Fa’amanino Kovana mafua’aga na filifilia ai Fuamatu avea Kovana Itumalo


[ata: archive]
ausage@samoanews.com

O le taimi o le sauniga e fa’atauto aloaia ai le afioga a Fuamatau J.V Fuamatu e avea ma Kovana Itumalo o le Falelima i Sisifo i le taeao ananafi, na tulei saunoa ai le afioga i le ali’i Kovana ia Lolo Matalasi Moliga e fa’amanino le mafua’aga na ia filifilia ai le afioga i le Alala Matuatala ia Fuamatu na te fa’aauauina le tofi Kovana Itumalo sa tauave mai e Lualemaga E. Faoa ua tu’umalo.

 

Saunoa Lolo e fa’apea, atonu pau lea o le avanoa e o o atu ai le tofi i le itumalo o Alataua, aua afai loa e nofoia uma suafa Fa’asuaga i totonu o le Falelima i Sisifo e aofia ai le suafa Letuli, Tuitele, Fuimaono, fa’apea ai ma le suafa Satele e pei ona nofoia mai i le taimi nei, e le toe o o lava le tofi i le itumalo o Alataua.

 

Na fa’atumulia le potu fono a le Ofisa o le Kovana i ta’ita’i o le malo, sui o le Falelima i Sisifo fa’apea ai uo ma aiga o le afioga a Fuamatu na fa’amalo’ulo’u atu latou te molimauina lenei sauniga taua, lea na tatala aloaia i se sauniga lotu puupuu a o lumana’i ai le sauniga o le fa’atautoina o le Kovana Itumalo fou.

 

O le afioga i le ali’i Fa’amasino Lagolago ia Suapaia Pereira na fa’atautoina le afioga a Fuamatu, a o molimauina e le mamalu o malo, uo ma aiga e aofia ai le afioga i le ali’i kovana ia Lolo, o le lutena kovana ia Lemanu Peleti Mauga, fa’apea ai ma le afioga i le Failautusi o le Ofisa o Mataupu Tau Samoa ia Mauga Tasi Asuega ma sui o lona Ofisa.

 

Sa i ai fo’i le afioga i le Fofoga Fetalai ia Savali Talavou Ale ma lona faletua ia Beauty, fa’apea ai afioga i Senatoa ia Faiivae Godinet ma Fonoti T. Aufata.

 

Na fa’afetaia e le ali’i kovana le paia o le Falelima i le avanoa sa tu’uina atu na te faia ai le filifiliga mo se tasi e avea ma Kovana Itumalo, ma e le o se fa’aiuga sa faigofie ia te ia.

 

“O le mea moni lava, e leai so matou lagona ma Ta’ita’i o le atunu’u sa matou auai fa’atasi i le taumafaiga o lenei fa’aiuga e vavevave so matou manatu i le fa’aiuga e pei ona matou faia, sa lafo atu pea lava i le mamalu o le Falelima le avanoa e saili ai le tofa ma le fa’autaga i se tasi e avea ma Kovana Itumalo”, o le saunoaga lea a Lolo.

 

“Ae fa’afetai atu i le paia o le Falelima i ona mamalu eseese, ina ua tasi la outou tofa e taoto mai le fa’aiuga o le mataupu matou te faia se fa’aiuga, ma o le mea moni, e le i faigofie ona saili latou fa’aiuga e tusa ai o lenei mataupu, aua o tofi nei a le atunu’u e ‘au uma i ai tupu ma e’e o le atunu’u, o Samoa fo’i ma lona maota ua uma ona tofi, e faigata la ona toe faia i ai sa matou fa’aiuga”.

 

“A matou vaavaai atu i itu uma o la tatou aganu’u e tofu uma, e le faigofie, pau le itu sa taula’i i ai la matou vaai, o le fale o Samoa ua uma ona tofi, ona paia fo’i ma mamalu e le toe fesiligia e se tasi, e afua mai mauga maualuluga seia oo mai i le atunu’u lautele, o paia na o Samoa e le toe autaluina i se manatu o se tagata, o le faiva fo’i o Faleupolu latou te tausia tupu ma Fa’asuaga o le atunu’u”.

 

Na fa’amanino atili e le ali’i kovana e fa’apea, talu ai e le o nofoia le tele o Fa’asuaga i le Falelima i Sisifo, na mafua ai ona faia la latou fa’aiuga ma le afioga a Lemanu fa’apea ai le afioga i le Maoputasi ia Mauga, ina ia see atu loa le tofi Kovana Itumalo e tauave e Alataua, aua o le taimi lava e nofoia ai suafa nei o Fa’asuaga, e le toe oo lava le tofi i le Alataua.

 

E pei ona masani ai Samoa ma ana agaifanua, a mae’a le fa’apaiaina o ni tofi maualuluga faapenei a le atunu’u, ona alo lea o le paia o aiga i ana fa’aaloaloga masani, lea na avea ai le tofa i le Tautootoo ia Savali e fai ma fofoga o le itumalo o Alataua, mo le fa’aleoina o le agaga fa’afetai i le malo fa’apea ai ona ta’ita’i, ona o le fa’aaloalo maualuga ua tu’uina atu i le Alataua e tautua ai i le tofi Kovana Itumalo.

 

Na fa’ai’u fa’aaloaloga masani i le tufatufaina o meaalofa tupe i le mamalu o le au valaaulia fa’apea ai ta’ita’i o le atunu’u, e fai meaalofa atu ai le afioga i le Kovana Itumalo fou ia Fuamatu.

Comment Here