Ads by Google Ads by Google

Fa’amanino Fa’amasinoga gaioiga tagata e tuleiina fualaau fa’asaina

ausage@samoanews.com

O se tasi o vaega o le saunoaga a le afioga i le ali’i fa’amasino ia Fiti A. Sunia, i le taimi o le ulua’i iloiloga a le ali’i lea o lo o tu’uaia i lona aumaia fa’anana lea o se vaega tele o le pauta fa’asaina o le aisa mai le pusa meli i le lua vaiaso talu ai, na ia fa’amaninoina ai gaioiga e fa’atinoina e i latou o lo o umia ma tuleiina fualaau fa’asaina, ina ia faigata ai ona maua i latou.

 

Ua tofu atu nei i le fa’amasinoga maualuga le mataupu o lo o tu’uaia ai le ali’i o Yuseff Carter e le malo, i lona umia fa’asolitulafono o vaega o le pauta fa’asaina o le aisa, i le mae’a ai lea o lana ulua’i iloiloga sa faia i le aso Lulu na te’a nei, ma fa’amaonia ai e le fa’amasinoga, e le gata ua soli le vaega o le tulafono, ae o Carter fo’i lea o lo o tu’uaia i le soliina o lea vaega o le tulafono.

 

E to’atasi le molimau a le malo na fesiligia i le taimi o le ulua’i iloiloga sa faia, o le susuga lea i le ali’i leoleo su’esu’e ia Det. John Seumanutafa, o ia fo’i lea sa gafa ma le su’esu’eina o le mataupu a Carter ina ua fa’atoa tula’i mai ia Oketopa 12, 2016 ina ua alu atu le ua molia e piki mai lana afifi i le pusa meli, ae taofia ai loa o ia ina ua masalomia, o lo o i ai i totonu o lea afifi vaega o le pauta fa’asaina o le aisa.

 

E pei ona taua i le molimau a le ali’i leoleo su’esu’e, na alu atu Carter e siaki lana meli, ae maua ai se pepa lanu samasama i totonu o le pusa meli, o lea pepa samasama e ta’u atu ai, o lo o i ai sana afifi lapo’a e tatau ona piki mai i le vaega o lo o piki mai ai uta ma fa’amomoli mai fafo.

 

E ui na maua e Carter le pepa samasama, ae na manatu o ia e fa’atoa alu i le aso e soso’o ai e piki mai lana afifi, o lo o tusia ai le igoa o “Malulu”.

 

Na taua e Seumanutafa e faapea, ina ua ia fesiligia ia Carter e uiga i le afifi, sa ia taua ai e fa’apea, o lo o ia fa’atali mo sana afifi mai lona tama, ae o le afifi o lo o lafo mai i le kamupani a le Amazon.

 

Ina ua siaki e sui o le Ofisa o Tiute le afifi, sa maua ai i totonu se tama’i atigipusa o lo o tusia ai le igoa o le kamupani o le Amazon, ae i totonu o lea atigi pusa sa maua ai vaega o le pauta oona o le aisa, lea e tusa lona mamafa ma le 1.2 aunese.

 

Sa faia e Det. Seumanutafa se suega fa’apitoa i le pauta oona sa maua i totonu o le afifi, ma fa’amaonia ai o vaega ia o le pauta fa’asaina o le aisa. Na taua atili fo’i e le ali’i leoleo i lana molimau le tete’e o Carter, i le leai lea o sona malamalama e fa’atatau i le afifi na aumai i totonu o lana pusa meli, e le o le afifi fo’i lea sa ia fa’atali i ai.

 

Na finau le malo i le fa’amasinoga e fa’apea, ua masani i latou o lo o faia le gaioiga o le tulei atoa ai ma le umiaina o vaega o fualaau fa’asaina, e le gata e le tusia ni o latou igoa i luga o le afifi pe a lafo mai, ae leai fo’i ni lisiti poo ni isi lava fa’amaumauga e tusia ai i luga, ina ne’i avea lea ma auala e maua ai i latou.

 

“E le tau fesiligia le gaioiga sa faia e Carter i le taimi na ia mauaina ai le pepa samasama mai totonu o lana pusa meli, sa ia faia le fa’aiuga e fa’atoa piki lana afifi i le aso e soso’o ai, o le mea mautinoa fo’i, o le afifi tonu lava lea sa fa’atalitali ai o ia e maua mai, e ui o lea ua ia teena le leai o sona iloa o le afifi na aumai i lana pusa meli”, o le fa’afinauga lea a le malo.

 

Ae na finau le loia a Carter e fa’amanino le tele o vaega e talitonu o ia e le tatau ai ona i ai ni mau a le malo e lagolagoina ai le a’afia o le ua molia i lenei solitulafono.

 

Na taua e le loia a le ua molia e fa’apea, e leai se taimi na umia ai e Carter le afifi na maua i ai vaega o le pauta oona o le aisa, e leai fo’i se fa’amaoniga e iloa ai, o le afifi sa aumai i luga o lona igoa, aua e lei tusia ai lona igoa, ae le iloa po o ai na aumai ai.

 

“E lei maua ia Carter se afifi na aumai ai vaega o le pauta oona o le aisa, ae sa taofia lava e sui o le Ofisa o Tiute, e lei maua fo’i i totonu o le afifi se pepa fa’amaonia e iloa ai, o ia tonu e ana le afifi lea, lona uiga la, e leai ma se mau e faamaonia ai le a’afia o Carter i lenei solitulafono, o le mafua’aga fo’i lena ou te finau atu ai, ia fa’aleaoga le moliaga ua faia fa’asaga ia Carter”, o le fa’afinauga lea a le tama’ita’i loia fautua ia Karen Shelly.

 

Saunoa le afioga i le ali’i fa’amasino ia Sunia e faapea, tusa lava pe lei tusia le igoa o Carter i luga o le afifi na aumai, pe na te lei iloaina fo’i mea sa aumai i totonu o le afifi, o loo manino i fa’amaumauga a le fa’amasinoga, o ia e ana le pusa meli na aumai ai i totonu le afifi, o ia fo’i o lo o i ai le ki e tatala ai le pusa meli.

 

“O gaioiga sa faia e le ua molia e pei o le ki o lana meli i le isi aso ae fa’atoa piki le afifi i le isi aso, atoa ai ma le le tusiaina o lona igoa i le afifi na aumai, o ni isi ia o gaioiga e masani ona fa’atinoina e i latou e umia ma tuleiina fualaau fa’asaina, ina ia fa’a faigata ai ona maua i latou e le malo”, o se vaega lea o le saunoaga a Sunia.

 

Na taua atili e Sunia e fa’apea, talu ai o le pusa meli a Carter lea na aumai ai le afifi na maua i ai vaega o fualaau fa’asaina, lona uiga o mea uma lava sa i totonu o le afifi, o mea uma ia e pulea e le ua molia.

 

Na teena e le ua molia le moliaga mamafa e tasi o lo o tu’uaia ai o ia e le malo, ina ua tula’i o ia i luma o le fa’amasinoga maualuga i le taeao ananafi, ma ua fa’atulaga lana ulua’i iloiloga i le masina o Tesema.

 

Ua tatalaina nei Carter i tua ina ua ia totogi le tupe e $5,000 e fa’atali ai le aso lea ua fa’atulaga e toe valaau ai lana mataupu.