O le sauniga e tapunia aloaia ai le fa’amanatuina o le sao o Tama ma Tina matutua i le atunu’u i le taeao analeila, na saunoa faafetai ai le afioga i le ali’i Kovana e fai ma sui o le malo ma tagatanu’u uma o Amerika Samoa, e fa’afetaia ai le tautua a Tama ma Tina matutua o le atunu’u, i lo latou fa’ataotoina lea o le alafua ua mafai ai ona manuia le lumana’i ma olaga o tupulaga i ona aso nei.

“E le mafai e upu ona fa’aleo lo matou agaga fa’afetai e tusa ai o la outou tautua i le malo ma le atunu’u, ua pau i le eleele la outou afu sisina ma la outou tautua matavela i aso e tele, o le tofa saili lena ua mafua ai ona manuia tupulaga i ona aso nei”, o se vaega lea o le saunoaga a le tofa i le Tootoo ia Lolo Matalasi Moliga i le sauniga e taualuga ai polokalame mo le fa’amanatuina o le aso o Tagata Matutua i lenei vaiaso ua mae’a.

Na fa’atumulia le malae o le Su’iga’ula a le Atuvasa i Utulei i le mamalu o Tama ma Tina matutua, o ta’ita’i o le malo faapea ai le atunu’u na faamalo’ulo’u atu e lagolago ma sapaia le fa’amoemoe o tagata matutua.

Na amata le polokalame i le solo tele lava na amata mai i luma o le maota o le Lee Auditorium i Utulei, lea na ta’ita’ia mai e le Faletua o le ali’i kovana ia Cynthia Moliga, ma fa’ai’u atu ai loa i luma o le Fale Samoa a le malo i le Malae o le Su’iga’ula a le Atuvasa, mo le amataina o le polokalame.

O le susuga i le ali’i Faifeau ia Rev. Tofiga Tofiga mai le Ekalesia EFKAS mai Alao na ta’ita’ia le sauniga lotu puupuu i le tatalo, soo ai loa ma le saunoga faapitoa mai le afioga i le lai’i kovana o le atunu’u, ae fa’ai’u i le saunoaga fa’apitoa mai le Faatonusili o le Ofisa o Tagata Matutua, le faletua ia Evelyn Satele.

Sa i ai fo’i meaalofa taualoa na saunia mo Tama ma Tina matutua ua loa la latou tautua i totonu o le malo fa’apea ai le polokalame a le TAOA.

I lana saunoaga faapitoa mo le aso o Tama ma Tina matutua, na fa’atauaina ai e le ali’i kovana le taua o le tofa ma le moe o lo o maua mai i tama ma tina matutua, lea o lo o mafai ai ona ta’ita’iina le soifua manuia o tupulaga talavou i soo se taimi ma soo se aso.

“O outou e saili i ai le moe ma le tofa a le atunu’u, e fesili i ai i se fautuaga ina ia manuia fuafuaga fa’ataoto mo le luana’i o aso fai soo”, o le saunoaga lea a le ali’i kovana.

“Ua tele naua lu’itau fa’a tagata matua i lenei vaitaimi, ua tele fo’i suiga ua tatou molimauina i tu ma agaifanua a Samoa, ma ua amata ai ona ponatia le aga’i i luma o le olaga fa’a tagata matua i lenei vaitau, ae o le itu taua o loo taoto lelei pea la outou fa’autautaga i auala e fa’ato’ato’a ma fa’afilemu ai lu’itau o le olaga”.

“E ui i le tele o lu’itau o lo o fetaia’i ma tagata matutua i lenei vaitau, ae o le lu’itau pito sili ona faigata i lenei vaitau, pe fa’apefea ona fa’asoa le tamaoaiga a le Atua o lo o ia te outou i alo ma fanau a le atunu’u ona ua maitauina tulaga le faigofie ua i ai le olaga i lenei taimi”.

“A e amuia tupulaga i nei ona po o lo o mafai ona i ai le sootaga ma outou tama ma tina matutua o le atunu’u, lea o lo o mafai ai ona fa’asoa mai le tofa ma le fa’autaga o lo o ia te outou, le tofa e manuia ai aiga ma le atunu’u. E ui fo’i i le faigata ma le tele o lu’itau i lenei vaitau, ae le mafai ai lava ona tu’ulafoaina o tatou tama ma tina matutua e le Atua, pau la tatou fatuaiga e fai o le fa’asoa lea ma tapu’e olaga o tupulaga talavou a le atunu’u, ina ia oo mai le valaau a le Atua ia te i tatou ae ua mae’a ona fa’asoa uma atu mea lelei e ta’ita’iina ai lo latou olaga mo le lumana’i”.

Na taua e le ali’i kovana ia Lolo le tele o le soifua aoga atoa ai ma mea lelei ua mafai ona ofoina mai e tagata matutua o le atunu’u i aiga, ekalesia faapea ai le malo, ma ua mafai ai fo’i ona molimauina tulaga mataina ia i le atina’e o le malo i le taimi nei.

Sa ia fa’ailoa i tagata matutua le tele o lu’itau atoa ai ma fa’aletonu o lo o fetaia’i ma le polokalame a tagata matutua i lenei vaitau, peita’i o lo o galulue malosi pea le Ofisa o le TAOA faapea ai le malo ma le aufaigaluega e saili auala uma e foia ai nei mau fa’afitauli.

I le saunoaga i’u o le aso e pei ona saunoa i ai le afioga i le ali’i tama’ita’i Fa’atonusili ia Satele, sa ia fa’afetaia ai le malo i lo latou lagolagoina o le sao o tagata matutua i Amerika Samoa.

“O la outou lagolago ua mafai ai ona fa’atinoina e le ofisa ma le aufaigaluega le tautua talafeagai mo tama ma tina matutua, ma ua molimauina fo’i lo latou agaga fiafia i le tele o fa’amanuiaga ma polokalame ua mafai ona ofoina atu e le malo mo  latou”, o le saunoaga lea a Satele.

Sa ia fa’afetaia lana aufaigaluega e tusa ai o le fesoasoani malosi ia te ia i le fa’atinoina o le tautua mo tagata matutua, ae fa’apitoa lava lana fa’afetai i tama ma tina matutua, i lo latou onosa’i pea i soo se taimi e tula’i mai ai lu’itau i le galuega.

“O outou laufofoga fiafia, o le fiafia e siva atoa ai ma le fa’ailoa mai o le lagolago i aso uma, o uiga ia ua mafai ai ona aumai le loto tele ia te a’u ma le aufaigaluega e fa’atinoina ai tiute ma galuega lelei mo outou”.

Na fa’ai’u le polokalame i siva ma fa’afiafiaga a tagata matutua, ae taualuga ai loa i le taumafataga mo le auvalaaulia.