Ads by Google Ads by Google

Fa’aleaoga Fa’amasinoga le tele o moliaga sa tu’uaia ai Okesene Alo


[ata: archive]
ausage@samoanews.com

Mai moliaga mamafa e 28 o loo tu’uaia ai e le malo le ali’i Leoleo o le Falepuipui o Tamaiti i Tafuna (Juvenile Detention Center - JDC), e mafua mai i le faia o gaioiga eseese faasolitulafono i totonu o le nofoaga, o lea  ua fa’aleaoga e le Fa’amasinoga Fa’aitumalo, le 14 o ia moliaga mamafa, ina ua le fa’amalieina le fa’amasinoga i mau fa’amaonia sa tu’uina atu e le malo i le taimi o le ulua’i iloiloga i le taeao ananafi.

 

O moliaga ua fa’aleaoga e le fa’amasinoga fa’asaga ia Okesene Alo e aofia ai moliaga e 10 o lona faia o uiga mataga fa’afeusuaiga fa’asaga i se teineititi sa taofia i le JDC e 15 tausaga le matua, 1 le moliaga o lona fesoasoani lea e fa’atino le solitulafono o le faiaiga ma se teineititi e laititi i lalo o le tulafono, 2 moliaga o lona tagofia o itutinosa o se teineititi e laititi i lalo o le tulafono, ma le moliaga e 1 o lona taumafai lea e fa’alavelave i se molimau.

 

Ae o moliaga mamafa e 14 ua tofu atu nei i luma o le fa’amasinoga maualuga mo le fa’aauauina ai o lana mataupu, e aofia ai moliaga e 4 o le umia fa’asolitulafno o vaega o le pauta fa’asaina o le aisa, 4 moliaga o lona tufaina atu lea o vaega o fualaau fa’asaina o le aisa i fanau laiti sa taofia i le JDC, tasi le moliaga o le gaoi, 3 moliaga o lona fesoasoani e fa’asola ni pagota o loo taofia i le toese, ma moliaga e 3 o lona fa’atagaina lea o ni pagota o loo taofia i le toese e sosola i tua.

 

O le mae’a ai ona tu’uina mai e le afioga i le ali’i fa’amasino ia Fiti Sunia o lana fa’aiuga fa’asaga i lenei mataupu, sa ia faia ai loa ma le poloaiga ina ia fa’aitiitia le tupe e taofia ai Alo i le toese i Tafuna i le aofa’i e $50,000, mai le aofaiga muamua sa i ai i le vaiaso na te’a nei e $200,000.

 

E ui na finau le loia a le malo ia Jedediah Bigelow i le fa’amasinoga ina ia fa’atumauina pea i le $200,000 le tupe e taofia ai Alo i le toese, ona o ia lea o lo o taua i molimau le avea ma ta’ita’i o lenei mataupu atoa, peita’i na saunoa Sunia e fa’apea, tusa lava poo a mafaufauga a le malo e uiga i fa’amatalaga ma ana fa’afinauga, e fa’avae le fa’aiuga a le fa’amasinoga i mau fa’amaonia ua i luma o le fa’amasinoga, ae le o fa’afinauga o loo manatu i ai le itu a le malo.

 

O le aso Lulu la o le vaiaso fou lea ua fa’amoemoe e tula’i ai Alo i luma o le fa’amasinoga maualuga.

 

Na taua e Sunia i le taimi na tu’uina mai ai lana fa’aiuga i lenei mataupu e fa’apea, e ui o loo finau le malo sa fa’ataga e Alo se ali’i pagota ma se teineititi pagota sa taofia i le JDC e momoe i totonu o le sela e tasi i le po atoa, e leai ni mau na tu’uina atu e le malo i luma o le fa’amasinoga e lagolago ai lea tu’uaiga, o le mafua’aga lea ua fa’aleaoga ai a le fa’amasinoga le moliaga o le fesoasoani e fa’atino le moliaga o le faiaiga ma se teineititi laititi.

 

I moliaga e 10 o le faiaiga ma se teineititi e talavou i lalo o le tulafono na tu’uaia ai Alo lea ua fa’aleaoga e le fa’amasinoga, na taua fo’i e Sunia le tulaga lava lea e tasi, i le leai lea o ni mau na tu’uina atu e le malo e lagolago ai la latou tagi, e le gata la ua faaleaoga e le fa’amasinoga moliaga mamafa o le faiaiga ma se teineititi e talavou i lalo o le tulafono, ae ua solofua atu ai ma moliaga e lua o le tagofia o itutinosa o se teineititi e talavoui lalo o le tulafono.

 

Ae mo le moliaga o le fa’alavelave i se molimau lea fo’i na tu’uaia ai e le malo ia Alo ao lea ua fa’aleaoga a le fa’amasinoga, na saunoa ai Sunia e fa’atatau i le leai lea o ni mau fa’amaonia na tu’u atu e le malo e lagolago ai la lea moliaga.

 

Na taua e le molimau a le ali’i leoleo su’esu’e ia Det. Filemoni Amituana’i sa molimau mo le malo e fa’apea, o se tasi o ali’i o loo molia i lenei mataupu, o ia lea o Aviu Titio, na alu ma fa’afefe le victim #2 ma fai i ai, ua la sauni ma Alo e fasioti o ia toe fasioti atu ai ma lona Tina, ina ua la masalomia o ia lea (victim #2) na ta’uina i leoleo le mataupu lenei.

 

Na finau le loia a Alo ia Sharran Rancourt i le fa’amasinoga e fa’apea, o le fa’amatalaga a le molimau a le malo o loo fa’avae i luga o tala fa’alogo, e leai fo’i ni mau fa’amaonia e lagolagoina ai tu’uaiga fa’asaga ia Alo.

 

I le aotelega o le fa’afinauga a Rancourt e uiga i lenei mataupu, sa ia finau malosi ai i le fa’amasinoga ina ia fa’aleaoga moliaga fa’asaga ia Alo, ona o loo fa’avae le tagi a le malo i luga o fa’amatalaga a tamaiti sa taofia i le falepuipui, e aunoa ma ni mau fa’amaonia.

 

Ae na taua e Bigelow i le fa’amasinoga e fa’apea, e le gata ai i le mataupu lenei su’esu’ega a Leoleo, ae o lo o fa’aauau pea suesuega i isi o lo o taua le a’afia i lenei mataupu.

 

E ese mai i moliaga mamafa e 14 o loo tuuaia ai Alo ua tofu atu i luma o le fa’amasinoga maualuga, ae o loo aofia atu ai ma moliaga mama e 7 o loo tu’uaia ai o ia e le malo.