Ads by Google Ads by Google

Fa’aitiitia i latou a’afia i ‘auga fa’ama’i o le ‘Zika virus’


Sui o le Matagaluega o le Soifua Maloloina i le taimi na latou tu’uina atu ai fa’amatalaga e fa’atatau i le fa’ama’i o le zika virus i luma o le maota o sui i le vaiaso na te’a nei. [ata AF]

O fa’amaumauga mai le Matagaluega o le Soifua Maloloina lea na tauaao e afioga i Faipule i le aso Faraile na te’a nei, ua manino mai ai le fa’aitiitia lea o i latou o lo o a’afia i auga o le fa’ama’i pipisi o le ‘zika virus’.

 

O le popole o afioga i Faipule i le saogalemu o le atunu’u, atoa ai ma le fiamalamalama i le tulaga ua i ai tapenaga a le Soifua Maloloina mo le fa’aitiitia o le pipisi o le ‘Zika virus’, na mafua ai loa ona valaauina se iloiloga sa faia i le taeao o le aso Faraile na te’a nei a le Komiti o le Soifua Maloloina, i lalo o le ta’ita’iga a le afioga i le ali’i faipule ia Ve’evale Meauta Mageo o le sui ta’ita’i komiti.

 

Na fa’amanino e le sui mai le Soifua Maloloina ia Scott Anesi e fa’apea, e le o i ai se tulaga fa’atupulaia o i latou o lo o a’afia i auga o le ‘Zika virus’, ae o lo o aga’i atu ina fa’aitiitia le pipisi o lenei fa’ama’i, ma o le tulaga lea ua fa’amamafa i ai puipuiga a le Soifua Maloloina, o Tina ma’itaga ina ia mautinoa e le a’afia a latou pepe i ‘auga matuia o lenei fa’ama’i.

 

Na fesili le sui fofoga fetalai ia Fetui Fetu Jr pe ua i ai se tasi ua maliu i lenei fa’ama’i, lea na fa’amaonia mai ai e Anesi, e leai lava se soifua ua ma’imau talu ona toe pipisi mai le ‘Zika’ i le atunu’u, ma o lo o fa’aauauina pea fautuaga mo le fa’amamaina lea o nofoaga eseese i totonu o nu’u ma le atunu’u atoa e faigofie ona tau tu’ufua a namu o lo o latou feaveaia le siama o lo o mafua mai ai lenei fa’ama’i.

 

“O le la’asaga lea ua o o i ai puipuiga o le fa’ama’i o le ‘Zika virus’ mo le isi 3 tausaga, o le siaki lea o pepe na fananau mai i le vaitau lenei, ina ia mautinoa o lo o soifua maloloina pea i latou”, o le saunoaga lea a Anesi.

 

Na faamaonia e Anesi le leai o ni pepe fou ua fananau mai ua a’afia, e ui o le isi lea popolega tele sa i ai i le Matagaluega talu ona toe alia’e mai auga o le ‘Zika virus’ i le tausaga na te’a nei.

 

O ni isi o atugaluga na fa’ailoa e afioga i faipule i le taimi o le iloiloga, o le amata lea ona le toe vaaia taumafaiga sa amata mai e le matagaluega i masina e tele ua mavae, o le galulue fa’atasi lea ma afioaga e fa’amama le lapisi o lo o mafua ai ona tele le namu o lo o feaveaia le fa’ama’i, ae na taua e Anesi le fa’aauau pea o galuega a le matagaluega e pei ona galulue fa’atasi ai ma Pulenu’u o afioaga eseese i le atunu’u, i le fa’aauauina lea o le polokalame o le fa’amamaina o le lapisi.

 

O le itu lelei e pei ona taua e Anesi, o le fa’aauau pea lea ona leai se isi mai Manu’a ua a’afia i lenei fa’ama’i, ae na saunoa Fetui e fa’apea, o le ki atoa o le puipuiga o le fa’ama’i o le ‘Zika’ o le fa’auau pea lea o le fa’amamaina o le lapisi.