O le ripoti mo galuega fa’atino a Matagaluega eseese uma a le malo i le Kuata 1 o le Tausaga Tupe lenei ua mavae atu, o loo taua ai le tele o pisinisi na mafai ona maua laisene mo le fa’afoeina o a latou pisinisi.

O loo manino i le ripoti a le Matagaluega o Fefa’atauaiga ma Alamanuia (DOC) a le malo le tele pea o pisinisi e le o mafai ona toe fa’afou a latou laisene pisinisi talu mai le tausaga tupe tuai ua mavae atu, atoa ai ma isi tausaga tupe i tua atu.

E pei ona taua i le ripoti lea ua tauaao e le Fono Faitulafono, e tusa ma le 3,037 le aofa’i o laisene pisinisi sa mafai ona sainia ma tu’uina atu e le DOC mo pisinisi sa talosaga mo ni laisene, fa’atusatusa i le 2,900 o laisene sa tu’uina atu i le Kuata 4 o le tausaga tupe tuai na fa’atoa mae’a atu nei.

I le Kuata 1 o le tausaga tupe tuai 2016, e 3,813 le aofa’i o laisene pisinisi sa sainia ma tu’uina atu i pisinisi sa talosaga, peita’i ina ua oo mai i le Kuata 2 o le tausaga tupe tuai, na fa’aitiitia ai loa le aofa’i o laisene i le 2,619, ae na toe alu i luga i le Kuata 3 i le aofa’i e 2,775, ma le oo atu ai lava i le 2,900 i le fa’aiuga o le Kuata 4 na sosoo atu nei, lea e aofia ai le masina o Iulai e oo atu ia Setema 2016.

E ese mai i laisene pisinisi fou ua mae’a ona sainia na tu’uina atu i pisinisi, o loo manino fo’i i le ripoti le tele pea o pisinisi e lei toe fa’afouina a latou laisene, talu mai le Kuata 1 o le tausaga tupe tuai ua mavae atu seia oo mai i le Kuata 1 o le tausaga tupe fou lenei, lea e aofia ai le masina o Oketopa e oo mai ia Tesema 2016.

I le Kuata 2 o le tausaga tupe tuai ua mavae atu, e 1,194 le aofa’i o pisinisi e le’i mafai ona fa’afouina a latou laisene, peita’i na fa’aitiitia lea aofa’i i le Kuata 3 i le 1,038, ma toe fa’aitiitia ai i le Kuata 4 i le aofa’i e 913, ae oo mai i le Kuata 1 o le tausaga tupe fou lenei ua tula’i mai laisene pisinisi e lei fa’afouina i le 776.

Na taua e ni isi o afioga i Faipule i le vaiaso nei le taua tele o fa’amaumauga mai matagaluega eseese a le malo e pei o le DOC, ua mafai ai ona silafia e le Fono fa’apea ai ma le atunu’u le tulaga o lo o aga’i i ai le tamaoaiga o le malo i le taimi nei.

E ui e le o matua iloga le tulaga malosi i tupe maua a le malo talu mai le amataga o le tausaga tupe fou lenei, e pei ona saunoa ni isi o afioga i Faipule, peita’i na taua e le afioga a Faimealelei Anthony Fu’e Allen le tatau lea ona fa’aopoopo pea le aofa’i o pisinisi fou i le atunu’u, ona o iina e fa’alagolago i ai le tamaoaiga o le malo i le lumana’i, aemaise ai fo’i tulaga o galuega fa’aopoopo mo tagata o loo tau saili ni galuega.

Saunoa Vesi Talalelei Fautanu Jr e fa’apea, o le tulaga i pisinisi fou ia ua fuafua le malo e tatalaina i se taimi e le o toe mamao, o le a mafai ai e le malo ona maua se isi auala e tau fesoasoani ai i le fa’a faigaluegaina o ni tagata se to’atele, ona o lea ua tapunia lala o le kamupani a le Samoa Tuna Processors (STP) sa to’atele fo’i tagata faigaluega a le atunu’u sa maua ai galuega.

E pei ona taua i le ripoti a le DOC, e 9 pisinisi mai fafo ua mae’a ona sainia e le Fa’atonusili a latou laisene, talu mai le masina o Oketopa e oo mai ia Tesema o le tausaga na te’a nei.

O lo o fa’aauau pea galuega masani a le Komiti Fa’afoe latou te iloiloina talosaga mo laisene pisinisi fou ina ia mautinoa, e ausia e pisinisi o loo talosaga mo ni laisene aiaiga uma e agava’a ai i latou mo le fa’afoeina o pisinisi i le atunu’u.