o tau su’esu’eina nei. Na pau le fa’amatalaga na tuuina mai e le molimau, o ni isi o latou ua fa’amalolo, e mafua mai i le fa’aaoga o tupe sa totogi mo le fa’afouina o ID a tagata mai fafo.

 

Mo se fa’ata’ita’iga o tupe sa totogi e fa’afou ai ID o tagata i le tausaga na te’a nei. Ae ina ua toe fo’i mai i latou nei e fa’afou a latou ID i le tausaga lenei, o iina na fa’atoa maua ai e le i totogiina le fa’afouina o a latou ID i le tausaga ua mavae.

 

Ae ina ua suesue ma fesiligia tagata mai fafo i le mafu’aaga o le le totogiina o le fa’afouina o a latou ID i le tausaga ua mavae, na manino ai i a latou fa’amatalaga, sa latou totogi tupe mo le fa’afouina o a latou ID, ae foliga mai e le i fa’amaoni tagata faigaluega i le fa’atinoina o le latou galuega.

 

Na taua e ni isi o tagata mai fafo le avea o le fa’afitauli e pei ona tula’i mai i tagata Saina na malaga i ID pepelo i Niu Sila, ma itu ua fa’a faigata ai le talosagaina o visa mo tagata e ulufale atu ai i Niu Sila. Ona o lea tulaga, ua matua auiliili ai lava e le Ofisa o le Komesina a Niu Sila i Samoa fa’amatalaga uma e fa’atatau i ID o tagata mai fafo o loo nonofo mau i Amerika Samoa, ina ia fa’amaonia e le o ni ID pepelo.

 

Na fa’amaonia mai e se sui Sinia o le Ofisa o Femalagaaiga a le atunu’u i le Samoa News, le tele o suiga ua faia e le Pulesili o le Ofisa, afioga Peseta D. Fuimaono ina ia fa’a faigofie ai feuiaiga mo le pu’eina o ID o tagata mai fafo e autova’a atu i le Ofisa.

 

O lo o galulue soosoo tauau pea le Ofisa o Femalagaaiga fa’apea ai le Komiti Fa’afoe o Femalagaaiga, mo le sailia o auala uma e fa’a faigofie ai le fa’atinoina o galuega.

 

Na taua e se sui o le Komiti Fa’afoe a le Ofisa o Femalagaaiga i le Samoa News, le tele o talosaga mo pemita e ulufale mai ai tagata Asia i le atunu’u ua teena e le Komiti Fa’afoe, ona e le o ausia le tele o tulaga e mana’omia ina ia fa’ailoa ai le mafu’aaga o le ulufale mai o tagata asia i Amerika Samoa.

 

Saunoa le sui o le Komiti Fa’afoe e fa’apea, a o taumafai ai le malo e saili auala uma e fesoasoani ai i le fa’aitiitia o le soona ulufale mai o tagata Asia i le atunu’u, e foliga mai o le fa’afitauli o lo o mafua mai lava i tagatanu’u o Amerika Samoa, i le naunau lea e aumai tagata Asia e faipisinisi i le atunu’u e maua ai alagatupe mo i latou (sponsor), ae atili ai ona tupu le fa’afitauli o le to’atele o tagata mai fafo ua ulufale mai ma aumau i Amerika Samoa.