Ads by Google Ads by Google

Fa’ailoa Kovana lona lagolago i le fa’a a’upegaina o Leoleo


[ata: SN]
ausage@samoanews.com

Ua fa’aalia e le afioga i le ali’i Kovana ia Lolo Matalasi Moliga lona matua lagolagoina o le fuafuaga a le Komesina o le Matagaluega o Leoleo, i le fa’aaupegaina lea o ali’i ma tama’ita’i Leoleo i le taimi e fa’atino ai a latou tiute i le puipuia o le saogalemu o le atunu’u.

I se feiloaiga ma Tusitala i le 2 vaiaso talu ai, na taua ai e le afioga i le ali’i Kovana le leai o se fa’aletonu o i ai i le fuafuaga a le Komesina o Leoleo, e fa’aaupegaina ai ali’i ma tama’ita’i Leoleo.

Ina ua fesiligia i sona taofi, na saunoa ai le tofa Lolo e fa’apea, o ia sa i ai i le fale fa’amasino le tumau i le taimi na tula’i mai ai le fa’alavelave lea na tagatavaleina ai le ali’i leoleo na maliu, susuga Det. Lusila Brown. E pei ona saunoa Lolo, e tupu le fa’alavelave ae o loo faia sa latou fonotaga ma ni isi o tagata fai pisinisi i luga o le potu fono o le Ofisa sa avea ma Ofisa le tumau o Fa’amasinoga.

I lona talitonuga, e le fia vaai i se tasi o lana fanau o a’afia fa’apea i le taimi e avea ai o ia ma Leoleo.

“Ou te le fia vaai atu o manu’a fa’apena fo’i so’u atali’i poo so’u afafine, o le mafua’aga lena ou te matua lagolagoina ai lava le fuafuaga ina ia fa’aaupegaina Leoleo, ina ia fesoasoani ai i le fa’atinoina o a latou tiute tauave,” o le saunoaga lea a Lolo.

Sa ia taua atili fo’i e fa’apea, e ui i le eseese o finagalo o tagata e fa’atatau i lenei mataupu, ae i lona taofi, ua oo i le taimi ua tatau ai ona si’itia le auaunaga a le Ofisa o Leoleo, ina ia mautinoa e malu puipuia le atunu’u i soo se taimi.

“Ua tele suiga ua vaaia i le atunuu i le taimi nei, e mana’omia ai lo tatou fesootai ma fa’apipii atu i ia suiga, ina ia mafai ai ona fesoasoani i le tatou atunu’u aemaise ai galuegaa Leoleo,” o le saunoaga lea a Lolo.

Talu mai le masina o Oketopa o le tausaga nei lea na aloaia ai le fa’aaupegaina o ali’i ma tama’ita’i Leoleo, o lea fa’atoa maua mai se finagalo o le Ta’ita’i o le atunu’u e uiga i lenei mataupu.

Na taua e le Komesina o Leoleo, tofa Le’i Sonny Thompson i le aso na fa’auu ai Leoleo latou te tauaveina aupega, ua lagona lona fiafia ina ua ia mautinoa ua matua mautu lava le aoaoina o ali’i ma tama’ita’i Leoleo mo le fa’atinoina o le galuega o le tausiaina lea o le soifua saogalemu o le atunu’u.

Na faamanino e Le’i i le Samoa News i le tele o taimi e fesiligia ai o ia i lenei mataupu e fa’apea, o lona tiute i lalo o le Tulafono, na te saunia aoaoga ina ia mafai ai ona aoaoina Leoleo mo le fa’a aupegaina o i latou.

O le faiaoga i le fa’aaupegaina o Leoleo, susuga Ernie Haleck lea ua malolo litaea mai i le Ofisa Leoleo i Los Angeles (LAPD), o ia lea sa gafa ma le fa’atautaia o aoaoga mo Leoleo, ma ua fa’amoemoe e toe malaga mai i le masina o Mati o le tausaga fou, mo le toe fa’aauauina o aooaga mo i latou ua mae’a ona tauaao atu i ai a’upega.

O i latou ua fa’aaupega e aofia ai Leoleo uma o lo o galulue i le Tactical Units a le Ofisa o Leoleo, e aofia ai le Vaega o loo galulue mo le sailia o fualaau fa’asaina.