Ads by Google Ads by Google

Fa’alauiloa Kovana isi ana tofiga fou mo sui o le Kapeneta

ausage@samoanews.com

O le amataga o le vaiaso nei na fa’alauiloa ai e le Ofisa o le afioga i le ali’i Kovana ni isi o tofiga a le ali’i Kovana, mo i latou ua filifilia e avea ma Fa’atonusili le tumau o ni isi o Matagaluega a le malo, e fa’atalitali ai le taimi e fa’amaonia ai i latou i luma o le Fono Faitulafono, ma aloaia ai loa le avea o i latou ma Ta’ita’i o Ofisa o le malo.

 

O ni isi o ia tofiga e aofia ai le toe filifilia o le susuga a Jonathan Fanene e avea ma Fa’atonusili o le Matagaluega o Tupulaga Talavou, Tina ma Tama’ita’i.

 

Na taua e le ali’i kovana le tele o atina’e lelei ma le taua e tatau ona fa’aauau e lea Ofisa, e le gata i le atina’eina o aoaoga aoga ma le taua mo tupulaga talavou, ae fa’apea fo’i i ni isi o polokalame o lo o fesoasoani i le soifua lelei ma le atina’e o tatgata lautele.

 

O le aso 12 Ianuari na aloaia ai le susuga a Fanene i lana galuega ua toe tofia i ai o ia, e fa’atalitali ai le taimi e fa’amaonia ai o ia i luma o le Fono Faitulafono.

 

O se tasi o tofiga na fa’alauiloa e le ali’i kovana i le vaiaso nei, o le filifilia lea o le afioga ia Samana Semo Ve’ave’a e avea ma Fa’atonusili o le Matagaluega o le Puipuiga o le Saogalemu Fa’alotoifale, le nofoa sa nofoia e le afioga a Iuniasolua Utuali’i Savusa.

 

Na taua e le ali’i kovana i se vaega o lana poloaiga e tofia ai Samana lona fiafia tele, ina ua mafai ona toe tofia lenei tamali’i o le atunu’u e avea ma sui o lana Kapeneta mo le taimi lona lua o lana nofoaiga, ina ia mafai ai ona fa’aauau pea lana tautua i le malo ma le atunu’u.

 

O le aso 11 Ianuari na te’a nei na aloaia ai le fa’atinoina o tiute a le afioga a Samana i le tofiga fou ua tofia i ai o ia e le ali’i kovana, e fa’atalitali ai le taimi e fa’amaonia ai o ia e le Fono Faitulafono.

 

O le isi tofiga a le kovana e aofia ai le toe filifilia o Poumele Pete Apisa Galea’i e avea ma Fa’atonusili o le Ofisa e Fesoasoani ia i latou i ai manaoga fa’apitoa o le tino ma le mafaufau.

 

I se vaega o lana poloaiga e toe tofia ai le tofa a Poumele i lenei tofiga, na taua ai e le afioga i le ali’i kovana ia Lolo Matalasi Moliga lona fiafia ina ua toe filifilia Poumele e avea ma totino o le Kapeneta mo lana nofoaiga lona lua, ina ia fa’aauau ai lana tautua mo le atunu’u.

 

O le aso 12 Ianuari lea na aloaia ai le toe nofoia e Poumele o lona nofoa ma o lea tofiga e le fa’amaonia e le Fono Faitulafono.

 

O le toe a’e mai ai o le Fono Faitulafono mai lana malologa e 2 vaiaso i le aso 30 Ianuari, ona amata aloaia ai loa lea iina ona fa’atulaga iloiloga a maota e lua mo le amata fa’amaonia lea o tofiga a le kovana ua mae’a ona tauaao atu i le Fono Faitulafono.