Fa’amalosia tulafono puipuia aia latou i ai manaoga tino & mafaufau


Afioga i Senatoa o le maota maualuga, le afioga a Paepae Fai’ai, afioga i le alii peresetene ia Gaoteote Palaie Tofau, ma le afioga a Misaalefua J. Hudson. [ata AF]
ausage@samoanews.com

I le pasia ai e le Fono Faitulafono o tofiga a le afioga i le ali’i Kovana ia Lolo Matalasi Moliga, mo le ali’i foma’i ia Dr. Peter Tinitali e avea ai o ia ma Fa’atonusili o le Ofisa e Puipuia Aia tatau o tagata e i ai manaoga fa’apitoa o le tino ma le mafaufau i le atunu’u (OPAD), ua fautuaina ai o ia e afioga i Faipule ma Senatoa ina ia fa’aauau pea le fa’amalosia o tulafono e puipuia ai aia tatau o i latou o loo i ai manaoga faapitoa.

 

E 17-1 le palota na pasia ai e le maota o sui le susuga Dr. Tinitali i le aso Lua, ae 15-1 le palota na pasia ai o ia e le maota maualuga i le taeao ananafi.

 

Na taua e le afioga i le ali’i Senatoa ia Fai’ivae Iuli Godinet i le taimi o le iloiloga a le maota maualuga i le taeao ananafi e fa’apea, e i ai lona talitonuga e le o lava le fa’amalosia e le Ofisa a le ali’i foma’i o tulafono e puipuia ai aia o i latou o loo i ai manaoga fa’apitoa o le tino ma le mafaufau.

 

Sa ia fautuaina le tatau lea ona vaavaai i faleoloa e le o i ai ni vaega e paka ai ta’avale a i latou e i ai manaoga faapitoa o le tino ma le mafaufau, ina ia mautinoa e fautuaina i latou i ala o le tulafono mo le fausia o vaega faapitoa e tatau ona fausiaina.

 

Na fesili le affoga i le sui peresetene ia Nuanuaolefeagaiga S. Nua i le ali’i foma’i, poo i ai ni faafitauli o fetaia’i ma lona Ofisa o loo mafua ai ona tula’i mai fa’aletonu e pei ona molimauina i saunoaga a ni isi o senatoa, ae na tali Dr. Tinitali e fa’apea, e leai ni fa’afitauli o latou fetaia’i, se’i vagana ai le fa’aauau pea lea o le latou matafaioi o loo fa’atino mo le puipuia lea o aia o i latou e i ai manaoga o le tino ma le mafaufau.

 

“Matou te le fausia ni atina’e poo ni fale e tausi ma tu’u i ai i latou o loo iai manaoga faapitoa, ae matou te fa’atinoina galuega e puipuia ai o latou aia tatau i lalo o le tulafono, matou te fautuaina fo’i pisinisi ma faleoloa atoa ai ma vaega o le malo ina ia mautinoa e tausisi i le tulafono, e ala i le fausia lea o vaega e paka ai ta’avale a i latou o loo i ai manaoga faapitoa, atoa ai ma le faia o auala uma ina ia mafai e i latou nei ona aga’i atu i totonu o ofisa o le malo ma pisinisi e aunoa ma se fa’afitauli”, o le saunoaga lea a Dr. Tinitali

 

I luma o le maota o sui, na fautuaina ai e le afioga i le ali’i faipule ia Manumaua Wayne Wilson le ali’i foma’i ina ia silasila toto’a i ni isi o faleoloa e le o fa’asima ina luma o vaega e paka ai ta’avale, lea e fa’a faigata ai i tagata o loo i ai manaoga faapitoa ona latou uia ia nofoaga, ae na saunoa Dr. Tinitali e fa’apea, talu ona i ai le sui o lona Ofisa i totonu o le Komiti Fa’afoe e iloiloina talosaga mo pisinisi fou e fia fa’atutu i le atunu’u, ua fa’a faigofie ai ona ofi atu ai ma le fautuaga ina ia aofia i soo se galuega e fausia vaega e pei ona fautua mai ai le tulafono.

 

I le fa’amalosia o le tulafono lea na pasia e le Fono Faitulafono i le tausaga na te’a nei, lea e fa’asala ai le ave ta’avale e paka i le vaega e paka ai ta’avale a i latou e i ai manaoga faapitoa, na taua ai e le ali’i foma’i le fa’aauau pea o a latou feutanaiga ma le Matagaluega o Leoleo, mo le fa’atulagaina o se aso e faia ai aoaoga faapitoa mo sui e to’a 6 o lona Ofisa, lea ua fa’amoemoe e tu’u atu i ai le malosi mo le fa’asalaina o ave ta’avale latou te le usitaia le tulafono.

 

O le taimi lava e mae’a ai aoaoga e pei ona fuafuaina, ona mafai ai loa lea e sui o le Ofisa a le OPAD ona fa’asala (ticket) o soo se ave ta’avale e maua o loo paka i vaega faapitoa e paka ai ta’avale a i latou e i ai amanaoga faapitoa.

Comment Here