Ads by Google Ads by Google

Fa’amavae Ale Tifimalae mai le tofi Fa’atonusili Ofisa TAOA


Tofa i le Tootoo ia Ale Tifimalae Ale. [ata AF]
ausage@samoanews.com

O le aso Faraile na te’a nei na fa’amavae ai le tofa i le Tootoo ia Ale Tifimalae Ale mai le tofiga o le Fa’atonusili o le Ofisa o Tagata Matutua a le malo (TAOA), talu mai le tausaga e 2013 na tofia ai o ia e le afioga i le ali’i kovana ia Lolo Matalasi Moliga ma Fa’amaonia e le Fono Faitulafono e avea ma ta’ita’i o se tasi o Ofisa taua a le malo.

 

O le mae’a ai ona fa’amavae o Ale mai lona tulaga, na ia tuua ai loa le atunu’u ae malaga atu i Amerika mo tulaga i ana talavai.

 

Na fa’amaonia mai e se sui o le Ofisa o le TAOA i le Samoa News i le taeao ananafi le fa’amavae aloaia ai o Ale mai lona tulaga fa’a Ta’ita’i i le aso Faraile na te’a nei, i se latou fonotaga faapitoa sa faia i le aso Faraile lava na te’a nei.

 

Na taua atili e le molimau e fa’apea, o tulaga i le soifua maloloina o le afioga i le ali’i Fa’atonu le mafua’aga o lona fa’amavae mai i lana galuega.

 

Na fa’amaonia mai e se sui sinia mai le Ofisa o le ali’i kovana le mae’a lea ona tauaao e le afioga i le ali’i kovana o le tusi fa’amavae a le afioga a Ale e tusa ai o le galuega na tofia o ia e galue ai.

 

Na taua e ni isi o Tama ma Tina matutua na mafai ona fesiligia e le Samoa News i le taeao ananafi, le fa’ateia o i latou i lenei tala e fa’atatau i le fa’amavaega a le latou ta’ita’i.

 

“E faigata ona fa’agalo le afioga i le ali’i Fa’atonu, ona o lona naunau e fa’amuamua lava tautua ma auaunaga mo Tama ma Tina matutua i le atunu’u, e le gata i lea, ua tele polokalame ua manuia ai Tama ma Tina matutua o le atunu’u na afua mai i le nofoaiga a le tofa a Ale”, o le saunoaga lea a le susuga ia Viliamu Leilua o Aua.

 

O se tasi o polokalame a le Ofisa o le TAOA na fa’alauiloa i le masina na te’a nei, o le tatala aloaiaina lea o le maketi e fa’alauiloa ai galuega taulima a Tama ma Tina matutua, lea fo’i ua mafai ai ona tatala atu ma le avanoa i fanau aoga i le atunu’u, mo le avanoa e mafai ai ona latou asia lea nofoaga ma matamata ai i soo se galuega taulima fa’a Samoa sa galulue i ai Tama ma Tina o le atunu’u.

 

Na taua e Ale i se fa’atalatalanoaga ma le Samoa News i le tatala aloaiaina ai o le maketi mo galuega taulima a le TAOA e fa’apea, o le taua o galuega taulima o lo o fa’atinoina e Tama ma Tina matutua, e mafai ona teuina i se nofoaga fa’apitoa, ma maua ai le avanoa o fanau aoga latou te molimauina ai ia galuega taulima ma fa’aa’oa’o ai i le taua o galuega taulima a Samoa.