Ads by Google Ads by Google

Fa’amalosia pea le atunu’u i puipuiga mai le tele o fa’ama’i eseese

ausage@samoanews.com

O lo o fa’aauau pea lapataiga mai le Matagaluega o le Soifua Maloloina mo le mamalu lautele o le atunu’u, ina ia fa’amalosia tulaga o le puipuiga mai fa’ama’i eseese o lo o a’afia ai le atunu’u i soo se taimi, e afua mai i fa’ama’i le pipisi seia oo atu lava i fa’ama’i pipisi.

 

I le tulaga o fa’ama’i pipisi e aofia ai le dengue fever, zika, flu, atoa ai ma isi lava ituaiga gasegase o lo o feavea’i e namu fa’apea ai fesuiaiga o le tau, ua fautuaina ai e le Matagaluega o le Soifua Maloloina le atunu’u ina ia fa’aauau pea tulaga o puipuiga i le taimi nei, ma ia vave vaai se foma’i i soo se taimi e alia’e mai ai ni suiga i le tino.

 

“O lo o fa’aauau pea ona a’afia lo tatou atunu’u i fa’ama’i o lo o feavea’i e namu e pei o le dengue fever ma le zika, lea ua molimauina le silia i le to’a 1000 le aofa’i o tagata ua a’afia i le zika e tusa ai o fa’amaumauga mai le falema’i, ma o loo molimauina pea le aga’i i luga, o le fautuaga la mo le atunu’u, ia fa’amuamua lava tulaga o le puipuiga”, o le saunoaga lea a Tamasoali’i Dr. Joseph Tufa i le Samoa News i le vaiaso nei.

 

E ui o se tasi lenei o fa’ama’i ua fa’atele ona lapataia ai le atunu’u, ae o lo o toe fautuaina lava le atunu’u ina ia toaaga pea e fa’amama tafatafa o maota ma laoa, ma ia fa’aaoga le spray o lo o fana ai le tino ina ia faigata ai ona tu ai le namu, ma ia tausisi i le soifua tumama i taimi uma.

 

Mo le fa’amai le pipisi e pei o le suka ma le toto maualuga, ua fautuaina fo’i e le Soifua Maloloina le tatau lea ona fa’aeteete i tulaga o taumafa, ma ia lava le fa’amalosi tino i soo se taimi ina ia mautinoa e faigofie ai ona fa’agasolo alatoto ma maua ai le malosi o le tino.

 

“E tusa ai o fa’amaumauga ua maua e le Soifua Maloloina, o le to’atele o tagata ua a’afia i le gasegase o le fa’amama o le toto, o tagata o lo o maua i le ma’i suka, ma e foliga mai o lo o tupu pea i luga le numera o tagata ua a’afia i le gasegase o le fa’amama o le toto, ae mafua mai lava i le fa’atamala ma le le tausisi i fa’atonuga mo le inuina lea o fualaau ma vailaau sa faatonu atu e le Foma’i, o le fautuaga mo le atunu’u, tausisi i faatonuga a Foma’i ma ia fa’amalolosi e fa’amalosi tino i vaiaso ta’itasi”, o le saunoaga lea a Iutita Sataua, o ia lea o lo o fa’auluulu i ai le Polokalame o le Tete’e atu i le Ma’i Suka i Amerika Samoa, o se tasi lea o lala o le Soifua Maloloina.