Na fa’atula’i e le afioga i le ali’i Palemia o le malo tuto’atasi o Samoa, i le taimi o lana saunoaga i le fa’apaiaina o le nofoaiga fou a Lolo ma Lemanu i le vaiaso nei, ni lu’itau taua ma le aoga mo le faigamalo a Amerika Samoa ma ona tagata, e manatunatu loloto i ai ona ta’ita’i i le lumana’i.

O ni isi o ia lu’itau e pei ona saunoa Tuilaepa Lupesoliai Sailele Malielegaoi e aofia ai le tatau lea ia Amerika Samoa ona avea ma sui o le saofaiga o Ta’ita’i o malo o le Pasefika, atoa ai ma le le tatau lea ia Amerika Samoa ona fa’amalumalu le tu’uina atu o sona leo i le malo tele o Amerika.

Na fa’atusa e Tuilaepa le malo tele o Amerika, o le malo “o loo sili ona fia saili malo i ai malo uma o le lalolagi, ae o lea ua silia i le 100 tausaga o osiosi le feagaiga a Amerika Samoa ma le malo tele.”

“O la matou maitau mai i le la ituvai, o loo sologa lelei pea la outou feagaiga ma le malo tele, o le ala lea matou te aiai uli mai ai ma pati pati ma po po ia outou faiva malo, aua matou te talitonu, o le taimi lava e lulu ai le nafinafi i ou laufanua, matou te lalaoa fa’asoloatoa ai lava”, o le saunoaga lea a Tuilaepa.

Sa ia taua e fa’apea, o amioga a malo mativa ma l le tagolima e i ai Samoa, e maua loa le avanoa i se malo tele, “fai loa e le toe fa’atali”.

“Atonu e tau mataga te isi peita’i e le tiga. O le mea mautinoa fo’i, e pamu uma malo o le lalolagi, e pei fo’i o Samoa, e pamu ae le pamu tele, matou te pamu fuafua i ni nai suo tipi e toto ai a matou ulu ma’afala. E te fa’amalumalu loa ia Amerika, ona leai lea ma se mea aoga e maua”, o le lu’i lea a Tuilaepa ia Amerika Samoa.

“O le tele o suiga fou e fa’ataoto e soo se faigamalo, fa’atoa iloa ua taoto i lagatonu ina ua amata fa’atino. O suiga fo’i ma lagona pito ogaoga o loo i ai i le lalolagi i le taimi nei, ua tuu fesili ai le to’atele, o le a le ituaiga lalolagi o le a tatou i ai i le taimi nei pe afai ae tula’i mai le taitai fou o le malo tele o [Donald] Trump”.

“O ituaiga mafaufauga ia o loo afua mai ia i latou o loo popole vale, palaaai, peita’i o lea ua fa’amalosi mai Paulo i le tusi o Filipi fai mai, lafoa’i uma mea na i le Atua, fai talia o ia ma fa’avasega, o le Atua lena fai mai le aufai lotu, afai e ‘au ma tatou, o ai la se fa’asagatau mai”.

I le fa’aiuga o le saunoaga a le ali’i Palemia, sa ia fa’ailoa ai le sauni atu o Samoa e talimalo i le fonotaga a Ta’ita’i o malo o le Pasefika i se taimi o le tausaga nei.

O le fonotaga a le Pasefika i le tausaga na te’a nei, na fa’amaonia ai le ofi mai o atunu’u e to’alua o Niu Kaletonia ma Tahiti e avea ma sui o le Saofaiga o Ta’ita’i o malo o le Pasefika.

“O Amerika Samoa, o le sui fa’avae lea o le Saofaiga o Ta’ita’i o le Atu Polenisia fa’atasi ai ma Samoa, ae a toe ofi fo’i i le tausaga lenei Amerika Samoa i le Saofaiga a Ta’ita’i o malo o le Pasefika, o le a avea lea ma auala e tauavagameaina ai le mau mo le siitia i luga o atina’e mo Amerika Samoa, aemaise ai le fa’aleleia o tautua e pei o galuega, aoga, tomai fa’afoma’i, atoa ai ma le tali atu i le anoanoa’i o le mau suiga ogaoga o le tau ua i ai”, o le saunoaga lea a le ali’i Palemia.

I le fa’aiuga o lana saunoaga, na ia fa’amanuia ai i le toe tula’i mai o le faigamalo a Lolo ma Lemanu, atoa ai ma lona lu’iina lea o i laua ina ia aua ne’i fefe e fai mea lelei mo le malo o Amerika Samoa.