O le vaiaso na te’a nei na fa’alauiloa ai e le afioga i le ali’i kovana ia Lolo Matalasi Moliga ni isi o ana tofiga fou, mo i latou ua avea ma Fa’atonusili le tumau o matagaluega eseese a le malo, e fa’atali ai le taimi e fa’amaonia ai i latou e le Fono Faitulafono.

O ni isi o ia tofiga e aofia ai le filifilia o Le’i Sonny Thompson sa avea ma Faatonusili o le Matagaluega o Tagata Faigaluega a le malo (DHR), e avea ma Komesina le tumau o le Matagaluega o le Puipuiga o le Saogalemu Lautele.

I tofiga a le Kovana sa sainia i le aso 30 Tesema sa ia tofia ai le tofa Tuaolo M. Fruean e avea ma Komesina le tumau o Leoleo, le tofiga sa ia tauaveina mo le 4 tausaga i le nofoaiga mulimulia a Togiola ma Faoa.

O le aso Lua o le vaiaso na te’a nei na fa’atautoina ai le tofa Tuaolo ma isi senatoa e to’a 17, e avea ma sui o le maota maualuga a le Senate mo le nofoaiga lona 35 lea ua fa’amoemoe e tatala aloaia i le itula e 10:00 i le taeao nei.

O isi tofiga a le ali’i kovana e aofia ai filifilia o le sa avea ma Faatonusili o le Matagaluega o le Puipuiga o le Vaomatua ma le Gataifale ia Dr. Ruth Matagi-Tofiga e avea ma Fa’atonusili le tumau o le Matagaluega o Aoga a le malo, le nofoa na tauave e Vaitinasa Dr. Salu Hunkin-Finau na fa’amavae ina ua fa’alauiloa lona fa’amoemoe e tauva mo le tofi faipule i le laumua i Uosigitone i le palota na mavae atu nei, lea e le i manuia.

O isi tofiga e aofia ai le toe filifilia o le ali’i loia ia Douglas Fiaui e avea ma Loia Fautua mo tagata lautele, tofia filifilia Faleosina Voigt e avea ma Fa’atonusili le tumau o le Matagaluega o Galuega Lautele a le malo, fa’apea ai ma le toe filifilia o le tofa a Taeaoafua Dr. Meki Solomona e avea ma Fa’atonusili le tumau o le Matagaluega o Auaunaga ma Tautua lautele a le malo.

O isi tofiga na fa’alauiloa i le fa’aiuga o le vaiaso na te’a nei, e aofia ai le filifilia o Filifa’atali Michael Fuiava sa avea ma Ta’ita’ifono o le Komiti Fa’afoe o le LBJ, e avea ma Fa’atonusili le tumau o le Matagaluega o Fa’atoaga a le malo, le tofiga sa nofoia e le afioga Lealao Melila Purcell.

O le masina o Novema o le tausaga na te’a nei na tofia ai e le ali’i kovana le afioga a Tapaau Dr. Dan Aga e avea ma Fa’atonusili le tumau o le Ofisa o Fa’atoaga, ina ua fa’amavae le afioga a Lealao ona o tulaga i lona soifua maloloina.

O tofiga ua toe filifilia e aofia ai le tofa a Motusa T. Nua lea ua toe filifilia e avea ma Fa’atonusili le tumau o le Matagaluega o le Soifua Maloloina, toe filifilia Catherine Saelua e avea ma Fa’atonusili le tumau o le Ofisa o le Paketi a le malo, ma le afioga a Fuiavailiili Keniseli Lafaele lea fo’i ua toe filifilia e avea ma Fa’atonusili le tumau o le Matagaluega o Fefa’atauaiga ma Alamanuia a le malo.

O tofiga fou a le kovana lea na fa’atoa sainia i le fa’aiuga o le vaiaso na te’a nei, ua fa’amoemoe e amata i le aso 9 Ianuari le aloaia o lo latou tauaveina o nei tofiga.