O le fonotaga lea sa faia i le va o le Ofisa o Tiute ma le Pulega o Uafu ma Malaeva’alele i le aso Faraile na te’a nei, fa’atasi ai ma sui o le aufai pisinisi i le atunu’u, na maua ai le avanoa o sui o le malo e fa’amanino ai auala o le a fa’atinoina ai le galuega, o le su’eina lea o uta o oloa mai totonu o container e fa’aaoga i ai masini scanner ia ua taunu’u mai, atoa ai ma le totogi ua pasia i le tulafono e fa’aee atu i le taimi e fa’atinoina ai lea tautua.

Na taua e le sui teutupe a le malo ia Keith Gebauer i le taimi o le fonotaga e fa’apea, e le gata o le a totogi e le faipisinisi le $200 mo le su’eina o le container e tasi i luga o le uafu, ae o lo o tumau pea le totogi tuai e $60 mo le tagata faigaluega e to’atasi i le taimi e fa’atinoina ai le galuega.

E pei ona manino i ni isi o suiga a le malo, o le susuga ia Gebauer lea ua tofia nei na te vaavaaia le Ofisa o Tiute a le malo i totonu o le Matagaluega o Tupe, le tulaga sa tauaveina e le afioga ia Moetulu’i Sipili Fuiava, lea ua tofia na te tauaveina le isi tofiga i totonu lava o le Ofisa o Tupe.

Sa i ai fa’atasi i lea fonotaga le sui fa’atonusili o le Pulega o Uafu ma Malaeva’alele ia Chris King, o ia lea na fa’amalamalamaina i le aufaipisinisi vaega o le uafu i Fagatogo e aofia i le taimi e su’e ai uta o oloa o lo o i totonu o container, atoa ai ma taimi e taofia ai le fa’atinoina o le latou galuega.

Na fa’amanino e King i le taimi o le fonotaga le taumafai o le Pulega o Uafu ma Malaeva’alele e fa’atino lenei tautua i se auala fa’a faigofie, mo le saogalemu o tagata uma atoa ai ma tagata faigaluega.

O le taeao ananafi sa molimauina ai fo’i e le Samoa News le fa’aauau pea lea o lenei auaunaga, o le gasolo mai o loli ma container o oloa mo le siakiina, ao molimauina ai ni isi o le mamalu o le atunu’u o loo laulau tutu i luma o le faitoto’a tele, se’i mae’a le fa’atinoina o le galuega ona fa’atoa mafai lea ona ulufale.

O se tasi o itu sa manino i lea fonotaga, o aso uma lava e afea ai le atunu’u e se va’a meli mai fafo, e pei o le aso 22 Aperila lea ua fa’amoemoe e taunu’u mai ai va’a meli e lua, o le a le mafai ona fa’atinoina ai se galuega mo le su’eina o container, ae o le a ave pea lava le fa’amuamua i le saogalemu o tagata fegasoloa’i i totonu o le uafu.

Ina ua fesiligia pe fa’afefea tagata faipisinisi o loo mana’omia a latou container mo le fa’aaoagaina o oloa o loo i ai le aso e taunu’u mai ai le va’a meli, ae na saunoa Gebauer e fa’apea, o le galuega muamua lava a le Ofisa o Tiute o le su’eina lea o container i le taimi e taunu’u mai ai le uta o va’a oloa mai fafo, ina ia mautinoa e leai se fa’aletonu e tula’i mai ai mo le aufaipisinisi.

“O le agaga atoa na mafua ai ona fa’atula’i mai lenei polokalame o le aumaia lea o scanner nei mai fafo, ina ia fa’a faigofie ai le fa’atinoina o le galuega, ae le taofia ai lava fa’afitauli e tutupu ao tatou galulue fa’atasi ai e fa’atino lenei auaunaga taua, o le mafua’aga lena e taua ai la outou fautuaga e tuuina mai, ina ia mafai ai ona tatou galulue fa’atasi mo le fa’atinoina o lenei fa’amoemoe taua”, o le saunoaga lea a Gebauer.

A o tele ai le mau fesili mai ni isi o le aufaipisinisi, pe avea le fa’aaoga o masini scanner nei ma auala e fa’aagafua ai le totogiina o pili sa masani ona totogi mo le aufaigaluega a le Ofisa o Tiute, na saunoa ai Gebauer e leai, e i ai fo’i totogi mo le fa’aaogaina o masini scanner e tatau ona totogi, fa’atasi ai ma totogi tuai ua leva ona i ai.

“O le agaga atoa na mafua ai ona aumaia nei scanner, ina ia mafai ai ona su’e oloa o loo aumaia fa’anana i totonu o le atunu’u e aofia ai ma fualaau fa’asaina, a’upega mata’utia ma isi lava oloa e le fa’atagaina”, o le isi lea saunoaga a Gebauer.

Sa fesiligia e ni isi o le aufaipisinisi le mafua’aga o le totogi o le $200 e su’e ai le container atoa ai ma le $60 lea e totogi mo le tagata faigaluega a le Ofisa o Tiute e fa’atinoina le galuega, ae na fa’amanino e le susuga a Gebauer e fa’apea, o le totogi mo le su’eina o le container, o le totogi lava lea ua fa’atulafonoina mo le fa’amalosia o tulafono i le puipuiga o oloa mai fafo, ae ese mai ai fo’i le totogi mo ali’i Ofisa o lo o galulue i le sueina o oloa o lo o aumai i totonu o le container.

E pei ona avea ai le mataupu i scanner o se tasi o mataupu e to’atele faipule ma senatoa o lo o atugalu ai, ona o lo o i ai le talitonuga, o le taimi lava e fa’aee ai e le malo totogi fou nei i luga o le aufai oloa, o le taimi fo’i lea e fa’aee ai e le aufai oloa si’itaga i tau o oloa mo le atunu’u, ina ia tau fa’apaleni ai tupe ua latou totogiina mo le su’eina o container.